2 ቆሮንቶሳ 9 - ጌሻ ማፃፋ

አማንያ አሳስ ሺቅዳ ሚሸ

¹ አማንያ አሳስ ከስያ ሚሽያባ ታ ህንተዉ ፃፋናዉ ኮሸና።

² ህንተ ማዳናዉ ኬህ አሞተይሳ ታ ኤራይስ። ህንተ አካያ አሳይ፥ ዝላይፈ ዶምድ ማዳናዉ ጊገትዳይሳ ታኒ ማቀዶነ አሳስ ዶና ኩንዳ ኦዳስ። ህንተ ግታ አሞይካ ኤንታፈ ዳሮታ ደንስ።

³ ሀ ኦሱዋን ህንተናን ኑ ጬቀትያ ጬቆይ ሀዳ ግዶና መላ ኮይሮ ህንተባ ታ ኦድዳይሳዳ ህንተ ጊገትድ ናጋና መላ ሀ እሻታ ህንተኮ ኪታስ።

⁴ ማቀዶነ አሳይ ታራ ብድ፥ ህንተ ጊገቶና ደእሽን፥ ደምኮ፥ ኑ ህንተናን ዬላታና፤ ቃስ ህንተ ኑፐ አ ዬላታና።

⁵ ሄሳ ግሾ፥ ሀ እሻት ታፐ ስንትድ ህንተኮ ብድ፥ ህንተ እማና ግዳ እሙዋ ካሰትድ ጊግሳና መላ ታ ኤንታና ኪታስ። ታኒ ጋክያ ዎደ ሄ እሞይ ጊግድ ኡቴስ። ሄ ዎደ ሄ ኬሀተ እሞይ ዎልቃን ግዶናሽን፥ ዶሳን ግደይሳ ኤርሴስ።

⁶ ሀይሳ አኬክተ፤ ጉ ዘርዳይ ጉ ጫካና፤ ዳሮ ዘርዳይ ዳሮ ጫካና።

⁷ ፆሳይ ኡፋይሳን እምያ ኡራ ዶስያ ግሾ፥ ዎልቃን ዎይኮ ዶስ ባይና ግዶናሽን፥ እስ እስ አስ ባ ዎዛናን ቆፕዳይሳዳ ዶሳን እማናዉ በሴስ።

⁸ ኡባ ዎደ ኡባባን ኮሽያባ ኡባ ደምድ ሎኦ ኦሶ ኡባ ኦናዉ ዳንዳአና መላ ፆሳይ ህንተዉ ባ አንጁዋ ዳርሳና።

⁹ ጌሻ ማፃፋን፥ “እ ባ ሻሉዋ ማንቆታስ ላልስ፤ እያ ፅሎተይ መርናዉ ደአና” ያጌስ።

¹⁰ ዘረይሳስ ዘረ፥ ማናዉ ካ እምያ ጎዳይ፥ ህንተ ዘርያ ዘረ ዳርስድ እማና። ህንተ ፅሎተ አይፍያካ ዳርሳና።

¹¹ ዳሮ አሳይ ህንተ እምያ እሙዋ ኑፐ ኤክድ፥ ፆሳ ጋላታናዳ፥ ህንተ ኡባ ዎደ ዳርስድ እመይሳታ ግዳና መላ ፆሳይ ህንተና ኡባ ባጋራ ዱረያና።

¹² ሀ ህንተ እምያ እሞይ አማንያ አሳ ፓጫ ኩን ፃላላ ግዶናሽን፥ አሳይ ፆሳ ጋላታናዉ ጋሶ ግዴስ።

¹³ ሀ ህንተ ኦሶይ ህንተ አማኑዋ ኤርስድ ክርስቶሳ ዎንገላ ህንተ አማንድነ እያዉ ኪተትድ ህንተዉ ደእያባ ኤንታራነ ሀራታራ ሻከትዳ ግሾ ኡባይ ፆሳ ቦንቻና።

¹⁴ ፆሳይ ህንተዉ እምዳ አ ኬሀተ ግሾ ኤንቲ ህንተዉ ፆሳ ዎስሸ ህንተና በአናዉ ላሞቶሶና።

¹⁵ ዛው ባይና ፆሳ እሙዋስ ፆሳይ ጋላተቶ።