2 ጰፅሮሳ 3 - ጌሻ ማፃፋ

ጎዳይ ያና

¹ ታ ሲቆ እሻቶ፥ ሀይስ ታ ህንተዉ ፃፍዳ ዳብዳበይ ናምአን። ታኒ ሀ ናምኡ ዳብዳበታካ ህንተዉ ፃፍዳይ፥ ህንተ ሱረ ቆፋ ቆፓናዳ ህንተና ደንናሳ።

² ቃስ ጌሻ ናበት በን ኦድዳ ቃላነ ኑና አሽያ ጎዳይ፥ ሀዋረታ ባጋራ ኪትዳ ኪታ ህንተ ሀሳያና መላ ኮያይስ።

³ ኡባፈ ካሰትድ፥ ዎደ ዉርሰን ባንታ አሙዋ ካልድ አሰ ቶቸይሳት፥ ቶችሸ ያናይሳ ኤርተ።

⁴ ኤንቲ፥ “ታ ያና ግዳይስ አዉን ደኢ? ኑ አዋት ሀይቅዶሶና፥ ሽን ኡባባይ ሳእ መቶሳፐ ዶምድ ደኤይሳዳ ደኤስ” ያጎሶና።

⁵ ዳሮ ዎደፐ ካሰ ሳሎይ ፆሳ ቃላን መትዳይሳ፤ ቃስ ሳእ ሃፈነ ሃን መትዳይሳ ኤርሸ ካዶሶና።

⁶ ሄ ዎደ ደእያ ሳአይ ሃን ምተትድ ይስ።

⁷ ሽን ሀእ ደእያ ሳሎይነ ሳእ፥ ጌላት ፕርደትያ ጋላሳይነ ይያ ጋላሳይ ጋካናዉ ሄ ቃላን ታማስ ናገትድ ደኦሶና።

⁸ ሽን ታ ሲቆ እሻቶ፥ ሀ እስባ ዶጎፕተ። ጎዳ ማታን እስ ጋላስ ሙኩሉ ላይ መላ ግደይሳነ ሙኩሉ ላይ እስ ጋላሳ መላ ግደይሳ ዶጎፕተ።

⁹ እሶት እሶት ጋምእስ ግድ ቆፐይሳዳ፥ ጎዳይ ባ ኡፋይሳ ቃላ ግሾ ጋምኤና። ሽን ኦንካ ዮና መላ ኮይድ፥ ኡባይ ባንታ ናጋራፐ ስማና መላ ህንተ ግሾ ግድ ገንጬስ።

¹⁰ ሽን ጎዳ ጋላሳይ ካይሶዳ ያና። ሄ ጋላሳን ሳሎት ዎልቃማ ጉንን ያና፤ ሳሎ መተት ታማን ፁገታና፤ ሳእነ እያ ቦላ ደእያ ኡባይ ያና።

¹¹ ህዛ፥ ኡባባይ ሄሳዳ ሀንዳ ይያባ ግድኮ ህንተ አይ መላ አስ ግዳናዉ በሲ? ህንተ ጌሽነ ፆሳ ዳንያ ደኦ ዳናዉ በሴስ።

¹² ህንተ ስንራ ያ ፆሳ ጋላሳ ናግሸ ህንተዉ ዳንዳኤትያባ ኡባ ኦድ ሄ ጋላሳ ኤሶይተ። ሄ ጋላስ ሳሎትነ እያን ደእያባይ ታማን ፁገታና፤ ዎልቃማ ሱላን ትልአና።

¹³ ሽን ኑኒ ፅሎተ ሃርያ ኦራ ሳሎነ ኦራ ሳአ ፆሳ ኡፋይሳ ቃላዳ ናጎስ።

¹⁴ ሄሳ ግሾ፥ ታ ሲቆ እሻቶ፥ ኑ ሄ ጋላሳ ናግያ ግሾ ፖኮይነ ቦረይ ባይናይሳታ ግድድ፥ ጎዳራ ሳሮን ዳናዉ ምንተ።

¹⁵ አስ ኡባይ አታና መላ ኮይድ ጎዳይ ዳንዳኤይሳ ዶጎፕተ። ቃስ ኑ ሲቆ እሻይ፥ ጳዉሎስ፥ ፆሳይ እያዉ እምዳ ጭንጫተን ሄሳዳ ህንተዉ ፃፍስ።

¹⁶ እ ባ ዳብዳበታ ኡባን ሄሳታባ ፃፍስ። እያ ዳብዳበታ ግዶን አኬካናዉ ዋይስያ ቆፋት ደኦሶና። ታማርቦናነ ምንቦና አሳት ሀራ ፆሳ ቃላ ምርቀይሳዳ ሀ ኪታታካ ያናዉ ማችድ ምርቆሶና።

¹⁷ ሄሳ ግሾ፥ ታ ሲቆ እሻቶ፥ ህንተ ሄሳ ኤርያ ግሾ ማካላታ ባላን ጭመትድ፥ ዮና መላነ ምንድ ደእያ በሳፈ ኩንዶና መላ ናገትተ።

¹⁸ ሽን ህንተ ኑና አሽያ ኑ ጎዳ፥ የሱስ ክርስቶሳ አ ኬሀተንነ ኤራተን ድጭተ። እያዉ ሀእካ መርናዉካ ቦንቾይ ግዶ። አምንእ።