2 Taarike 36 - ጌሻ ማፃፋ

ይሁዳ ካዋ እዮአካዛ

¹ ሄ ቢታ አሳይ እዮስያሳ ናኣ እዮአካዛ ዶርድ እያ አዋ በሳን የሩሳላመን ካዎዶሶና።

² እዮአካዝ ካዎትያ ዎደ እያዉ ላይ ላታማነ ሄ፤ እ የሩሳላመን ሄ አጌና ካዎትስ።

³ ግብፀ ካዎይ እዮአካዛ ካዎተፈ ዎስ፤ ሄ ሙኩሉነ ኦይዱ ፄቱ ክሎ ግራመ ብራነ ሀስታማነ ኦይዱ ክሎ ግራመ ዎርቃ ይሁዳ አሳይ ጊራና መላ ኦስ።

⁴ ግብፀ ካዎይ፥ ናኮይ፥ እዮአካዛ እሻ ኤልያቄመ ይሁዳ ቦላነ የሩሳላመ ቦላ ካዎድ እያ ሱን እዮአቄማ ያግድ ላምስ። ያትድ እዮአቄማ እሻ እዮአካዛ ግብፀ ኤፍስ።

ይሁዳ ካዋ እዮአቄማ

⁵ እዮአቄም ካዎትያ ዎደ እያዉ ላይ ላታማነ እቻሻ፤ እ የሩሳላመን ታማነ እስ ላይ ካዎትስ። ባ ጎዳ ፆሳ ስንን ኢታባ ኦስ።

⁶ ባብሎነ ካዎይ ናቡካዳናፆር እያ ኦልድ፥ ባብሎነ ኤፋናዉ ናሰ ብራታ ሳንላታን ቃችስ።

⁷ ቃስ ናቡካዳናፆር ፆሳ ኬ ሚሽያ ኤክድ ባብሎነ ኤፍድ፥ ባ ካዎ ጋን ዎስ።

⁸ እዮአቄም ኦዳ ሀራባይ፥ ኦዳ ቱናባይነ ኦዳ ኢታባ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ። እ ሀይቅን፥ እያ በሳን እያ ናአይ ዮአክን ካዎትስ።

ይሁዳ ካዋ ዮአክና

⁹ ዮአክን ካዎትያ ዎደ እያዉ ላይ ሆስፑና፤ እ የሩሳላመን ሄ አጌናነ ታሙ ጋላስ ካዎትስ። እ ጎዳ ስንን ኢታባ ኦስ።

¹⁰ ላይ ላመን፥ ካዎይ ናቡካዳናፆር አሰ ኪትድ፥ ዮአክናነ ፆሳ ኬን ደእያ አልኦ ሚሸታ እያራ እስፈ ባብሎነ ኤህስ። ያትድ እያ አዋ እሻ ሰደቅያሳ ይሁዳነ የሩሳላመ ቦላ ካዎስ።

ይሁዳ ካዋ ሰደቅያሳ

¹¹ ሰደቅያስ ካዎትያ ዎደ እያዉ ላይ ላታማነ እስኖ፤ እ የሩሳላመን ታማነ እስ ላይ ካዎትስ።

¹² ባ ጎዳ ፆሳ ስንን ኢታባ ኦስ፤ ቃስ ጎዳ ቃላ ኦድያ ናብያ ኤርምያሳ ስንን ባና ካዉሽቤና።

¹³ ሰደቅያስ፥ አማነታና መላ ባና ፆሳ ሱንን ጫቅስዳ ናቡካዳናፆራ ቦላ ማካልስ። ጎዳ፥ እስራኤለ ፆሳኮ ስሞና እፅስ፤ ባ ዎዛና ፆሳ ቦላ ምንስ።

¹⁴ ቃስ፥ ይሁዳ አሳይነ ኤንታ ካለያ ካህነት፥ አማነቶና እፅዶሶና። ኤንቲ ሀራ ካዎተት ኦያ እፀትዳ ኦሶታ ካልድ፥ ጎዳይ የሩሳላመን ጌሽዳ ፆሳ ኬ ቱንስዶሶና።

የሩሳላመ ኩንደ

¹⁵ ጎዳይ፥ ኤንታ ማይዛታ ፆሳይ ባ አሳስነ ባ ኬስ ቃትያ ግሾ፥ ባ ናበታ ኤንታዉ ዛር ዛር ኪትስ።

¹⁶ ሽን ጎዳ ሀንቆይ ኤንታ ቦላ ዎና ጋካናዉነ ኤንቲ ከስ ኤክያሶ ያና ጋካናዉ ፆሳ ኪታንቾታ ቀልቅስዶሶና፤ እያ ቃላ ካዶሶና፤ ናበታ ቦላ ሚጭዶሶና።

¹⁷ ሄሳ ግሾ፥ ጎዳይ ካልዳወታ ካዋ ኤንታ ቦላ ደንን፥ እ ኤንታ ያላጋ አደታ ፆሳ ኬን ማሻን ዎስ። እ ያላጋ አደታስ ዎይኮ ጌላኦታስ ዎይኮ ጭማታስ ዎይኮ ጬጋታስ ቃቶና ዉርስስ። ፆሳይ ኤንታ ኡባ ናቡካዳናፆራ ኩሸን አድ እሚስ።

¹⁸ ባብሎነ ካዎይ ፆሳ ኬን ደእያ ሚሸታ ኡባ፥ ግታነ ጉ፥ ፆሳ ኬን ደእያ ቡቁራ፥ ካዎ ቡቁራነ እያ ሞርናታ ቡቁራ ኡባ ኤክድ ባብሎነ ኤፍስ።

¹⁹ ኤንቲ ፆሳ ኬ ታማን ፁግድ፥ የሩሳላመ ግምበ ድርሳ ላልዶሶና። ካዎ ጋዋ ታማን ፁግድ፥ ያን ደእያ አልኦ ሚሸ ኡባ ይስዶሶና።

²⁰ ማሻፈ አትዳይሳታ ካዎይ ድእድ ባብሎነ ኤፍስ። ፋርሰ ካዎተይ ደንዳና ጋካናዉ ኤንቲ እያዉነ እያ ናይታስ አይለ ግድዶሶና።

²¹ ጎዳይ ናብያ ኤርምያሳ ባጋራ ኦድዳ ቃላይ ፖለትስ። ዉርሰን ቢታይ ላፑን ታሙ ላይ አስ ባይና በሲ ግድድ ሸምፕስ። ቢታይ ሳምባታ ሸምፖ ደምስ።

²² ፋርሰ ካዎይ ቅሮስ ካዎትዳ ኮይሮ ላይን ናብያ ኤርምያሳ ባጋራ ጎዳይ ኦድዳይሳ ፖልስ። ፋርሰ ካዎይ ቅሮስ ባ ካዎተን ኡባን ሀይሳዳ ያግድ አዋጃና መላነ ፃፍድ ዎና መላ ጎዳይ እያ አያና ደንስ።

²³ ፋርሰ ካዎይ ቅሮስ፥ “ጎዳይ፥ ሳሎ ፆሳይ ሀ ሳኣ ካዎተታ ኡባ ታዉ እሚስ። ቃስ ይሁዳን ደእያ የሩሳላመን ታ እያዉ ፆሳ ኬ ኬፃና መላ ታና ሹምስ። ፆሳ አስ ግድዳ ኦንካ ያ ቦ። ጎዳይ እያ ፆሳይ እያራ ግዶ” ያግስ።