2 Sameela 16 - ጌሻ ማፃፋ

ዳዊታነ ሲባ

¹ ዳዊቲ ደርያ ሁጵያራ ሄፍን አሽን፥ ሲባ ጌተትያ መምፕቦስተ አይለይ እያራ ጋሄትስ። ናምኡ ፄቱ ኡይ፥ እስ ፄቱ ዛብበ ኑካ፥ እስ ፄቱ ትያ አይፈ፥ እስ ኦጎሮ ዎይነ ኡሹ ናምኡ ሀረታን ጫንስ።

² ካዎይ፥ “ሀይሳ አይስ ኤሀዲ?” ያግድ ኦይችስ። ሲብ፥ “ሀረታ፥ ካዋ ሶ አሳይ ቶጋና መላ፥ ኡይነ ትይያ አይፍያ አሳይ ማና መላነ ዎይነ ኡሻይ ባዞን ዳቡርያ አሳት ኡያና መላሳ” ያግስ።

³ ካዎይ፥ “ነ ጎዳ ናኣ ናአይ አዉን ደኢ?” ያግድ ኦይችስ። ሲብ፥ “ ‘እስራኤለ አሳይ ታ አዋ ካዎተ ሀች ታዉ ዛር እማና’ ያግድ የሩሳላመን ኡትስ” ያግስ።

⁴ ካዎይ፥ “መምፕቦስተስ ደእያባ ኡባይ ነዉ ግዶ” ያግስ። ሲብ፥ “አቤት ጎዳዉ፥ ካዋዉ! ታኒ ነ ስንን ቴሞ ደማይስ” ያግድ ቢታን ጉፋንዳ ዝጋይስ።

ዳዊታነ ሳም

⁵ ካዎይ ዳዊቲ ብራቅማ ካታማ ያ ዎደ ሳኦላ ዳቦ ግድዳ እስ አደይ ያፐ ከይስ። እያ ሱንይ ጌራ ናኣ ሳም። እ ዳዊታ ባድሸ ከይስ።

⁶ ኦላንቾትነ ካዋ ናገይሳት ኡሻቻራነ ሀድርሳራ ዳዊታ ተቅድ ደእሽን፥ ሳም ዳዊታ ቦላነ ካዋ ሞርናታ ቦላ ሹቹ ሆልስ።

⁷ ሳም ዳዊታ ባድሸ፥ “ክቻ፤ ሀ ኢታይ ክቻ! አሳ ሱ ጉስያ ሀ ፓናይስ ክቻ።

⁸ ኔኒ ሳኦላ በሳን ካዎታዳሳ፤ ኔኒ ጉስዳ ሳኦላ ሶ አሳ ሱ ኡባ ጎዳይ ነ ቦላ ዛርስ። ጎዳይ ካዎተ ነ ናኣ አበሰሎመስ እሚስ፤ ኔኒ ሱ ጉስዳ አስ ግድያ ግሾ፥ ነዉ ዮ ዎደይ ጋክስ” ያግስ።

⁹ ሄሳፈ ጉየ፥ ፃሩያ ናአይ አብስ፥ ካዋኮ፥ “ሀ ባዉታ ካናይ፥ ታ ጎዳ ካዋ አይስ ባዲ? ታኒ ባዳ እያ ቆያ ቃንፃና” ያግስ።

¹⁰ ካዎይ፥ “ህንተኖ፥ ፃሩያ ናይቶ፥ ህንተራ ታራ አይብ ጋ? ጎዳይ፥ ‘ዳዊታ ባዳ’ ያግዳ ግሾ እ ባድያባ ግድኮ፥ ‘ኔኒ አይስ ሄሳ ኦይ?’ ያግድ ኦይቻናዉ ዳንዳኤይ ኦኔ?” ያግስ።

¹¹ ሄሳፈ ጉየ፥ ዳዊቲ አብሳነ ባ ሞርናታ፥ “ታ ናአይ፥ ታ አሾይ፥ ታና ዎናዉ ኮዬስ፤ ያትን፥ ሀ ብንያመ አደይ ዋት አጋነ! ጎዳይ እያ ኪትዳ ግሾ እ ባዴስ፥ እያ ቦቾፍተ።

¹² ኦን ኤር፥ ጎዳይ ታ መቱዋ በእድ፥ ታኒ ሀች ኤክያ ባደ ግሾ ታዉ ኬሀ ቆፓኔኮ” ያግስ።

¹³ ሄሳፈ ጉየ፥ ዳዊቲነ እያ አሳይ ኦግያ ኦይክድ ቦሶና። ሳም ዙማ ምያራ ብሸ ዳዊታ ባዴስ፤ ሹቹ ሆሌስ፤ እያ ቦላ ቢታ ላሌስ።

¹⁴ ካዎይነ እያራ ደእያ አሳት ባንታ ብያ በሳ ዳቡርድ ጋክን ካዎይ ያን ሸምፕስ።

አበሰሎመነ እያ ሞርናታ

¹⁵ አበሰሎመይነ እስራኤለ አሳ ኡባይ የሩሳላመ ገልዶሶና፤ አክፆፈል ኤንታራ ደኤስ።

¹⁶ ዳዊታ ላገይ አርካያ ኮቻይ ኩስ አበሰሎመኮ ይድ፥ “ካዎይ ብራታ ቱሱ ግዶ! ካዎይ ሙኩሉ ላይ ካዎቶ!” ያግስ።

¹⁷ አበሰሎመይ፥ “ኔኒ ነ ላግያ ዶስያ ዶሶይ ሀይሴ? ነ ላግያራ አይስ ባብኪ?” ያግስ።

¹⁸ ኩስ፥ “አካይ! ጎዳይ፥ ሀ አሳይነ እስራኤለ አሳይ ዶርዳይሳስ ታኒ አቃና፤ ታኒ እያራ አታና።

¹⁹ ህዛ ታኒ ታ ጎዳ ናኣስ ኦና ኦደስ ኦኔ? ታኒ ነ አዋስ ኦዳይሳዳ ሀእ ነዉካ ኦና” ያግስ።

²⁰ አበሰሎመይ አክፆፈላኮ፥ “ኔኒ አነ ኑና ዞራ፤ ኑኒ አይ ኦኖ?” ያግስ።

²¹ አክፆፈል፥ “ካዎ ጋ ናጋናዉ ሶን አትዳ ነ አዋ ላገታራ ባዳ ዝንአ። ኔኒ ነ አዋ ካዉሽዳይሳ እስራኤለ አሳ ኡባይ ስአና፤ ኔራ ደእያ ኡባ ኩሸይ ምናና” ያግስ።

²² ካዎ ኬ ፖቅያ ቦላ አበሰሎመስ ዱንካነ ቶክዶሶና፤ አሳ ኡባይ ፄልሽን አበሰሎመይ ገልድ ባ አዋ ላገታራ ዝንእስ።

²³ ሄ ዎደ አክፆፈል ዞርያ ዞረይ እስ አስ ጎዳ ኦይችድ ኤክያ ዞረ መላ። ዳዊቲነ አበሰሎመይ አክፆፈላ ዞርያ ሄሳዳ ኦድ ኤክዶሶና።