2 Kawota 11 - ጌሻ ማፃፋ

ይሁዳ ካውዉ ጎቶሎ

¹ አካዝያሳ አይያ ጎቶላ ባ ናአይ ሀይቅዳይሳ በእዳ ዎደ፥ ደንዳዳ ካዋ ኮቻ ኡባ ይሳሱ።

² ሽን ካዋ እዮራማ ናእያ፥ አካዝያሳ ምችያ ዮሳቤታ፥ ሀይቃናዉ ደእያ ካዋ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ኤፋዳ ኬን ቆሳዳ፥ ጎቶላ ዎናዳ አሻሱ።

³ ጎቶላ ቢታ ሃርያ ዎደ ኡባን፥ ናአይ ዮሳቤት ማታን፥ ፆሳ ኬን ኡሱፑን ላይ ቆሰትድ ደእስ።

⁴ ላፑን ላይን ዮዳሄይ ካዋ ናገይሳታነ ካዎ ጋ ናገይሳታ ሀላቃታስ ኪትድ፥ ባኮ ፆሳ ኬ ኤህስ። ኤንታራ ጫቅድ፥ ኤንታ ፆሳ ኬን ጫቅስስ፤ ኤንታ ካዋ ናኣ እዮኣሳ በስስ።

⁵ እ ኤንታ፥ “ህንተ ኦናባይ ሀይሳ፤ ሳምባታን ናጋናዉ ገልያ ማራይ ጋክዳ ህንተ ሄ ጩጋፐ እስ ጩጋ ካዋ ኬ ናጎ።

⁶ እስ ጩጋይ ሱራ ፐንግያ ናጎ፤ እስ ጩጋ ናገይሳታፐ ጉየ ባጋራ ደእያ ፐንግያ ናጎ።

⁷ ሳምባታ ጋላስ ናጎፐ ከይያ ሀንኮ ናምኡ ጩጋይ ኩመ ካዋ ቦላ መቶይ ጋኮና መላ ፆሳ ኬ ናጎ።

⁸ ኦላ ሚሸ ኦይክድ፥ ካዋ ግዶን ዎድ፥ ካዎይ ከይያ ዎደነ ገልያ ዎደ ኡባን እያራ እስፈ ደኦ። ህንተኮ ሺቅያ ኦናካ ዎተ” ያግስ።

⁹ ሄ ሀላቃት፥ ካህነይ ዮዳሄ ኪትዳባ ኡባ ኦዶሶና። ኤንቲ ኡባይ ሳምባታ ጋላሳን ናጎ ማራይ ጋክዳይሳታነ ናጉዋ ማራ ፖልዳይሳታ ኤክድ፥ ካህንያ ዮዳሄኮ ይዶሶና።

¹⁰ ካህነይ ፆሳ ኬን ደእያ፥ በን ካዋ ዳዊታ ጎንዳለታነ ቶራታ ኡባ ሀላቃታስ እሚስ።

¹¹ ናገይሳት እሶይ እሶይ ኦላ ሚሸታ ባንታ ኩሸን ኦይክድ፥ ፆሳ ኬፈ ሀድርሳ ባጋፈ ዶምድ፥ ኡሻቻ ባጋ ጋካናዉ፥ ያርሾ በሳ ማታንነ ፆሳ ኬ ማታን ካዋ ዩሹዋን ኤቅዶሶና።

¹² ዮዳሄይ ካዋ ናኣ ካረ ከስድ፥ እያ ሁጰን ካላቻ ዎስ። ህገ ማፃፋ እያዉ እምድ፥ ትይድ፥ እያ ካዎስ። አሳይ ኩሸ ባቅድ፥ ባ ቃላ ቁ ኦድ፥ “ካዎይ ብራታ ቱሱ ግዶ!” ያግስ።

¹³ ካውያ ጎቶላ ናገይሳታ ዎጫማነ አሳ ዎጫማ ስእዳ ዎደ፥ አሳኮ ፆሳ ኬ ባሱ።

¹⁴ ካዎይ ካሰ ካዎት ሀነይሳዳ ቱሳ ማታን ኤቅድይሳ በአሱ። ሀላቃትነ ሞይዘ ፑነይሳት ካዋ ማታን ደኦሶና። ሄ ቢታ አሳ ኡባይ ኡፋይትድ፥ ሞይዘ ፑንን፥ ጎቶላ ባ ማኡዋ ዳካዳ፥ “ሄኮ፥ ሀይስ ማካላ! ሀይስ ማካላ!” ያጋዳ ዋሳሱ።

¹⁵ ካህነይ ዮዳሄይ ቶራ ሞጮናታኮ፥ “ጎቶሎ ፆሳ ኬን ዎፕተ! ኢፐ ያራነ ሃራ ሳልፕዳ ሳልፐታ ግዶን ዎተ፤ እዮ አሻናዉ ቆፕያ አስ ደእኮ ዎተ!” ያግስ።

¹⁶ ኤንቲ እዮ ኦይክድ፥ ካዎ ጋ ኤፍድ፥ ፓራ ፐንግያን እዮ ዎዶሶና።

¹⁷ አሳይ ጎዳ አስ ግዳና መላ፥ ካዎይ ዮዳሄይነ አሳይ ጎዳራ ጫቃና መላ ኦስ። ቃስ ካዋፐነ አሳፐ ግዱዋን ጫቅስስ።

¹⁸ ሄ ዎደ ይሁዳ አሳ ኡባይ ባኣለ ኤቃ ኬ ብድ፥ ሄ ኬ ላልስ፤ ያርሾ በሳታነ እያ ምስለታ ትንቸረስ። ባኣለ ኤቃ ካህንያ ማታና ያርሾ በሳታ ስንን ዎዶሶና። ሄሳፈ ጉየ፥ ካህንያ ዮዳሄይ ፆሳ ኬን ናገይሳታ ዎስ።

¹⁹ ባራ ቶራ ሞጮናታ፥ ካዋ ናገይሳታ፥ ካዎ ጋ ናገይሳታነ ይሁዳ አሳ ኡባ ኤክን፥ ኤንቲ ካዋ ፆሳ ኬፈ ዱገ ኤህስ። ናገይሳታ ፐንግያ ባጋራ ካዎ ኬ እስፈ ገልድ፥ ካዎይ ባ አራታን ኡትስ።

²⁰ ይሁዳ አሳ ኡባይ ኡፋይትዶሶና፤ ጎቶላ ካዎ ጋን ማሻን ሀይቅዳፐ ጉየ ካታማይ ዎፑ ግስ።

²¹ እዮኣስ ካዎትያ ዎደ ላፑን ላይ ናአ።