2 ፅሞትዮሳ 3 - ጌሻ ማፃፋ

ዎደ ዉርሰ ማላታታ

¹ ዉርሰ ጋላሳን ኡንኤያ ዎደይ ያናይሳ ኤራ።

² አሳይ ባንታና ዶሰይሳታ፥ ሚሸ ሲቀይሳታ፥ ጬቀተይሳታ፥ ኦቶረይሳታ፥ ጫየይሳታ፥ ባንታና የልዳይሳታስ ኪተቶናይስታ፥ ጋላቶናይስታ፥ ጌሻተ ባይናይሳታ፥

³ ሲቆይ ባይናይሳታ፥ ማሮተ ኤሮናይሳታ፥ ዝግረይሳታ፥ ባንታና ሃሮናይሳታ፥ ዎዛና ምኖታ፥ ሎኦ ዶሶናይሳታ፥

⁴ ሞርኬስ አድ እመይሳታ፥ ቆፍ ባይናይሳታ፥ ኦቶሮን ሱገተይሳታ፥ ፆሳፈ አድ አሾ ኡፋይሳናዉ ዶሰይሳታ ግዳና።

⁵ ኤንቲ አማንያ ዳኖሶናፐ አትሽን፥ አማኖ ዎልቃ ካዶሶና፤ ኔኒ ሄሳ መላ አሳታፐ ባቃታ።

⁶ ኤንታፈ እሶት እሶት አሳ ኬ ገልድ ናጋራን ኦይከትዳይሳታነ ዱማ ዱማ አሞን ሱገትያ ዳቡራንቾ ማጫሳታ ቦላ ጎዳቶሶና።

⁷ ሄ ማጫሳት ኡባ ዎደ ታማሮሶናሽን፥ ቱማ ኤራናዉ ዳንዳኦኮና።

⁸ ያነስነ ያምባሬስ ሙሰራ ኤቀትዳይሳዳ ሀ አሳት ጉገይ ኦናይሳታነ አማኖን ኩንድዳ አሳታ ግድያ ግሾ ቱማራ ኤቀቶሶና።

⁹ ሽን ያነሳነ ያምባሬሳ ኤያተይ ቆንጭዳይሳዳ ኤንታ ኤያተይካ አሳ ኡባ ስንን ቆንጫና ግሾ ኤንታዉ ሀነና።

ዉርሰ ዞረ

¹⁰ ሽን ኔኒ ታ ትምርትያ፥ ታ ዱሳ፥ ታ ቆፋ፥ ታ አማኑዋ፥ ታ ዳንዳኣ፥ ታ ሲቁዋ፥ ታ ገንጫ፥

¹¹ ታ ጎደተነ ታ መቱዋ ኤራሳ። አንፆከ፥ እቆንዮነን፥ ልስፅራ ካታማታን ታና ጋክዳባነ ታኒ ዳንዳእዳ መቱዋ ኤራሳ፤ ጎዳይ ታና ሄ ኡባፈ አሽስ።

¹² ክርስቶስ የሱሳን ፆሳ ኡፋይስያ ደኦ ዳናዉ ኮይያ ኡባይ ጎደታና።

¹³ ኢታ አሳትነ ባለይሳት ባንታዉ ባለትሸነ ሀራታ ባለሸ ካሰፐ ኢት ኢት ባና።

¹⁴ ሽን ነ ታማርዳ ቱማንነ ነ አማንዳ አማኑዋን ኤቃ። ነ ኦደፈ ታማርዳኮ ኤራሳ።

¹⁵ ኔኒ ነ ናአተፈ ዶማዳ ክርስቶሳ የሱሳ አማናዳ፥ አቶተ ደምያ ጭንጫተ እማናዉ ዳንዳእያ ጌሻ ማፃፋታ ኤራዳሳ።

¹⁶ ጌሻ ማፃፋ ኡባይ ፆሳፈ እመትዳ ቃላ። ሄ ማፃፋይ ቱማ ታማርሳናዉ፥ ባልዳይሳታ ሴራናዉ፥ ሱርሳናዉነ ፅሎተ ዱሳስ ኮሽያ ዞረ እማናዉ ማዴስ።

¹⁷ ፆሳ አስ ፖሎነ ሎኦ ኦሶ ኡባ ኦናዉ ጊግዳይሳ ግዳና መላ ማዴስ።