2 ታሰሎንቀ 3 - ጌሻ ማፃፋ

ኑስ ዎስተ

¹ ዉርሰን ኑ እሻቶ፥ ጎዳ ቃላይ ህንተ ግዶን ኤለስድ ዳልጋናዳነ ቦንቸታናዳ ኑስ ዎስተ።

² ሄሳዳካ፥ አስ ኡባይ ቃላ ስእድ አማኖና ግሾ፥ ፆሳይ ጌላታፐነ ኢታ አሳታፐ ኑና አሻና መላ ኑስ ዎስተ።

³ ሽን ጎዳይ አማነትዳይሳ፤ እ ህንተና ምንናነ ፃላሄፐ ናጋና።

⁴ ኑኒ ህንተና ኪተይሳ ሀእካ ስንፈካ ህንተ ኦናይሳስ ጎዳን ኑኒ አማነቶስ።

⁵ ጎዳይ ህንተ ዎዛና ፆሳ ሲቁዋኮነ ክርስቶሳ ዳንዳኣኮ ካለ።

ቦዞፕተ

⁶ ኑ እሻቶ፥ ህንተ ኑፐ ኤክዳ ኪታ ካሎናይሳታፐነ ኦሶ ብልያ አዛላ አማንያ አሳታፐ ህንተ ሻከታናዳ ጎዳ የሱስ ክርስቶሳ ሱንን ህንተና ኪቶስ።

⁷ ኑዳ ሀንድ ዳናዉ በሰይሳ ህንተ፥ ህንተ ሁጰን ኤሬታ። ኑኒ ህንተራ ደእያ ዎደ ኦሶ ብልቦኮ።

⁸ ኑኒ ኦደፈካ ካ መላ ምቦኮ። ኑስ ዳንዳኤትዳ መላ ቃማነ ጋላስ ኦ ዳቡርድ ደእዳፐ አትሽን፥ ኦደስካ ቶሆ ግድቦኮ።

⁹ ኑኒ ሄሳ ኦዳይ፥ ህንተዉ ሌምሶ ግዳናሳፈ አትሽን፥ ህንተፈ ማደ ኦይቻናዉ ኑስ ማት ይና ግደና።

¹⁰ ኑ ህንተራ ደእያ ዎደካ፥ “ኦናዉ ኮዮና አስ ኦንካ ሞፖ” ያግድ ኪትዳ።

¹¹ ኑኒ ሄሳ ግዳይ፥ ህንተ ግዶን እስ እስ አዛላት ደኤይሳ ስእዳ ግሾሳ። ሄ አሳት ገልሶናባን ገልድ ሀራታ ኦሶ ብልሶሶናፐ አትሽን፥ አይኮካ ኦኮና።

¹² ኑኒ ሄሳ መላ አሳት ማራ ደኦ ዳናዳነ ባንታና ኮሽያባ ኦድ ደማናዳ ጎዳ የሱስ ክርስቶሳ ሱንን ኤንታ ኪቶስነ ዞሮስ።

¹³ ሽን ኑ እሻቶ፥ ሎኦ ኦሶ ኦናዉ አዛሎፍተ።

¹⁴ ሀእ ኑኒ ሀ ዳብዳብያን ኪትዳ ኪታስ ኪተቶና አስ ኦንካ ደእኮ ሄ ኡራ ኤርተ። እ ዬላታና መላ እያፐ ሻከትተ።

¹⁵ ሽን እያ እሻዳ ሴርተፐ አትሽን፥ ሞርከዳ ፄሎፍተ።

ሳሮ

¹⁶ ሳሮ እምያ ጎዳይ፥ ባ ሁጰን ህንተዉ ኡባ ዎደነ ኡባ ባጋራ ሳሮ እሞ። ጎዳይ ህንተ ኡባራ ግዶ።

¹⁷ ታኒ ጳዉሎስ፥ ሀ ኪታ ታ ኩሸን ፃፋስ። ታ ኪታ ኡባስ ማላይ ሀይሳ፤ ታኒ ሄሳዳ ፃፋይስ።

¹⁸ ኑ ጎዳ የሱስ ክርስቶሳ አ ኬሀተይ ህንተ ኡባራ ግዶ።