2 Sameela 13 - ጌሻ ማፃፋ

አምኖናነ ትማሮ

¹ እስ ዎደ ሀይሳዳ ሀንስ። ዳዊታ ናኣ አበሰሎመስ ትማሮ ጌተትያ እስ ማላ ሎኦ ምቻ ደአዉሱ። ዳዊታ ናአይ አምኖን ትማሮ ዶስስ።

² አምኖን ባ ምችዉ ትማሮ ዶስዳ ግሾ እዮ ቆፕሸ ዳሮ ግልቅስ። እያ ጌላኦ ግድዳ ግሾ እዮ አይኮካ ኦናዉ ዳንዳኤቶናባ እያዉ ዳንስ።

³ ሽን አምኖናስ ዳዊታ እሻ ሳማ ናኣ እዮናዳባ ጌተትያ ላገይ ደኤስ፤ እዮናዳብ ዳሮ ኤጫ አስ።

⁴ እዮናዳብ፥ “ኔኒ ካዎ ናአ ግዳሸ ዎንታ ዎንታ አይስ ግልቃይ? ኔኒ ታዉ አይስ ኦድኪ?” ያግድ አምኖና ኦይችስ። አምኖን፥ “ታ እሻ አበሰሎመ ምችዉ ትማሮ ታኒ ዶሳስ” ያግስ።

⁵ እዮናዳብ፥ “ሀርገትያ አሳዳ ሀናዳ ሂፃን ዝንአ። ነ አዋይ ነና በአናዉ ያ ዎደ፥ ‘ታ ምችያ ትማራ ያዳ ታዉ ምያባ እሞ፤ ታኒ እዮ በእሽን ታ ስንን ካዳ ታና ባርሶ’ ያጋዳ ኦይቻ” ያግስ።

⁶ አምኖን ሀርገትዳ አሳዳ ሀንድ ሂፃን ዝንእስ። ካዎይ እያ በአናዉ ያ ዎደ አምኖን፥ “ታ ምችያ ትማራ ያዳ፥ ታ በእሽን ታ ስንን ኡይ ኡካዳ ታና ባ ኩሸራ ባርሶ” ያግስ።

⁷ ዳዊቲ፥ ካዎ ጋን ደእያ ትማርኮ ኪትድ፥ “ነ እሻ አምኖና ሶ ባዳ እያዉ ካ ካ” ያግስ።

⁸ ትማራ ባ እሻ አምኖና ሶ ባሱ፤ ሄ ዎደ እ ሂፃን ዝንእስ። ትማራ ጉ ለ ሙኑቃዳ አምኖን በእሽን ኡይ ኡካሱ።

⁹ ትማራ ኡይ ባሸፐ ከሳዳ እያዉ አሱ፤ ሽን እ ሞና እፅስ። አምኖን፥ “አሳ ኡባ ካረ ከስተ” ያግን፥ አሳ ኡባይ እያ ማታፐ ከይስ።

¹⁰ ሄሳፈ ጉየ አምኖን፥ “ታኒ ነ ኩሸፐ ማና መላ ካ ሃ ቆልአ ኤካዳ ያ” ያግስ። ትማራ ባ ኡክዳ ኡይ ኤካዳ፥ ባ እሻ አምኖና ስን ሺሻሱ።

¹¹ ትማራ ካ እያኮ ሺሽያ ዎደ እዮ ኦይክድ፥ “ታ ምቸ፥ ሃያ! ታራ ዝንአ” ያግስ።

¹² እያ፥ “ታ እሻዉ፥ አካይ ሀነና! ታና ዎልቃንፋ! ሀይሳ መላባይ እስራኤለን ሀን ኤረና፤ ሀይሳ መላ ቦርሶባ ኦፋ።

¹³ ታ ፖኩዋ ታኒ ዋታዳ ገንናዉ ዳንዳእያና? ቃስ ነካ እስራኤለ ግዶን ካዉሻ አስ ግዳና። ሀያና ካዋ ኦይቻ፤ ታኒ ነና ገላናይሳ እ ድገና” ያጋሱ።

¹⁴ ሽን እ እዮ ስኦና እፅስ። እ ዎልቃማ ግድያ ግሾ፥ እዮ ዎልቃን ኦይክድ ኢስስ።

¹⁵ ሄሳፈ ጉየ፥ አምኖን እዮ ዳሮ እፅስ፤ ካሰ እዮ ዶስዳይሳፈ አድ እፅስ። አምኖን፥ ደንዳ፥ “ከያ! ከያዳ ባ!” ያግስ።

¹⁶ እያ፥ “ኔኒ ታና ከያዳ ባ ገይስ ካሰ ነ ታ ቦላ ኦዳ ኢታፐ አስ” ያጋሱ። ሽን እ እዮ ስኦና እፅስ።

¹⁷ አምኖን ባ አይልያ ፄግድ፥ “ሀ ማጫስዉ ታ ስንፈ ከሳ፤ እዮ ካረ ከሳዳ ዉላ ጎርዳ” ያግስ።

¹⁸ አይለይ እዮ ካረ ከስድ ዉላ ጎርድስ። ጌላኦ ግድዳ ካዎ ማጫ ናይት ማእያ አሌቆ ማኦ ማአሱ።

¹⁹ ትማራ ብዶ ባ ሁጰን ቆላዳ፥ ባ ማእዳ አሌቆ ማኡዋ ዳካዳ፤ ባ ሁጵያ ኦይካዳ፥ ዋሶ ጎቻሸ ባሱ።

²⁰ እ እሻ አበሰሎመይ እዮ በእዳ ዎደ፥ “ነ እሻይ አምኖን ነና ኢስዴ? ታ ምቸ፥ ኔኒ ሀእ ስእ ጋ። እ ነ እሻ፤ ሀ ኦዳ ነ ኡሎን ኦይኮፋ” ያግስ። ያትን፥ ትማራ አዛናሸ፥ አሳን ከዮና ባ እሻ አበሰሎመ ሶን ደአሱ።

²¹ ካዎይ ዳዊቲ ሀ ኦዳ ስእዳ ዎደ ዳሮ ይሎትስ።

²² አበሰሎመይ አምኖናኮ ጫማ ማልአ ፖግቤና። ባ ምችዉ ትማሮ ኢስዳ ግሾ አምኖና ሞርክስ።

አበሰሎመይ አምኖና ዎስ

²³ ናምኡ ላይፈ ጉየ፥ ኤፍሬማ ዛዋ ማታን ሀፆራ ጌተትያ በሳነ አበሰሎመይ ዶርሳ እክሰ ሜዴስ። ካዋ አደ ናይት ኡባይ ሄ በሳ ያና መላ አበሰሎመ ኤንታ ፄግስ።

²⁴ አበሰሎመይ ካዋኮ ብድ፥ “ታኒ ነ አይለይ ታ ዶርሳታ እክስያ ሜድሳይስ፤ ነነ ነ ሞርናት ኑራ የርከቲ?” ያግስ።

²⁵ ካዎይ፥ “አካይ፥ ታ ናአዉ! ኑ ኡባይ ቢኮ፥ ነዉ ቶሆ ግዳና” ያግስ። አበሰሎመይ ካዋ ዳሮ ሾቢንካ ካዎይ ቦና እፅስ፤ ሽን አበሰሎመ አንጅስ።

²⁶ አበሰሎመይ፥ “ኔኒ ቦና እፅኮ፥ ታ እሻ አምኖን ኑራ ቦ” ያግስ። ካዎይ፥ “እ ኔራ አይስ ቢ?” ያግስ።

²⁷ ሽን አበሰሎመይ ሾቢድ አጎና እፅን፥ ዳዊቲ አምኖናነ ባ አደ ናይታ እያራ የድስ።

²⁸ አበሰሎመይ ባ አይለታኮ፥ “አምኖን ዎይነ ኡይድ ማትያ ዎደ ታኒ ህንተና፥ ‘አምኖና ሾጭተ’ ያጋዳ ኪትያ ዎደ እያ ዎተ። ያዮፍተ! ህንተና ኪተይ ታና። ምንተ! ፃልተ!” ያግድ ኪትስ።

²⁹ አበሰሎመ አይለት እ ኪትዳይሳዳ አምኖና ዎዶሶና። ሄሳፈ ጉየ፥ ካዋ አደ ናይት ኡባይ ደንድድ፥ ባንታ ባቁሉዋ ባቁሉዋ ቶግድ ባቃትዶሶና።

³⁰ ኤንቲ ቡሮ ኦገ ቦላ ደእሽን፥ “አበሰሎመየ ካዋ ናይታ ኡባ ዉርስስ፤ ኤንታፈ እሶይካ አትቤና” ጌተትያ ዎረይ ዳዊታ ጋክስ።

³¹ ካዎይ ደንድ ኤቅድ፥ አዛንድ፥ ባ ማኡዋ ዳክድ ቢታን ዝንእስ። እያ አይለት ኡባይ ባንታ ማኡዋ ዳክድ፥ እያ ማታን ኤቅዶሶና።

³² ዳዊታ እሻ ሳማ ናአይ እዮናዳብ፥ “ታ ጎዳዉ፥ ካዎ ናይት ኡባይ ሀይቅዶሶና ጋዳ ቆፖፋ፤ አምኖና ፃላል ሀይቅስ። አምኖን ባ ምችዉ ትማሮ ኢስዳ ጋላሳፐ ዶምን፥ አበሰሎመይ እያ ቦላ ኦናዉ ቆፕዳባይ ሀንስ።

³³ ህዛ ሀይቅዳይ አምኖና ፃላላ ግድያ ግሾ፥ ‘ካዋ አደ ናይት ኡባይ ሀይቅዶሶና’ ግያ ዎርያ ካዎይ ቱማ ጎፖ” ያግስ።

³⁴ ሄ ዎደ አበሰሎመይ ባቃትስ። ናግያ አደይ ቁ ግድ ፄልያ ዎደ ዉሎሀ ባጋራ ደእያ ኦግያራ ደረ ላንቅያ ኦይክድ ዳሮ አሳይ የይሳ በእድ ካዋስ ኦድስ።

³⁵ ሄ ዎደ እዮናዳብ፥ “ሄኮ፥ ታኒ ነ አይለይ ኦድዳይሳዳ ካዋ አደ ናይት ይዶሶና” ያግስ።

³⁶ እ ኦድ ዉርስያ ዎደ ካዋ አደ ናይት ገልድ ባንታ ቃላ ቁ ኦድ ዋስዶሶና። ቃስ ካዎይነ እያ ሞርናት ኡባይ ይባታ ዬሆ ዬክዶሶና።

³⁷ አበሰሎመይ ባቃትድ፥ ገሹራ ካዎ ግድዳ አምሁዳ ናኣ ታልማያኮ ብስ። ሽን ካዎይ ዳዊቲ ባ ናኣስ ዳሮ ጋላስ ዬክስ።

³⁸ አበሰሎመይ ባቃትድ ገሹራ ቢታ ብዳፐ ጉየ ያን ሄ ላይ ደእስ።

³⁹ ካዎይ ዳዊቲ አምኖና ሀይቁዋን ጋክዳ አዛንያፐ ምንዳ ግሾ፥ አበሰሎመ በአናዉ ላሞትስ።