ሃዋሬታ ኦሱዋ 1 - ጌሻ ማፃፋ

ማርካተስ ጊገተ

^1-2 ተዎፍሎሳ፥ የሱሲ ባ ኦሱዋ ኦይክዳ ዎደፐ ሳሎ ብዳ ጋላሳ ጋካናዉ፥ ኦዳባነ ታማርስዳባ ኡባ ታኒ ታ ኮይሮ ማፃፋን ፃፋስ። ሳሎ ባናፐ ስን እ ባ ዶርዳ ሀዋረታ፥ ጌሻ አያናን ኪትስ።

³ እ ባ ዋያፐ ጉየ፥ ሀይቆፐ ደንድዳይሳ ስይ ባይና ቆንጭስድ ኤንታዉ ባና በስስ። ኦይታሙ ጋላስ ኤንታዉ ቆንጭድ ፆሳ ካዎተባ ኤንታ ታማርስስ።

⁴ እስ ዎደ ኤንታራ እስፈ ደእሸ ኤንታ ሀይሳዳ ያግድ ኪትስ፦ “ታ ህንተዉ ኦድዳ፥ ታ አዋይ እማና ግዳ ኡፋይሳ ቃላ ናግተፐ አትሽን፥ የሩሳላመፐ ከዮፕተ።

⁵ ዮሃንስ ሃን ፃማቅስ፥ ሽን ጉ ዎደፐ ጉየ፥ ጌሻ አያናን ህንተ ፃማቀታና” ያግስ።

⁶ ሀዋረት እስፈ የሱሳራ ሺቅዳ በሳን፥ “ጎዳዉ፥ እስራኤለታስ ነ ካዎተ ዛራና ዎደይ ሀይሴ?” ያግድ ኦይችዶሶና።

⁷ የሱሲ ኤንታኮ፥ “ታ አዋይ ባ ማታን ኦያ ዎደነ ላይ ህንተ ኤራናዉ ዳንዳኤከታ።

⁸ ሽን ጌሻ አያናይ ህንተ ቦላ ዎያ ዎደ፥ ህንተ ዎልቃን ኩማና። ያን ስሚድ፥ የሩሳላመን፥ ይሁዳ ቢታ ኡባን፥ ሳማረንነ ሳአ ጋፃ ጋካናዉ ታዉ ማርካታ ግዳና” ያግስ።

⁹ ሄሳ ግዳፐ ጉየ ኤንቲ ፄልሽን፥ ቁ ቁ ግድ፥ ሳሎ ብን፥ እያ ኤንታ አይፈፐ ሻር ገንስ።

¹⁰ የሱሲ ብያ ዎደ ኤንቲ ሳሎ ትሽ ኦድ ፄልሽን፥ ቦ ማኦ ማእዳ ናምኡ አሳት አኬኮና ኤንታ ማታን ኤቅድ፥

¹¹ “ጋልላ አሳቶ፥ ሳሎ ፄልሸ፥ ህንተ አይስ ኤቅደቲ? ሀ ህንተ በእሽን ሳሎ ብዳ የሱሲ ሄሳዳካ ስሚድ ያና” ያግዶሶና።

ይሁዳ በሳን ማትያሳ ዶረተ

¹² ሄሳፈ ጉየ፥ ሀዋረት ሻማሆ ዙማፐ የሩሳላመ ስምዶሶና። ሻማሆ ዙማይ የሩሳላመስ ማታን ደኤስ።

¹³ ኤንቲ የሩሳላመ ገልድ፥ ባንታ ደእያ በሳ፥ ፖቅያ ቦላ ከይዶሶና። ኤንትካ፦ ጰፅሮሳ፥ ዮሃንሳ፥ ያይቆባ፥ እንድርያሳ፥ ፍልጶሳ፥ ቶማሳ፥ ባርተለሞሳ፥ ማቶሳ፥ እልፍዮሳ ናአ ያይቆባ፥ ባ ቢታስ ምሸትያ ስሞናነ ያይቆባ ናአ ይሁዳ።

¹⁴ ሀይሳቲ ኡባይ ማጫሳታራ፥ የሱሳ አየ ማይራምራነ የሱሳ እሻታራ ኡባይ እስ ዎዛናን ግድድ ምንድ ዎሶሶና።

¹⁵ ሄ ዎደ፥ ጰፅሮስ ፄታነ ላታማ ግድያ አማንያ አሳይ ሺቅዳ በሳን ደንድ ኤቅድ፥ ሀይሳዳ ያግስ፦

¹⁶ “አሳዉ፥ የሱሳ ኦይክዳይሳታ ካለዳ ይሁዳባ፥ ጌሻ አያናይ ካሰ ዳዊታ ዶናን ኦድዳ ፆሳ ቃላይ ፖለታናዉ በሴስ።

¹⁷ ይሁድ ኑራ እስፈ ሀ ኦሱዋ ኦናዉ ዶረትዳ አስ።”

¹⁸ ሽን ይሁድ ባ ኢታ ኦሱዋን ደምዳ ሚሸን ጋደ ሻምስ። እ ስን ጉ ኩንድን፥ እያ ኡሎይ ዳከትስ፤ እያ ማራጨ ኡባይ ካረ ከይስ።

¹⁹ ይሁዳ ቦላ ሀንዳባ የሩሳላመን ደእያ አሳ ኡባይ ስእስ። ሄሳ ግሾ፥ ሄ ጋድያ ባንታ ቃላን አከልዳማ (ሱ ጋደ) ግድ ፄግዶሶና።

²⁰ “ሄስካ ማዝሙረ ማፃፋን፥ “ ‘እያ ኬይ ካሎ አቶ፤ ኦንካ እያን ደኦፖ። ቃስ እያ ሹማተ ሀር ኤኮ’ ጌተትድ ፃፈትስ።

²¹ “ሄሳ ግሾ፥ ጎዳ የሱሲ ኑ ግዶን ስመረትዳ ዎደ ኡባን ኑራ ደኤይሳታፐ፥

²² ቃስ ፃማቅያ ዮሃንሳ ዎደፐ ዶምድ ጎዳ የሱሲ ሳሎ ብዳ ጋላስ ጋካናዉ ኑራ ደኤይሳታፐ እስ አስ እያ ደንዱዋስ ኑራ ማርካ ግዳናዉ በሴስ” ያግስ።

²³ ሄሳ ግሾ፥ አሳይ ዶሩዋስ ዮስፆሳ ዎይኮ ባርሳባሳ ጌተትያ ዮሰፋነ ማትያሳ ናምአ ሺሽዶሶና።

²⁴ ሄሳፈ ጉየ፥ ፆሳ ዎስሸ፥ “አሳ ኡባ ዎዛና ኤርያ ጎዳዉ፥ ሀ ናምአታፐ ነ ኦና ዶርዳኮ ኑና በሳ።

²⁵ ይሁድ ባ በሳ ብድ፥ አግዳ ኦሱዋነ ሀዋረተ ኦሱዋ ኤካና መላ ሀይሳታፐ ኑስ ቆንጭሳ” ያግዶሶና።

²⁶ ኤንታ ቦላ ሳማ የግዶሶና። ሳማይ ማትያሳ ቦላ ዎን፥ ማትያስ ታማነ እስ ሀዋረታ ቦላ ጉዠትስ።