2 Sameela 18 - ጌሻ ማፃፋ

አበሰሎመ ሀይቁዋ

¹ ዳዊቲ ባራ ደእያ አሳ ታይብድ ሻላቃታነ ማቶ ሀላቃታ ኤንታ ቦላ ሹምስ።

² ዳዊቲ አሳ ሄ ጩጋን ሻክስ፤ እስ ጩጋ እዮኣብ፥ ናምአን ጩጋ እዮኣባ እሻይ፥ ፃሩያ ናአይ አብስ፥ ሄን ጩጋ ጋተ አደይ እታይ ኪቴስ። ካዎይ አሳኮ፥ “ቱማ ታ ህንተራ እስፈ ባና” ያግስ።

³ ሽን አሳይ፥ “ኔኒ ባናዉ በሰና! ኑኒ ባቃትያኮ ኤንቲ ኑና ኮዮኮና፤ ሀር አቶሽን ኑፐ ባጋይ ሀይቅያኮካ ኑባ ዉዳ ጎኮና። ሽን ኔኒ ነ ፃላላ ታሙ ሙኩሉፐ ዳራሳ። ሄሳ ግሾ፥ ኔኒ ካታማን ኡታዳ ኑስ ማዶ ኪትኮ ሎኦ” ያግስ።

⁴ ካዎይ፥ “ህንተና ሎእያባ ታ ኦና” ያግስ። ዳዊቲ ድርሳ ፐንግያ ማታን ኤቅድ፥ አሳ ኡባይ ፄታንነ ሙኩላን ሳልፕድ ከይሽን በእስ።

⁵ ካዎይ እዮኣባ፥ አብሳነ እታያ፥ “ታ ግሾ ግድ፥ ሄ ናአተ አድያ አበሰሎመ ቆሆፕተ” ያግድ ኪትስ። ካዎይ ሄሳ ሀላቃታስ ኦድያ ዎደ ኦላንቾት ኡባይ ስእዶሶና።

⁶ ዳዊታ ኦላንቾት እስራኤለታራ ኦለታናዉ ኤፍሬማ ዎራን ሳልፕዶሶና።

⁷ ሄ በሳን ዳዊታ ኦላንቾት እስራኤለ ኦላንቾታ ፆንዶሶና። ሄ ጋላስ ዳሮ አስ ዉርስ፥ ላታሙ ሙኩሉ አስ ሀይቅስ።

⁸ ኦላይ ጋፃረ ኡባ ጋክስ፤ ሄ ጋላስ ዎር ዉርስዳ አሳይ ማሽ ዉርስዳ አሳፐ ዳሮ።

⁹ አበሰሎመይ ቆፖና ደእሸ ዳዊታ አሳራ ጋሄትስ። አበሰሎመይ ባ ባቁሉዋ ቶግዳሽን ዳሻ ዎላ ጋርስ ባቁሎይ ገልን፥ አበሰሎመ ሁጰይ ምን ኦይከትስ። እ ቶግዳ ባቁሎይ እያ ቶሁዋ ጋርሳፈ ብን፥ አበሰሎመይ ጫርኮ ቦላ ካቃትድ አትስ።

¹⁰ አሳፐ እሶይ ሄሳ በእድ፥ “አበሰሎመይ እስ ዎላ ቦላ ካቀትዳይሳ ታ በአስ” ያግድ እዮኣባስ ኦድስ።

¹¹ እዮኣብ ባዉ ኦድዳ አድያ፥ “ዬ፥ በአስ ጋይ? ያትን አይስ እያ ዎብኪ? ነ ሄሳ ኦዳባ ግድያኮ፥ ታኒ ነዉ ታሙ ብራ ሳንትመነ እስ ሳቀ እማናሽን” ያግስ።

¹² አደይ ዛሪድ፥ “ኔኒ ሙኩሉ ብራ ሳንትመ ታ ኩሸን ዎያኮካ ታኒ ካዋ ናኣ ቦላ ታ ኩሽያ ደንከ! ኑኒ ኡባይ ስእሽን፥ ካዎይ ነና፥ አብሳነ እታያ፥ ‘ታ ግሾ ግድ፥ ናአተ አበሰሎመ ቆሆፕተ’ ያግድ ኪትስ።

¹³ ታኒ ካዋ እፃዳ አበሰሎመ ዎዳባ ግድያኮ፥ ካዎይ ኡባ ስኤይሳዳ ሄሳ ስአናይስ አተና። ሄ ዎደ ኔኒ ሃክ ኤቅያ አሳፐ እሱዋ ግዳና” ያግስ።

¹⁴ እዮኣብ፥ “ታኒ ኔራ ኦደታሸ ዎደ ዉርስከ” ያግድ ሄ ቶራ ኤክድ፥ አበሰሎመይ ዎላ ቦላ ካቀትድ፥ ፓፃ ደእሽን ዎዛና አይፈን ጫድስ።

¹⁵ እዮኣባ ኦላ ሚሽያ ቶክያ ታሙ አሳት አበሰሎመ ዩሹዋ ተቅድ እያ ሾጭድ ዎዶሶና።

¹⁶ ሄሳፈ ጉየ፥ እዮኣብ ኦላ ኤሳናዉ ሞይዘ ፑንን አሳይ እስራኤለታ የደይሳ አግስ።

¹⁷ ኤንቲ አበሰሎመ ኤፍድ ዎራን ደእያ ግታ ኦላን የግድ፥ ግታ ሹቹ እያ ቦላ ዶርዶሶና። ሄ ዎደ እስራኤለ አሳ ኡባይ ባ ሶ ሶ ባቃትስ።

¹⁸ አበሰሎመይ ፓፃ ደእሸ፥ “ታ ሱንን ፄገትያ አደ ናእ ታዉ ባዋ” ያግድ፥ ባና ቆፍስያ ሹቹ ማስዳ ሀዉልተ ካዎ ዛንጋራን ኤስድ ሄ ሀዉልትያ ባ ሱንን ፄግስ። ሀች ጋካናዉ ሄ ሀዉልተይ “አበሰሎመ ሀዉልትያ” ጌተቴስ።

ዳዊቲ አበሰሎመስ ዬክስ

¹⁹ ሄሳፈ ጉየ፥ ሳዶቃ ናኣ አክማስ እዮኣባኮ፥ “እያ ሞርከታ ኩሸፐ ጎዳይ እያ አሽዳ ምሽራቹዋ ስሳናዉ ታኒ ካዋኮ ዎፃ ባዳ ኦዳና” ያግስ።

²⁰ እዮኣብ፥ “አካይ! ሀች ኔኒ ምሽራቾ ኦድያ ጋላስ ግደና፤ ሀራ ጋላስ ኦዳናዉ ዳንዳኣሳ። ካዋ ናአይ ሀይቅዳ ግሾ ሀች ኦዳናዉ ኮሸና” ያግስ።

²¹ እዮኣብ ቶጰ አስ ግድዳ እስ አድያ ፄግድ፥ “ባዳ፥ ነ በእዳባ ካዋስ ኦዳ” ያግስ። ሄ አደይ እዮኣባስ ጉፋን ዝግድ ዎፅስ።

²² ሳዶቃ ናአይ አክማስ ናምአን እዮኣባኮ፥ “አይብካ ሀኖ፤ ታኒ ሀ ቶጰ አድያ ጌዶ ዎፃና” ያግስ። እዮኣብ፥ “ታ ናአዉ፥ ነዉ ዎይቶይ ባይናባን አይስ ዎፃናዉ ኮያይ?” ያግስ።

²³ አክማስ፥ “አይብካ ሀኖ፤ ታኒ ዎፃናዉ ኮያይስ” ያግስ። እዮኣብ፥ “ያኮ ዎፃ” ያግስ። ሄሳ ግሾ፥ አክማስ ደምባ ኦግያ ኦይክድ ዎፅሸ ብድ ቶጰ አድያ የግድ አስ።

²⁴ ዳዊቲ ሶ ፐንግያፈነ ካረ ፐንግያፈ ግዶን ኡትዳሽን፥ ናግያ ኡራይ ኬ ቦላ ከይድ፥ እስ አደይ ባርካ ዎፅሸ የይሳ በእስ።

²⁵ ናግያ ኡራይ ካዋ ፄግድ ኦድስ። ካዎይ፥ “እ ባርካ ደእኮ፥ ምሽራቾ ኤክድ ዬስ” ያግስ። ዎፅያ አደይ ኤንታኮ ማትሸ ይስ።

²⁶ ናገይስ ሀራ ዎፅያ አስ በእድ ፐንግያ ናግያ አድያኮ፥ “ሀራ አስካ ባርካ ዎፅሸ ዬስ” ያግስ። ካዎይ፥ “ሀ አደይካ ቃስ ምሽራቾ ኤክድ ዬስ” ያግስ።

²⁷ ናገይስ፥ “ኮይሮ አድያ ዎይ ሳዶቃ ናኣ አክማሳ ዎ ታዉ ዳኔስ” ያግስ። ካዎይ፥ “እ ሎኦ አስ፤ እ ሎኦ ኦዳራ ዬስ” ያግስ።

²⁸ አክማስ ካዋ ፄግድ፥ “ኡባባይ ሎኦ!” ያግስ። ካዋ ስንን ጉፋን ዝግድ፥ “ታ ጎዳ፥ ካዋ ቦላ ባንታ ኩሽያ ደንዳ አሳታ ነዉ አድ እምዳ ጎዳይ፥ ነ ፆሳይ ጋላተቶ” ያግስ።

²⁹ ካዎይ፥ “ናአተይ፥ አበሰሎመይ ሳሮ?” ያግድ ኦይችስ። አክማስ፥ “እዮኣብ ታና ኪታና ሀንያ ዎደ ዎልቃማ ዋሶ ስአስ፥ ሽን እ አይበኮ ታኒ ኤራብከ” ያግስ።

³⁰ ካዎይ፥ “ያ ሺቃ ኤቃ” ያግን እ ሃክድ ኤቅስ።

³¹ ሄሳፈ ጉየ፥ ቶጰ አደይ ጋክድ፥ “ታ ጎዳዉ፥ ካዋዉ፥ ታ ነዉ ምሽራቾ ኦዳይስ! ነ ቦላ ደንድያ ኡባ ኩሸፐ ጎዳይ ሀች ነና አሽስ” ያግስ።

³² ካዎይ ቶጰ አድያኮ፥ “ናአተ አደይ አበሰሎመይ ሳሮ?” ያግድ ኦይችስ። ቶጰ አደይ፥ “ታ ጎዳዉ፥ ካዋዉ፥ ነ ሞርከትነ ነ ቦላ ኢታባ ኦናዉ ደንደይሳት ኡባይ ሄ ናአተ አድያዳ ሀኖና” ያግስ።

³³ ካዎይ ዳሮ አዛንስ፤ ፐንግያፈ ቆሞ ባጋን ደእያ ኬ ገልድ ዬክስ። ካዎይ፥ “ዪ፥ ታ ናአዉ አበሰሎመ ታሳ! ታ ናአዉ ታሳ! ነ ግሾ ታ ሀይቃርክና! ዪ፥ ታ ናአዉ አበሰሎመ ታሳ!” ያግድ ዬክስ።