2 ፅሞትዮሳ 1 - ጌሻ ማፃፋ

¹ ፆሳ ሸነን፥ የሱስ ክርስቶሳን በንትዳ ደኦ ኡፋይሳ ማርካታናዉ የሱስ ክርስቶሳ ሀዋረ ግድዳ ጳዉሎሳፐ፥

² ታ ዶስያ ናኣ ፅሞትዮሳስ ኪተትዳ ኪታ። ፆሳ አዋፐነ ኑ ጎዳ ክርስቶስ የሱሳፐ አ ኬሀተይ፥ ማሮተይነ ሳሮተይ ነዉ ግዶ።

ፅሞትዮሳስ እመትዳ ዞረ

³ ታኒ፥ ታ ዎሳን ቃማነ ጋላስ ነና ቆፓይስ። ታኒ ዎስያ ዎደ ታ ማይዛታ ፆሳነ ታኒ ሎኦ ካሀን ሀጋዝያ ፆሳ ነ ግሾ ጋላታይስ።

⁴ ታኒ ነ አፉ ቆፓይስ፤ ነና በአዳ ኡፋይታናዉ ዳሮ ላሞታይስ።

⁵ ቃስ ነዉ ደእያ ቱማ አማኑዋ ኤራይስ። ሄ አማኖይ በን ነ ዎጋ አየ ሎይድንነ ነ አየ ኤዉንቅን ደእያ አማኑዋ መላ።

⁶ ሄሳ ግሾ፥ ታኒ ታ ኩሽያ ነ ቦላ ዎዳ ዎደ ፆሳይ ነዉ እምዳ እሞታ ኔኒ ዛራ ኤና መላ አኬክሳይስ።

⁷ አይስ ጊኮ፥ ፆሳይ ኑስ ዎልቃ፥ ሲቆነ ኑ ሁጰ ሃርያ አያና እሚስፐ አትሽን፥ ያሻ አያና እምቤና።

⁸ ህዛ፥ ኑ ጎዳስ ማርካታናዉ ዬላቶፓ፤ ቃስ እያ ግሾ ቃሸትዳ ታናንካ ዬላቶፓ። ሽን ፆሳይ ነዉ እምያ ዎልቃን ዎንገላ ግሾ፥ ታራ መቶ ኤካ።

⁹ ፆሳይ ባ ሸነንነ ባ አ ኬሀተን ኑና አሽድ፥ ባ ጌሻ ደረ ኦናዉ ኑና ዶርስፐ አትሽን፥ ኑኒ ኦዳ ኦሱዋ ግሾ ግደና። ሀ አ ኬሀተ ክርስቶስ የሱሳ ባጋራ መርና ዎደታፔ ስን ኑስ እሚስ።

¹⁰ ሀእ ሀ አ ኬሀተይ ኑና አሽያ ክርስቶስ የሱሳ ዩሳን ቆንጭስ። እ ሀይቆ ዎልቃ ይስድ፥ ዎንገላ ባጋራ ዮና ደኦ ኑስ ቆንጭስስ።

¹¹ ታኒ ዎንገላ ሳባከ፥ ሀዋረነ አስታማረ ግዳና መላ ፆሳይ ታና ዶርስ።

¹² ታኒ ሄሳ ግሾ ሀ መቱዋ ኤካይስ፤ ሽን ታ አማነይ ኦነኮ ኤርያ ግሾ ዬላትከ። ታዉ እመትዳ ሀዳራ ሄ ጋላሳይ ጋካናዉ እ ናጋናዉ ዳንዳኤይሳ ኤራይስ።

¹³ ታኒ ነና ታማርስዳ ቱማ ቃላ ሌምሶ ኦ ኦይካዳ ክርስቶስ የሱሳ ባጋራ ኑባ ግድዳ አማኑዋንነ ሲቁዋን ደአ።

¹⁴ ኑ ግዶን ደእያ ጌሻ አያና ዎልቃን ነዉ እመትዳ ሎኦ ሀዳራ ናጋ።

¹⁵ ኢሰ ቢታን ደእያ ኡባይ ታፐ ሃክዳይሳ ኤራሳ፤ ኤንታ ግዶን ፍገሉስነ ሄርሞገኔስ ደኦሶና።

¹⁶ አነስፎር ታና ዳሮ ዎደ ምንዳ ግሾ ጎዳይ እያ ሶ አሳስ ቃቶ። ታኒ ቃሾ ኬን ደእያ ዎደ እ ታናን ዬላትቤና።

¹⁷ ሄሳ ቦላ እ ሮመ ካታማ ይዳ ዎደ ታና ምን ኮይድ ደምስ።

¹⁸ ዉርሰ ጋላሳን ጎዳይ እያዉ ቃታና መላ ታኒ ጎዳ ዎሳይስ። ኤፈሶና ካታማን እ ታና አይ መላ ማድዳኮ ነ ሎይ ኤራሳ።