2 Taarike 24 - ጌሻ ማፃፋ

ይሁዳ ካዋ እዮኣሳ

¹ እዮኣስ ካዎትያ ዎደ እያዉ ላይ ላፑና፤ እ የሩሳላመን ኦይታሙ ላይ ካዎትስ። እያ አየ ሱንይ ሳቦ፤ እያ በርሳበ ማጫስ።

² ካህነይ ዮዳሄይ ደእዳ ላይ ኡባን እዮኣስ ጎዳ ስንን ሱረባ ኦስ።

³ ዮዳሄይ ካዋ እዮኣሳስ ናምኡ ማቾ እምን ኤንቲ እያዉ አደ ናይታነ ማጫ ናይታ የልዶሶና።

⁴ ጉ ዎደፐ ጉየ እዮኣስ ፆሳ ኬ ኦራናዉ ቆፕስ።

⁵ እዮኣስ ካህነታነ ሌወታ ሺሽድ፥ “ይሁዳ ብድ ህንተ ፆሳ ኬ ላይን ላይን ኦራናዉ እስራኤለ ኡባፈ ሚሸ ሺሽተ፤ ሄሳ ሀእ ኤለስድ ኦተ” ያግስ። ሽን ሌወት ኤለስድ ኦቦኮና።

⁶ ሄሳ ግሾ፥ ካዎይ ካህነ ሀላቃ ዮዳሄ ፄግድ፥ “ጎዳ አይለይ ሙሰይነ የሩሳላመ አሳይ ፆሳ ዱንካንያ ኦሱዋስ ከሳና መላ ኪትዳ ጊራ የሩሳላመፐነ ይሁዳፐ ሺሻና መላ ሌወታ አይስ ኪታብኪ?” ያግስ።

⁷ ሄ ዎደ ኢታ ማጫሰ ጎቶላ ናይት ፆሳ ኬ መንዶሶና። ኤንቲ ጎዳ ኬን ደእያ ጌሻ ሚሸ ኡባ ኤክድ ባኣለ ጎይናናዉ ጎኤትዶሶና።

⁸ ካዎይ ሌወታ ኪትን፥ ኤንቲ ሳፅነ ጊግስድ፥ ፆሳ ኬ ፐንግያፈ ካረ ባጋራ ዎሶና።

⁹ ፆሳ አይለይ ሙሰይ መላ ቢታን ደእሸ፥ እስራኤለ አሳፐ ሺሻና መላ ኪትዳ ጊራ ጎዳስ ኤሀና መላ ይሁዳንነ የሩሳላመን ሌወት አዋጅዶሶና።

¹⁰ ሀላቃትነ አሳ ኡባይ ኡፋይትድ ሳፅነይ ኩማና ጋካናዉ ጊራ የግዶሶና።

¹¹ ሳፅነይ ሌወታ ባጋራ ካዎ ሞርናታኮ ጋክን ሳፅንያ ግዶን ዳሮ ሚሸይ ዳጋየትዳይሳ በእዳ ዎደ ኡባን ካዎ ፃፈይነ ካህነ ሀላቃይ ይድ ሳፅንያፐ ሚሸ ከስድ ሳፅንያ በሳን ዛር ዎሶና። ኤንቲ ኡባ ዎደ ሄሳ ኦድ ዳሮ ሚሸ ዳጋይዶሶና።

¹² ሄ ሚሽያ ካዎይነ ዮዳሄይ ፆሳ ኬ ኦሱዋ ኦና መላ ሹመትዳ አሳታስ እሞሶና። ኤንቲ ፆሳ ኬ ኦራናዉ ሹቹ ማሰይሳታ፥ አናፀታ፥ ብራታነ ናሰ ብራታ ኦሳንቾታ ቃፃርዶሶና።

¹³ ኦሳንቾት ፆሳ ኬ ምን ኦድ ካሰይሳዳ ኦራዶሶና።

¹⁴ ፆሳ ኬ ኦራ ኦሶይ ዉርዳ ዎደ ፓላህዳ ዎርቃነ ብራ ካዋኮነ ዮዳሄኮ ኤህዶሶና። ኤንቲ ሄ ዎርቃነ ብራ ፆሳ ኬ ጋ ኦሱዋስ ጎኤትያ ሚሸታ፥ ፁሳ ያርሾስ ሀንያ ሳነታነ ሀራ ዱማ ዱማ ሚሸታ ኦዶሶና። ዮዳሄይ ደእዳ ላይን ኡባን ፆሳ ኬን ፁሳ ያርሾይ ያርሸቴስ።

¹⁵ ዮዳሄይ ዳሮ ጭምድ ሀይቅስ፤ እ ሀይቅያ ዎደ እያዉ ላይ ፄታነ ሀስታማ።

¹⁶ ዮዳሄይ እስራኤለን ፆሳስነ ፆሳ ኬስ ሎኦባ ኦዳ ግሾ ዳዊታ ካታማን ካዎታ ዱፎን እያ ሞግዶሶና።

እዮኣሳ ኢታተ

¹⁷ ዮዳሄይ ሀይቅዳፐ ጉየ ይሁዳ ሀላቃት ይድ ካዋ ስንን ጉፋንዶሶና፤ ካዎይ ኤንታ ኦይሻ ስእስ።

¹⁸ ኤንቲ ጎዳ ባንታ ማይዛታ ፆሳ ኬ አግድ፥ አሼር ምስለታነ ኤቃታ ጎይንዶሶና። ኤንቲ ቆሁዋ ግሾ ይሁዳ ቦላነ የሩሳላመ ቦላ ጎዳ ሀንቆይ ዎስ።

¹⁹ ኤንታ ዛራና መላ ጎዳይ ናበታ ኤንታኮ ኪትስ። ናበት ኤንታዉ ማርካትዶሶና፤ ሽን ኤንቲ ስኦና እፅዶሶና።

²⁰ ሄሳፈ ጉየ፥ ካህንያ ዮዳሄ ናኣ ዛካርያሳ ቦላ ፆሳ አያናይ ዎን ዛካርያስ አሳ ስንን ኤቅድ፥ “ፆሳይ፥ ‘ህንተ ጎዳ ኪታ አይስ መንቲ? ሄስ ህንተዉ ኢታ። ህንተ ጎዳ አግዳ ግሾ እካ ህንተና አግስ’ ” ያጌስ።

²¹ ኤንቲ እያ ቦላ ማቀትዶሶና። ካዎይ ኤንታ ኪትን፥ ፆሳ ኬ ዳባባን፥ እያ ሹቻን ጫድድ ዎዶሶና።

²² ካዎይ እዮኣስ ዛካርያሳ አዋይ ዮዳሄይ እያዉ ኦዳ ኬሀተ ሀሳዮና አግድ እያ ናኣ ዛካርያሳ ዎስስ። ዛካርያስ ሀይቅሸ፥ “ጎዳይ ሀይሳ በኦ፤ እ ሀሎ ከዮ” ያግስ።

²³ ላይ ላመን፥ ሶረ ኦላንቾት እዮኣሳ ኦላናዉ ይዶሶና። ይሁዳነ የሩሳላመ ኦልድ ሀላቃታ ኡባ ዎድ፥ ድኡዋ ኤክድ ዳማስቆን ደእያ ባንታ ካዋስ የድዶሶና።

²⁴ ሶረ ኦላንቾት ታይቦን ጉ፤ ሽን ይሁዳ አሳይ ጎዳ ባንታ አዋታ ፆሳ አግዳ ግሾ፥ ጎዳይ ዳሮ ግድዳ ኤንታ ኦላንቾታ ሶረ ኦላንቾታ ኩሸን አድ እሚስ። ኤንቲ ሀይሳዳ ኦድ እዮኣሳ ቦላ ፕርድዶሶና።

²⁵ ሶረ ኦላንቾት እያፐ ሻከትያ ዎደ እዮኣስ ዳሮ ማዱንፅድ ደኤስ። ካህንያ ዮዳሄ ናኣ ሱ ግሾ እያ ሹማት እያ ቦላ ማቀትድ፥ እ ባ ሂፃን ዝንእዳሽን ዎዶሶና። እ ሀይቅን ዳዊታ ካታማን ሞግዶሶና፤ ሽን ካዎታ ዱፎን እያ ሞግቦኮና።

²⁶ እዮኣሳ ቦላ ማቀትዳይሳት አሞነ ማጫሰ ስማት ናኣ ዛባዳነ ሞአበ ማጫሰ ስማርት ናኣ ዮዛባታ።

²⁷ ሄኮ፥ እዮኣሳ አደ ናይታ ታርከይ፥ እያዉ ኦደትዳ ትንብተይነ እ ፆሳ ኬ ኦራዳባይ ካዎታ ታርከ ማፃፋን ፃፈትድ ደኤስ። እዮኣስ ሀይቅን እያ በሳን እያ ናአይ አማስያስ ካዎትስ።