ሃዋሬታ ኦሱዋ 10 - ጌሻ ማፃፋ

ጰፅሮሳነ ቆርነልዮሳ

¹ ቅሳረን፥ “ፃለ ኦላ አሳታ” ጌተትያ ኦላንቾታ ግዶን እስ ቆርነልዮሳ ጌተትያ ማቶ ሀላቃይ ደኤስ።

² ቆርነልዮስ ባ ሶ አሳራ ፆሳ ምን አማንያ አስነ ፆሳ ጎይንያ አስ። አይሁደ ማንቆታካ ዳሮ ማዴስ፥ ቃስ ፆሳ ኡባ ዎደ ዎሴስ።

³ እስ ጋላስ ኡዱፉን ሳተ ሄራን ፆሳ ኪታንቾይ እያኮ ይድ፥ “ቆርነልዮሳ” ግድ ፄግሽን እ ቆንጨን ጌሽድ በእስ።

⁴ ቆርነልዮስ ዳጋምድ ኪታንቹዋ ትሽ ኦ ፄልድ፥ “ጎዳዉ፥ እ አይቤ?” ያግስ። ኪታንቾይ ዛሪድ፥ “ነ ዎሳይነ ማንቆታ ነ ማደይስ ፆሳ ስንን ሀሳየትስ።

⁵ ሀእ ዮጰ አሰ ኪታዳ፥ ጰፅሮሳ ጌተትያ ስሞና ኤህሳ።

⁶ ጰፅሮስ አባ ዶናን ጋልባ ሃሽያ ስሞና ሶን እማተ ሲራትስ” ያግስ።

⁷ ቆርነልዮስ ባዉ ኦድዳ ኪታንቾይ ብን፥ ባ አይለታፐ ናምአታነ ፆሳ ጎይንያ ባ ማታ ዎታዳረታፐ እሱዋ ፄግድ፥

⁸ ኤንታዉ ኡባባ ኦድድ ዮጰ ኪትስ።

⁹ ዎንተ ጋላስ ኤንቲ ብድ፥ ዮጰ ካታማ ማትሽን ኡሱፑን ሳተ ሄራን ፆሳ ዎሳናዉ ጰፅሮስ ፖቀ ቦላ ከይስ።

¹⁰ እ ኮሻትድ ካ ማናዉ ኮይስ፥ ሽን ካ ካፅሽን እ ቆንጨ በእስ።

¹¹ ሳሎይ ዶየትን፥ ግታ አፍላ ዳንያባይ ኦይዱ ባጋራ ኦይከትድ ዎሽን እ በእስ።

¹² እያን ኦይዱ ቶሆራ ደእያ መሄት፥ ዎራ ዶአት፥ ኡሎራ ጎሸትያ መተትነ ሳሎ ካፎት ኡባይ ደኤስ።

¹³ ሄ ዎደ፥ “ጰፅሮሳ፥ ደንዳ ኤቃዳ ሹካዳ ማ” ግያ ቃላይ እያኮ ይስ።

¹⁴ ሽን ጰፅሮስ፥ “ጎዳዉ፥ አካይ! ታ ቱናባ ኡባራካ ማ ኤርከ” ያግስ።

¹⁵ ቃስ፥ “ፆሳይ ጌሽዳይሳ ኔኒ ቱና ጎፓ” ግያ ቃላይ ናምአን እያኮ ይስ።

¹⁶ ሄስካ፥ ሄ ቶሆ ሀንዳፐ ጉየ ሄ ግታ አፍላ ዳነይስ ኤለስድ ፑደ ሳሎ ኤከትስ።

¹⁷ ጰፅሮስ ባ በእዳ ቆንጨ ብርሸይ፥ “አይ ግዳንደሻ?” ግድ ባ ዎዛናን ቆፕሽን፥ ቆርነልዮስ ኪትዳ አሳት ስሞና ሶ ኦይች ደምድ ካረን ኤቅዶሶና።

¹⁸ ባንታ ቃላ ቁ ኦድ፥ “ጰፅሮሳ ጌተትያ ስሞና ጌተትያ እማይ ሀይሳን ደኢ?” ያግድ ኦይችዶሶና።

¹⁹ ጰፅሮስ ቆንጨን በእዳባ ቆፋ ቦላ ደእሽን፥ ጌሻ አያናይ እያኮ፥ “ሄኮ፥ ሄ አሳት ነና ኮዮሶና።

²⁰ ደንዳዳ ዎ፥ ታኒ ኤንታ ኪትዳ ግሾ ስና ኤንታራ ባ” ያግስ።

²¹ ጰፅሮስ አሳታኮ ዎድ፥ “ህንተ ኮየይ ታና፤ አይስ ይደቲ?” ያግስ።

²² ኤንቲ ዛሪድ፥ “ኑና ማቶ ሀላቃይ ቆርነልዮስ ኪትስ። እ ፅሎ፥ ፆሳ ጎይንያ አስነ አይሁደ አሳ ኡባን ዳሮ ቦንቸትዳ አስ። ቆርነልዮስ፥ ነና ባ ሶ ኤህስድ ቃላ ኔፐ ስአና መላ ጌሻ ኪታንቾይ እያዉ ኦድስ” ያግዶሶና።

²³ ጰፅሮስ አሳታ ሶ ገልስድ ሞክስ። ዎንተ ጋላስ፥ ደንድድ ኤንታራ ብስ። ዮጰ ካታማን ደእያ አማነይሳታፐ እሶት እሶት እያራ እስፈ ብዶሶና።

²⁴ ዎንተ ጋላስ፥ ቅሳረ ጋክዶሶና። ቆርነልዮስ ባ ዳቦታነ ባ ማታ ላገታ እስፈ ፄግ ሺሽድ፥ ጰፅሮሳ ናጌስ።

²⁵ ጰፅሮስ ሶ ገላና ሀንሽን፥ ቆርነልዮስ እያራ ጋሄትድ እያ ስንን ኩንድድ እያዉ ጎይናናዉ ኮይስ።

²⁶ ሽን ጰፅሮስ፥ “ደንዳ፥ ታካ ታ ሁጰን ነ መላ አሰ” ያግድ እያ ደንስ።

²⁷ ጰፅሮስ ቆርነልዮሳራ ኦደትሸ ሶ ገልያ ዎደ ዳሮ አሳይ ሺቅዳይሳ ደምስ።

²⁸ እ አሳኮ፥ “አይሁደ አስ ሀራ ደረራ እስፋናዉ ዎይኮ ጋሄታናዉ ዎጋ ግዶናይሳ ህንተ ኤሬታ። ሽን ታኒ ኦናካ ቱና ዎይኮ ጌሽ ግደና ጎና መላ ፆሳይ ታና በስስ።

²⁹ ሄሳ ግሾ፥ ህንተ ታኮ ኪትን እፆይ ባይና ያስ። ሀእ ታና አይስ ፄግስዳኮ ታዉ ኦድተ” ያግስ።

³⁰ ቆርነልዮስ፥ “ታኒ ሀች ኦይዱ ጋላሳፐ ካሰ ሀኖደ ኡዱፉን ሳተ ዎሳ ዎስሽን፥ ጶልያ ማኦ ማእዳ አስ ታ ስንን ኤቅስ።

³¹ እ ታኮ፥ ‘ቆርነልዮሳ፥ ፆሳይ ነ ዎሳ ስእስ፥ ኔኒ ማንቆታ ማድዳይሳካ ሀሳይስ።

³² ህዛ፥ አሰ ዮጰ ኪታዳ፥ ስሞን ጰፅሮሳ ገይሳ ፄግሳ። ስሞን ጰፅሮስ ስሞና ጌተትያ ጋልባ ሃሽያ ኡራ ሶን አባ ዶናን ሲራትስ’ ያግስ።

³³ ሄሳ ግሾ፥ ታኒ ኔኮ ኤለሳዳ ኪታስ፤ ነ ሎኦ ያዳሳ። ህዛ፥ ፆሳይ ነና ኪትዳባ ኡባ ስአናዉ ሀእ ኑኒ ኡባይ ሀይሳን ጎዳ ስንን ደኦስ” ያግስ።

ጰፅሮሳ ሃሳያ

³⁴ ካልድካ፥ ጰፅሮስ፥ “ፆሳይ አሳ ሶምኦ በእድ አሰ አሳፐ ሻከና።

³⁵ ሽን አሰ ኡባ ኦና ግድኮካ ባዉ ያየይሳነ ፅሎ ኦሶ ኦይሳን ፆሳይ ኡፋይተይሳ ታኒ ቱማ አኬካስ።

³⁶ ፆሳይ፥ ኡባ ጎዳ ግድዳ የሱስ ክርስቶሳ ባጋራ ሳሮተ ኦድሸ ሀ ዎንገላ እስራኤለ አሳስ ኪትዳይሳ ህንተ ኤሬታ።

³⁷ ዮሃንስ ፅንቃተባ ጋልላን ሳባክዳ ዎድያፐ ዶምድ ይሁዳ ቢታ ኡባ ጋካናዉ ሀንዳባ ህንተ ኤሬታ።

³⁸ ፆሳይ ናዝረተ የሱሳስ ጌሻ አያናነ ዎልቃ እሚስ። ፆሳይ እያራ ደእያ ግሾ ሎኦባ እ ኦሸ ፃላሄ ኩሸን ሃረትዳ ኡባ ፓሸ ዩይስ።

³⁹ “አይሁደ ቢታንነ የሩሳላመን እ ኦዳ ኡባባስ ኑኒ ማርካታ። ኤንቲ ማስቃልያ ቦላ ካቅድ እያ ዎዶሶና።

⁴⁰ ሽን ፆሳይ ሄን ጋላሳን ሀይቆፐ እያ ደንድ አሳስ ቆንጫና መላ ኦስ።

⁴¹ ሄ ቆንጨይ ፆሳይ ኮይሮ ዶርዳ ማርካታሳፈ አትሽን፥ አሳ ኡባሳ ግደና። እ ሀይቆፐ ደንድዳፐ ጉየ እያራ ምዳነ ኡይዳ።

⁴² ፆሳይ ዎንገላ አሳስ ኑኒ ኦዳና መላነ ፓፃ ደኤይሳታ ቦላነ ሀይቅዳይሳታ ቦላ ፕርዳናዉ ሹመትዳይ የሱሳ ግደይሳ ማርካታና መላ ኑና ኪትስ።

⁴³ ፆሳይ እያ አማንያ ኡባ ናጋራይ፥ እያ ሱንን አቶ ጌተተይሳ ናበት ማርካቶሶና” ያግስ።

⁴⁴ ጰፅሮስ ቡሮ ሄ ኦዳ ኦንጎናሽን ቃላ ስእያ ኡባ ቦላ ጌሻ አያናይ ዎስ።

⁴⁵ ጰፅሮሳራ ዮጰፈ ይዳ አማንያ ቃፃረትዳ አይሁደ ኡባይ፥ አይሁደ ግዶናይሳት ቦላ ጌሻ አያናይ ጉክዳ ግሾ ማላለትዶሶና።

⁴⁶ ጋሶይካ፥ ኤንቲ ዱማ ዱማ ዶናን ኦደትሽንነ ፆሳ ግታተ ሳቢሽን ስእዶሶና። ሄ ዎደ ጰፅሮስ ዛሪድ፥

⁴⁷ “ሀይሳቲ ቃስ ኑ መላ ጌሻ አያና ኤክዳይሳት ፃማቀቶና መላ ሃ ድጋናይ ኦኔ?” ያግስ።

⁴⁸ ኤንቲ የሱስ ክርስቶሳ ሱንን ፃማቀታና መላ ኤንታ ኪትስ። ሄሳፈ ጉየ፥ ኤንቲ ባንታራ ጉ ጋላስ ኡታና መላ ጰፅሮሳ ዎስዶሶና።