2 ታሰሎንቀ 1 - ጌሻ ማፃፋ

¹ ጳዉሎስ፥ ስላሰይነ ፅሞትዮስ ተሰሎንቀ ዎሳ ኬን ደእያ፥ ፆሳ አዋባነ ጎዳ የሱስ ክርስቶሳባ ግድዳ አሳስ ፃፈትዳ ኪታ።

² ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

ክርስቶስ ስምያ ዎደ

³ ኑ እሻቶ፥ ህንተ አማኖይነ ህንተ እሶይ እሱዋነ ሀራታ ሲቅያ ሲቆይ ዳሮ ድጭያ ግሾ፥ ኑኒ ሄሳስ ፆሳ ኡባ ዎደ ጋላታናዉ በሴስ።

⁴ ህንተና ጋክዳ ጎዳንነ ዋየ ኡባን ገንጫንነ አማኖን ምንድ ኤቅዳ ግሾ፥ ኑኒ ኑ ሁጰን ፆሳ ዎሳ ኬታን ህንተባ ማርካትሸ ህንተናን ጬቀቶስ።

⁵ ህንተ እያ ግሾ ግድ መቶ ኤክያ ፆሳ ካዎተስ በሰይሳታ ግድድ ታይበታና መላ ፆሳ ፅሎ ፕርዳስ ሀይስ ማላ።

⁶ ፆሳይ ቱማ ፕርዳ ፕርዳና። ፆሳይ ህንተና ዋይሰይሳታ ቦላ ዋየ ኤሀና።

⁷ ጎዳይ የሱሲ ባ ዎልቃማ ኪታንቾታራ፥ ታማ ላጮራ ሳሎፐ ያ ዎደ ዋየትያ ህንተናነ ኑና ሸምፕሳና።

⁸ ቃስ ፆሳይ ባና ኤሮናይሳታነ ኑ ጎዳ የሱስ ክርስቶሳ ዎንገላስ ኪተቶናይሳታ ፕርዳና።

⁹ ኤንቲ ጎዳ ስንፈነ እያ ቦንቹዋ ዎልቃፈ ሻከትድ መርና ዩዋን ፕርደታና።

¹⁰ ሄ ጋላስ፥ እ ባ ጌሻ አሳንነ ባና አማንያ ኡባን ቦንቸታናዉነ ሳበታናዉ ያ ዎደ ኑ ህንተዉ ኦድዳ ኪታ ህንተ አማንዳ ግሾ፥ ህንተ እያ ቦንቸይሳታ ግዶንነ ሳበይሳታ ግዶን ዳና።

¹¹ ኑኒ ህንተዉ ኡባ ዎደ ፆሳ ዎሰይ ሄሳሳ። ኑ ፆሳይ ህንተና ፄግዳ ደኡዋስ በሰይሳታ ግድድ ታይበታና መላ ኑኒ ዎሶስ። ህንተ ሎኦባ ኦናዉ አሞትያ አሙዋነ ህንተ አማኖ ኦሱዋ እ ባ ዎልቃን ፖሎ።

¹² ሄሳን ኑ ፆሳነ ኑ ጎዳ የሱስ ክርስቶሳ አ ኬሀተን፥ ጎዳ የሱሳ ሱን ህንተ ቦንቻና፤ ህንተናካ እ ቦንቻና።