2 ጰፅሮሳ 1 - ጌሻ ማፃፋ

¹ የሱስ ክርስቶሳ ሀዋረይነ እያ አይለይ፥ ታኒ፥ ስሞን ጰፅሮስ፥ ኑ ፆሳነ ኑና አሽያ የሱስ ክርስቶሳ ፅሎተ ባጋራ ኑይሳ መላ አልኦ አማኖ ኤክዳይሳታስ ሀ ዳብዳብያ ፃፋስ።

² ፆሳነ ኑ ጎዳ የሱሳ ኤሮን አ ኬሀተይነ ሳሮይ ህንተዉ ኩሞ።

ፆሳ ፄሳነ ዶሩዋ

³ ባ ቦንቾንነ ሎኦተን ኑና ፄግዳ እያ ኤሮን ደኦስነ ፆሳ ዳንድ ዳናዉ ኮሽያባ ኡባ ፆሳይ ባ ዎልቃን ኑስ እሚስ።

⁴ ህንተ ኢታ አሞ ጋሶን መትያ ሀ አላምያን ደእያ ዮፐ ከስ ኤካናዳነ ፆሳ ፆሳተን ሻከታናዳ፥ ሀ እሞታታ ባጋራ ዳሮ አልኦነ ግታ ኡፋይሳ ኑስ እሚስ።

⁵ ሄሳ ግሾ፥ ምንድ፥ ህንተ አማኑዋ ቦላ ሎኦተ፥ ሎኦተ ቦላ ኤራተ፥

⁶ ኤራተ ቦላ ባና ሃሮ፥ ባና ሃሮ ቦላ ገንጫ፥ ገንጫ ቦላ ፆሳ ዳኖ፥

⁷ ፆሳ ዳኖ ቦላ እሻተ ኬሀተ፥ እሻተ ኬሀተ ቦላ ሲቆ ጉጅተ።

⁸ ሀይሳቲ ህንተዉ ዳርድ ደእያባ ግድኮ፥ ጎዳ የሱስ ክርስቶሳ ኤሮን ማድያ አስነ አይፈራ ደእያ አስ ኦና።

⁹ ሽን ሄሳት ባይና ኦንካ ማታን ደእያባ ፃላላ በእያ ቆቀ። እ ባ ካሰ ናጋራፐ ጌይዳይሳ ዶግስ።

¹⁰ ሄሳ ግሾ፥ ታ እሻቶ፥ ህንተ ፄሳነ ህንተ ዶሩዋ ምንናዉ ካሰይሳፈ አድ ምንተ። ህንተ ሄሳታ ኦያባ ግድኮ፥ በተከታ።

¹¹ ሄሳን ኑ ጎዳነ ኑና አሽያ የሱስ ክርስቶሳ መርና ካዎተ ገልያ ኩመ ማታይ ህንተዉ እመታና።

¹² ሄሳ ግሾ፥ ህንተ ሀይሳታ ኤርያባነ ሄ ኦይክዳ ቱማን ምንድ ደእያባ ግድኮካ፥ ታኒ ሀይሳታ ኡባ ዎደ ህንተና ሀሳይሶ አግከ።

¹³ ታኒ ሸምፖራ ደእዳ ዎደ ኡባን ህንተና ሀሳይሳናይስ ኮሽያባ ጋዳ ቆፓይስ።

¹⁴ ኑ ጎዳ የሱስ ክርስቶሲ ታዉ ቆንጭሳዳይሳዳ ታኒ ሀ ሀይቅያ አሳተ ጋምኦና ቃራ የጋዳ ባናይሳ ኤራይስ።

¹⁵ ታኒ ህንተፈ ሻከትኮካ ህንተ ሀይሳታ ኡባ ዎደ አኬካና መላ ታዉ ዳንዳኤትያባ ኡባ ኦና።

¹⁶ ኑኒ ጎዳ ክርስቶሳ ዎልቃነ እያ ዩሳባ ህንተዉ ኦደይ፥ እያ ግታ ቦንቹዋ በእድፐ አትሽን፥ መ ከስዳ ሀይሰ ግደና።

¹⁷ ዳሮ ዎልቃማ ቦንቹዋፈ፥ “ታኒ ኡፋይትያ፥ ታ ዶስያ ናአይ ሀይሳ” ግያ ቃላይ ይዳ ዎደ፥ ፆሳ አዋፐ ቦንቾነ ጋላታ ኤክስ።

¹⁸ ኑኒ ጌሻ ዙማ ቦላ እያራ ደእያ ዎደ ሄ ቃላይ ሳሎፐ ይሽን ስእዳ።

¹⁹ ኑስ ሄሳፈ አያ አማነትዳ ትንብተ ቃል ደኤስ። ሳእ ዎንታና ጋካናዉነ ባካል ህንተ ዎዛናን ዶላና ጋካናዉ፥ ማን ፖእያ ፖኦ አስ ናገይሳዳ፥ ህንተ ሄ ቃላ ናግኮ ሎኦ ኦታ።

²⁰ ኡባፈ ካሰትድ ሀይሳ ኤርተ። ጌሻ ማፃፋን ፃፈትዳ ትንብተ ቃላ ኦንካ ባ ዶስዳዳ ብርሻናዉ ዳንዳኤና።

²¹ ትንብተ ኡባ፥ ፆሳይ ኪትዳ አሳት ጌሻ አያናይ ካለን፥ ኦድዶሶናፐ አትሽን፥ አሳ ሸነን ኦድቦኮና።