2 ፅሞትዮሳ 4 - ጌሻ ማፃፋ

¹ ታኒ ነና ፆሳ ስንንነ፥ ካዎ ግድድ ሃራናዉ ቆንጭያ ዎደ ፓፃታነ ሀይቅዳይሳታ ፕርዳናዉ ደእያ ክርስቶስ የሱሳ ስንን ዞራይስ።

² ቃላ ኦዳ፤ ዎደይ እንጀትን እንጀቶና እፅን ምናዳ ኦዳ። ዳሮ ዳንዳአንነ ታማርሶን አሳ ዞራ ሴራነ ደን።

³ አሳይ ቱማ ትምርትያ ስኦና እፅያ ዎደይ ያና። ኤንቲ ባንታ አሙዋ ካልድ፥ ባንታዉ ስአናዉ ኡፋይስያባ ኦድያ አስታማረታ ሺሾሶና።

⁴ ኤንቲ ቱማ ትምርትያ አግድ፥ ቱማ ግዶና ኦዳ ስአናዉ ባንታ ሀይ ዛሮሶና።

⁵ ሽን ኔኒ ኡባባን ነና ሃራ። መቶ ዳንዳአ። ዎንገላ ማርካተ ኦሱዋ ኦ። ነዉ እመትዳ ፆሳ ኦሶ ኡባ ፖላ።

⁶ ታኒ ያርሸትያ ዎደይ ጋክስ፤ ሀ አላምያ አጋዳ ብያ ዎደይ ማትስ።

⁷ ታኒ ሎኦ ኦላ ኦለታስ፤ ታ ጋድያ ዎፃዳ ዉርሳስ፤ አማኑዋ ናጋስ።

⁸ ስንፈ ፅሎተ ካላቻይ ታና ናጌስ። ሄሳ ፅሎ ፕርዳ ፕርድያ ጎዳይ ሄ ጋላስ ታዉ እማና። ሄሳ ታ ፃላላስ ግዶናሽን፥ እያ ቆንጨ አሞትያ ኡባስ እማና።

ጳዉሎሳ ቡዞ ቆፋ

⁹ ኤለሳ ያዳ ታና በአ።

¹⁰ ዴማስ ሀእ አላምያ ዶስድ፥ ታና አግድ፥ ተሰሎንቀ ካታማ ብስ። ቀርቅስ ጋላትያ ቢታ፥ ቃስ ትቶይ ድልማፀ ቢታ ብስ።

¹¹ ሉቃሳ ፃላል ታራ ደኤስ። ማርቆስ ፆሳ ኦሶን ታና ማዳናዉ ዳንዳእያ ግሾ፥ ኔራ ኤካዳ ያ።

¹² ታኒ ትክቆሳ ኤፈሶና ካታማ ኪታስ።

¹³ ኔኒ ያሸ፥ ፅሮኣዳ ካታማን ካርፖሳ ማታን አጋዳ ይዳ ታ ኮትያነ ማፃፋታ ታዉ ኤካዳ ያ። ኡባካ ጋልባን ፃፈትዳ ማፃፋታ ኤኮና ዮፓ።

¹⁴ ብራታ ቆፅያ እስክንድረይ ታና ዳሮ ቆህስ፤ ጎዳይ እያ ኦሱዋዳ እያዉ ዛራና።

¹⁵ እ ኑ ትምርትያ ዳሮ እፅያ ግሾ እያፐ ነና ናጋ።

¹⁶ ኮይሮ ታ ሞተትያ ዎደ ኡባይ አግድ ብዶሶናፐ አትሽን፥ ኦንካ ታና ማድቤና። ፆሳይ ሄ ናቁዋ ኤንታዉ ታይቦፖ።

¹⁷ ሽን ታኒ ኩመ ኪታ አይሁደ ግዶና አሳ ኡባስ ማርካትን፥ ኤንቲ ስአና መላ ጎዳይ ታ ማታን ኤቅድ ታዉ ዎልቃ እሚስ። ቃስ ኮሻትዳ ጋሞዳ ዶና ዶይዳ ሀይቁዋፐ ታና አሽስ።

¹⁸ ጎዳይ ታና ኢታ ኡባፈ አሽድ ባ ሳሎ ካዎተ ሳሮን ኤፋና። እያዉ መርናፐ መርና ጋካናዉ ቦንቾይ ግዶ። አምንእ።

ሳሮ

¹⁹ ጵርስቅላስ፥ አቅላስነ አነስፎራ ሶ አሳስ ታ ሳሮዋ ኦዳ።

²⁰ ኤራስፆስ ቆሮንቶሳ ካታማን አትስ። ፅሮፍሞስ ሀርገትዳ ግሾ፥ ምልፀ ካታማን አጋስ።

²¹ ባልጎይ ገላናፐ ስን ኤለሳዳ ያ። ኤዉቡሉስ፥ ጱዴስ፥ ልኑስ፥ ቅላደይነ ሀራ አማንያ አሳት ኡባይ ነና ሳሮ ጎሶና።

²² ጎዳይ የሱስ ክርስቶሲ ነ አያናራ ግዶ። ፆሳ ማሮተይ ህንተ ኡባራ ግዶ።