2 Sameela 23 - ጌሻ ማፃፋ

ዳዊታ ዉርሰ ሃሳያ

¹ ሀይስ ዳዊታ ዉርሰ ሃሳያ። እሰየ ናኣ ዳዊታ ዉረሰይ ሀይሳ፤ እ ያይቆባ ፆሳን ትየትዳይሳ፤ ፆሳይ እያ ቁ ቁ ኦዳይሳ፤ እስራኤለን ሎኦ ማዝሙረ የፀይሳ።

² “ጎዳ አያናይ ታ ባጋራ ኦዴስ፤ እያ ቃላይ ታ እንፃርሳን ደኤስ።

³ እስራኤለ ፆሳይ ታዉ ኦድስ፤ እስራኤለ ዛላይ ሀይሳዳ ያግስ። ‘ፅሎተን ሃርያ ካዎይ፥ ፆሳ ያሻን አይስያ ካዎይ፥

⁴ እ ሻር ባይና ጉራ ዶልያ ፃልቀ ፖኦ መላ። እ እር ቡክድ አን፥ ቢታፈ ማታ ዶልስያ ቦቃልሳ መላ።’

⁵ ቱማ ታ ኬ አሳይ ፆሳ ስንን ሱረ፤ እ ታራ መርናዉ ጫቅስ፤ ሀ ጫቆይ ጊግድ፥ ምንድነ ናገትድ ደኤስ። ፆሳይ ታዉ ፆኖ እማና፤ ታ አሞትዳባ ኡባ እ ቱማ ፖላና።

⁶ ሽን ኢታ አሳት ኡባይ ኩሸን ሺሻናዉ ሀኖና አጉንዳ ዎራ ሆለታና።

⁷ አጉን ቦችያ ኦንካ ዋለ ዎይኮ ፃምአ ባ ኩሸን ኦይካናዉ ኮሼስ፤ ሄስ ባ ደእያ በሳን ኤፃና” ያግስ።

ዳዊታራ ደእያ ምኖ አሳታ

⁸ ምኖ ዳዊታ አሳታ ሱንይ ሀይሳፈ ካልድ ደኤይሳታ። ኮይሮይ፥ ታክሞና የለታ ግድዳ ዮሴብ-በስትቤተ ጌተቴስ፤ እ ሄታ ሀላቃ፤ እስ ቶሆ ኦላን ባ ቶራን ሆስፑን ፄቱ አስ ዎስ።

⁹ ሄታፐ እሶይ፥ እያ ካልያ ናምአንይ፥ አሆሀ ሼሽ ግድዳ ዶዶ ናኣ አላዛራ። እስ ጋላስ እነ ዳዊቲ ኦላስ ሺቅዳ ፍልስፄመታ ማንድዶሶና፤ እስራኤለ አሳይ ጉየ ስምስ።

¹⁰ ሽን እ ባ በሳን ምን ኤቅድ፥ እያ ኩሸይ አርጋጭድ ማሻራ ኦይከታና ጋካናዉ ፍልስፄመታ ሾጭስ። ሄ ጋላስ ጎዳይ ግታ ፆኖ እሚስ። ኦላይ ኤቅን፥ ኦላንቾት አላዛራኮ ስሚድ ይዶሶና፤ ሽን ኤንቲ ሀይቅዳ ፍልስፄመታፐ ኦላ ማኦ ቃርዶሶናፐ አትሽን፥ ሀራባ ኦቦኮና።

¹¹ እያፐ ካለይ ቃስ አሮዳ የለታ ግድዳ አጋ ናኣ ሳማ። እስ ጋላስ ፍልስፄመት ምስረይ ኩምዳ ሾቃን፥ ሌህ ጌተትያ በሳን ሺቅን፥ እስራኤለት ኤንታ ስንፈ ባቃትዶሶና።

¹² ሽን ሳም ሾቃ ግዶን ሙርት ኤቅድ ኦለትስ። ፍልስፄመታ ዎስ፤ ሄ ጋላስ ጎዳይ ዎልቃማ ፆኖ እሚስ።

¹³ ካ ጫካ ዎደ ሀስታሙ ምኖ አሳታፐ ሄት አዱላማ ጎንጎሉዋ ዳዊታኮ ብዶሶና። ሄ ዎደ ፍልስፄመ ኦላንቾት ራፋይመ ዛንጋራን ዱንካንዶሶና።

¹⁴ ሄ ዎደ ዳዊቲ ሚፃን ደኤስ፤ ፍልስፄመ ኦላንቾታ ጩጋይ ቃስ ቤተለመን ኦላ ካምበ ደኤስ።

¹⁵ ዳዊቲ ሃ ኡያናዉ አሞትድ፥ “ቤተለመ ካታማ ፐንግያ ማታን ደእያ ኦላፐ ሃ ታና ኦነ ኡሻናይ” ያግስ።

¹⁶ ሀ ሄ ምኖ አሳት ፍልስፄመ ኦላንቾታ ጉታ ካንድ፥ ቤተለመ ካታማ ፐንገን ደእያ ኦላፈ ሃ ዱቅድ ዳዊታስ ኤህዶሶና። ሽን እ ኡዮና እፅድ፥ ጎዳ ስንን ትግድ፥

¹⁷ “አቤት ጎዳዉ፥ ሀይሳ ኡያናይስ ታፐ ሃኮ! ሀ ሃ ባንታ ሸምፑዋ ባይዝድ ኤህዳ አሳታ ሱ ግደኔ?” ያግድ ኡዮና እፅስ። ሀ ሄ ምኖ አሳት ሀይሳ ኦዶሶና።

¹⁸ ፃሩያ ናኣ እዮኣባ እሻይ አብስ ሀስታማታ ሀላቃ፤ እ ሄ ፄቱ አሳታ ባ ቶራን ኦልድ ዎስ፤ እካ ሄታዳ ኤረትስ።

¹⁹ እ ሀስታማታፐ አድ ቦንቸትዳ አስ፤ እ ሄታ መላ ኤረትዳ አስ ግዶና እፅኮካ ሀስታማታስ ሀላቃ።

²⁰ ቃብፅኤላ የለታ ግድዳ ዮዳሄ ናአይ ባናያስ ምኖ ኦሶ ኦዳ ግታ አስ። እ ናምኡ ኤረትዳ ሞአበ አሳታ ዎስ። እስ ዎደ ሻች ዎያ ጋላስ ኦላን ዎድ ጋሞ ዎስ።

²¹ ቃስ እስ ግታ ግብፀ አድያ ዎስ፤ ግብፀ አደይ ቶራ ኦይክስ፤ ሽን እ ፃምአ ኦይክድ እያኮ ብድ፥ እያ ኩሸፐ ቶራ ዳፍ ኤክድ፥ እያ ቶራራ እያ ዎስ።

²² ዮዳሄ ናአይ ባናያስ ሀይሳ ኦስ፤ እያ ሱንይ ሄታይሳዳ ኤረትስ።

²³ እ ሀስታማታ ግዶን ዳሮ ቦንቸትዳ አስ፥ ሽን እ ሄታ ታይቡዋን ዴና። ዳዊቲ እያ ባና ናግያ ዎታዳረታስ ቶራ ሞጮና ኦስ።

²⁴ ሄ ሀስታማታ ግዶን ደኤይሳት፥ እዮኣባ እሻ አሳሄላ፥ ቤተለመ የለታ ግድዳ ዶዳ ናኣ ኤልያና፥

²⁵ አሮዳ የለታ ግድዳ ሳማነ ኤልቃ፥

²⁶ ፋልፃ ያራ ግድዳ ሰለሳ፥ ታቆሀ አድያ ኤስካ ናኣ እራሳ፥

²⁷ አናቶተ የለታ ግድዳ አብኤዘራ፥ ኩሳ የለታ ግድዳ ማቡናያ፥

²⁸ አሆሀ ያራ ግድዳ ፃልሞና፥

²⁹ ናፆፋ የለታ ግድዳ ማህራያነ ባአና ናኣ ሄለባ። ብንያመ ቢታን፥ ግብአ የለታ ግድዳ ርባያ ናኣ እታያ፥

³⁰ ጵርአቶና የለታ ግድዳ ባናያ፥ ጋኣሳ ዛንጋራ ማታፐ ይዳ ህዳያ፥

³¹ አራባ የለታ ግድዳ አባልቦና፥ ባርሁማ አድያ አዝሞታ፥

³² ሻአልቦና የለታ ግድዳ ኤልያባ፥ አሳና ናይታ፥ ዮናታና፥

³³ አሮዳ የለታ ግድዳ ሳማነ ሻራ ናኣ አህኣማ፥

³⁴ ማእካ የለታ ግድዳ አሀስባያ ናኣ ኤልፋላፃ፥ ግሎ የለታ ግድዳ አክፆፈላ ናኣ ኤልኣማ፥

³⁵ ቃርመሎሳ የለታ ግድዳ ሄፅራ፥ አራባ የለታ ግድዳ ፓኣራ፥

³⁶ ሱባ የለታ ግድዳ ናታና ናኣ ይግኣላ፥ ጋደ የለታ ግድዳ ባና፥

³⁷ አሞነ የለታ ግድዳ ሰለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ የለታ ግድዳ ናህራያ፥

³⁸ ያትራ ያራ ግድያ እራያነ ጋሬባ፥

³⁹ ህተ አድያ ኦርዮና። ኤንቲ ኩመ ሀስታማነ ላፑና።