ሃዋሬታ ኦሱዋ 11 - ጌሻ ማፃፋ

ጰፅሮስ ባ ኦዳ ኦሱዋ ኦድስ

¹ ሀዋረትነ ይሁዳ ኡባን ደእያ አማነይሳት፥ አይሁደ ግዶናይሳትካ ፆሳ ቃላ ኤክዳይሳ ስእዶሶና።

² ጰፅሮስ የሩሳላመ ብዳ ዎደ ቃፃረትዳ አማነይሳት፥

³ እያኮ፥ “ኔኒ ቃፃረትቦናይሳታኮ ገላዳ ኤንታራ ካ አይስ ማዲ?” ያግዶሶና።

⁴ ሽን ጰፅሮስ ሀንዳባ ኮይሮፐ ዶምድ ማራን ማራን ኦድስ፦

⁵ “ታኒ ዮጰ ካታማን ፆሳ ዎሳሸ ቆንጨ በአስ። ግታ አፍላ ዳንያባይ ኦይዱ ባጋራ ኦይከትድ ሳሎፐ ዎሸ ታኮ ይስ።

⁶ ታኒ ትሽ ኦ እያ ግዶ ፄልያ ዎደ ኦይዱ ቶሆራ ደእያ መሄታ፥ ዎራ ዶአታ፥ ኡሎራ ጎሸትያ መተታነ ሳሎ ካፎታ በአስ።

⁷ ‘ጰፅሮሳ፥ ደንዳ፥ ሹካዳ ማ’ ግያ ቃላ ስአስ።

⁸ “ሽን ታኒ፥ ‘ጎዳዉ፥ አካይ፥ ቱናባይ ዎይኮ ጌዮናባይ ኡባካ ታ ዶናኮ ሺቅ ኤረና’ ያጋስ።

⁹ “ ‘ፆሳይ ጌሽዳይሳ ኔኒ ቱና ጎፓ’ ግያ ቃላይ ናምአን ሳሎፐ ይስ።

¹⁰ “ሄስ ሄ ቶሆ ሀንን፥ ዉርሰን ኡባባይ ሳሎ ፑደ ኤከትስ።

¹¹ ሄ ሳተንካ ሄ አሳት ቅሳረፐ ታኮ ኪተትድ ታኒ ደእያ ኬ ጋክ አግዶሶና።

¹² ስና ኤንታራ ባና መላ አያናይ ታዉ ኦድስ። ቃስ ሀ ኡሱፑን እሻት ዮጰፈ ታራ ቅሳረ ብዳይሳታራ ቆርነልዮሳ ሶ ገልዳ።

¹³ ኪታንቾይ እያ ሶን ኤቅድ፥ ‘ዮጰ ኪታዳ ጰፅሮሳ ጌተትያ ስሞና ፄግሳ።

¹⁴ ነናነ ነ ሶ አሳ ኡባ አሽያ ቃላ እ ነዉ ኦዳና’ ግዳይሳ ቆርነልዮስ ኑስ ኦድስ።

¹⁵ “ታኒ ሃሳያ ዶምያ ዎደ ጌሻ አያናይ ኮይሮ ኑ ቦላ ዎዳይሳዳ ኤንታ ቦላካ ዎ አግስ።

¹⁶ ሄ ዎደ፥ ‘ዮሃንስ ሃን ፃማቅስ፥ ሽን ህንተ ጌሻ አያናን ፃማቀታና’ ያግዳ ጎዳ ቃላይ ታዉ ቆፈትስ።

¹⁷ ፆሳይ ኑስ ጎዳ የሱስ ክርስቶሳ አማንዳይሳታስ እምዳ እሞታ አይሁደ ግዶናይሳታስካ እምኮ፥ ያትን ፆሳ ድጋናዉ ታኒ ኦኔ?” ያግስ።

¹⁸ ኤንቲ ሄሳ ስእዳ ዎደ ባንታ ፓላማ አግድ፥ “ያትን፥ ፆሳይ አይሁደ ግዶናይሳትካ ናጋራፐ ስሚድ ደኦን ዳናዳ ቃዳ እሚስ” ያግድ ፆሳ ጋላትዶሶና።

አንፆከ ዎሳ ኬ

¹⁹ እስፅፋኖሰ ሀይቆስ ጋዳ ጎዳ ጋሶን ላለትዳ አማነይሳት ቃላ አይሁደታ ፃላላስ ኦድሸ ስሮፍንቀ፥ ቆጵሮሳነ አንፆከ ጋካናዉ ዩይዶሶና።

²⁰ ሽን ቆጵሮሳፐነ ቀሬናፐ ይዳ እስ እስ አማንያ አሳት አንፆከ ብድ፥ ጎዳ የሱሳ ዎንገላ ግርከ አሳስካ ኦድዶሶና።

²¹ ጎዳ ዎልቃይ ኤንታራ ደኤስ፤ ቃስ ዳሮ አሳይ አማንድ ጎዳኮ ስምዶሶና።

²² ሄ ኦዳ የሩሳላመን ደእያ ዎሳ ኬይ ስእዳ ግሾ ባርናባሳ አንፆከ ኪትስ።

²³ ባርናባስ አንፆከ ብዳ ዎደ ፆሳ አ ኬሀተ ኦሱዋ በእድ ኡፋይትስ። ኤንቲ ኡባይ ባንታ ኩመ ዎዛናን ጎዳን ምንድ ዳና መላ ኤንታ ዞርስ።

²⁴ ባርናባስ ጌሻ አያናይነ አማኖይ ኩምዳ ሎኦ አስ ግድያ ግሾ ዳሮ አሳይ ጎዳ አማንዶሶና።

²⁵ ሄሳፈ ጉየ፥ ባርናባስ ሳኦላ ኮያናዉ ታርሰሳ ብስ።

²⁶ ያን ሳኦላ ደምዳ ዎደ አንፆከ ኤክድ ይስ። ባርናባስነ ሳኦል ዎሳ ኬ አሳራ ላይ ኩመ ኡትድ ዳሮ አሳ ታማርስዶሶና። አማነይሳት አንፆከን “ክርስታነ” ጌተትድ ኮይሮ ፄገትዶሶና።

²⁷ ሄ ዎደ እስ እስ ናበት የሩሳላመፐ አንፆከ ዎዶሶና።

²⁸ ኤንታ ግዶፈ አጋቦሳ ገይስ ደንድድ ቢታ ኡባን ግታ ኮሽ ከያናይሳ አያና ዎልቃን ትንብተ ኦድስ። ሄስ ሀንዳይ ሮመ ካዋ ቃላዉድዮሳ ዎደና።

²⁹ አማነይሳት ሁጰን ሁጰን ባንታ ዎልቃ መላ ሚሸ ከስድ ይሁዳን ደእያ አማነይሳታስ ማደ የዳናዉ ቆፋ ቃችዶሶና።

³⁰ ኤንቲ ሄሳዳ ኦድ፥ ሚሽያ ባርናባሳ ቦላነ ሳኦላ ቦላ ዎሳ ኬ ጭማታስ የድዶሶና።