2 ፅሞትዮሳ 2 - ጌሻ ማፃፋ

የሱስ ክርስቶሳን ምና

¹ ህዛ፥ ታ ናአዉ፥ ክርስቶስ የሱሳን ደእያ ማሮተን ምና።

² ዳሮ ማርካታ ስንን ታኒ ነና ታማርስዳ ትምርትያ፥ ሀራታ ታማርሳናዉ ዳንዳእያ አማነትዳ አሳስ ሀዳራ እማ።

³ የሱስ ክርስቶሳስ አማንያ ዎታዳረ ግዳዳ ታራ መቶ ኤካ።

⁴ ኦላ ዎታዳረይ ባ ቶራ ሞጮና ኡፋይሳናዉ ጊገቴስፐ አትሽን፥ ሀራ ኦሶን ባና ፔሸና።

⁵ ሄሳዳካ፥ ጋደ ዎፅያ ኦንካ በሲያ ኦገራ ጋደቶና እፅኮ ዎይቶ ኤከና።

⁶ ጎሻን ዳቡርያ ጎሻንቾይ ባ ዳቡራ አይፍያፐ ምያ ኮይሮ አስ ግዳናዉ በሴስ።

⁷ ነ አኬካና መላ ጎዳይ ነና ማዳና ግሾ፥ ታ ነዉ ኦድዳባ ነ ዎዛናን ናጋ።

⁸ ታኒ ማርካትያ ዎንገላ መላ ሀይቆፐ ደንድዳ፥ ዳዊታ ኮቸ ግድዳ የሱስ ክርስቶሳ ቆፓ።

⁹ ታኒ ዎንገላ ኦድያ ግሾ፥ ኢታባ ኦዳ አሳዳ፥ ቃሸታዳ መቶ ኤካይስ። ሽን ፆሳ ቃላይ ቃሸተና።

¹⁰ ሄሳ ግሾ፥ ፆሳይ ዶርዳ አሳት ክርስቶስ የሱሳን ደእያ አቶተ መርና ቦንቹዋራ ኤካና መላ ኤንታ ግሾ ኡባባን ዋየታይስ።

¹¹ ሀይሳዳ ግያ ቱማ ቃል ደኤስ፤ “ኑኒ እያራ ሀይቅዳባ ግድኮ፥ እያራ እስፈ ደአና።

¹² ኑኒ ገንጭኮ፥ እያራ እስፈ ካዎታና። ኑኒ እያ ካድኮ፥ እ ኑና ካዳና።

¹³ ኑኒ አማነቶና እፅኮ፥ እ አማነትዳይሳ ግድድ ዳና። አይስ ጊኮ፥ እ ባና ካዳናዉ ዳንዳኤና” ያጌስ።

ምኖ ኦሳንቾ

¹⁴ ኔኒ ኤንታ ሀይሳ አኬክሳ፤ ኤንቲ ቃላታ ጋሶን ፓላሞና መላ፥ ጎዳ ስንን ኤንታ ዞራ። ሄስ ስኤይሳታ ይሰስፐ አትሽን፥ አይኮካ ማደና።

¹⁵ ኔኒ ቱማ ቃላ ሱረተን ታማርሰይሳነ ዬላዮና ኦሳንቾ ግዳዳ፥ ፆሳይ ናሽያ አሳዳ፥ ነናተ እያዉ እማናዉ ምና።

¹⁶ ሽን ሀ አላምያስ እንጀትያ ጎኦና ኦዳፐ ባቃታ። ሄሳ መላ ኦዳይ አሰ ፆሳፈ ሃሴስ።

¹⁷ ሄሳ መላ ኦዳይ አሳተ ምድግያ ፓፆና ዎይዛዝረ ማዱን መላ። ሄሳ መላ ኦዳ ኦደተይሳታ ግዶፈ ሄመነዮስነ ፍልፆስ ደኦሶና።

¹⁸ ሀ አሳት ቱማ ኦግያ አግድ፥ “ሀይቅዳ አሳይ ሀይቆፐ በን ደንድዶሶና” ያግድ ጉ አሳታ አማኑዋ ይስዶሶና።

¹⁹ ግዶሽን፥ ፆሳይ ምኖ ዛላ ሂፅዳ ግሾ ቃፃናዉ ዳንዳኤና። እያ ቦላ፥ “ጎዳይ ባ አሳ ኤሬስ። ጎዳ ሱን ፄግያ ኦንካ ኢታ ኦሶፐ ሃኮ” ግያ ቃላይ ፃፈትስ።

²⁰ እስ ግታ ኬን ዎርቃፈ ዎይኮ ብራፐ ኦሰትዳ ሚሸታ ፃላላ ግዶናሽን፥ ምፈ ዎይኮ ኡርቃፈ ኦሰትዳ ሚሸትካ ደኦሶና። ሄሳታፐ ባጋት ቦንቾ ኦሶስ፥ ቃስ ባጋት ቶሸትያ ኦሶስ ፔኦሶና።

²¹ ሄሳ ግሾ፥ ኦንካ ኢታ ኡባ አግኮነ ባና ጌሽኮ፥ ቦንቾ ኦሶ ኦያ ሚሸ ግዳና። ኤንታ ደኦይ ጌሽነ ጎዳ ኡፋይስያባ፥ ቃስ ኤንቲ ሎኦ ኦሶ ኡባ ኦናዉ ዳንዳኤይሳታ ግዳና።

²² ናአተ ኢታ አሙዋፐ ባቃታ። ጌሻ ዎዛናን ጎዳ ፄግያ አሳታራ እስፈ፥ ፅሎተ፥ አማኑዋ፥ ሲቆነ ሳሮተ ካላ።

²³ ሽን ኦሽ መይሳ ኤራዳ ኤያተነ ሀዳ ግድዳ ፓላማፐ ሃካ።

²⁴ ጎዳ ኦሳንቾይ አሳ ኡባስ ኬሀ፥ ሎኦ ታማርሰይሳነ ዳንዳአንቾ ግዳናዉ በሴስፐ አትሽን፥ ኦየታናዉ በሰና።

²⁵ እ ባራ ኤቀተይሳታ አሽከተን ሴረይሳ ግዳናዉ በሴስ። ኤንቲ ባንታ ናጋራፐ ስሚድ ቱማ ኤራናዳ ፆሳይ ኦነኮ ኦን ኤር።

²⁶ ኤንቲ ባንታ ዎዛናኮ ስሚድ ባ ሸንያ ኦና መላ ኤንታ ኦይክዳ ፃላሄ ፅህያፐ ከስ ኤካና።