2 ቆሮንቶሳ 8 - ጌሻ ማፃፋ

ኡፋይሳን እሞባ

¹ ኑ እሻቶ፥ ፆሳይ ማቀዶንያን ደእያ ዎሳ ኬታስ እምዳ አ ኬሀተባ ህንተ ኤራና መላ ኑ ኮዮስ።

² ኤንቲ ግታ መቶን ፓጨትዶሶና፥ ሽን ኤንታ ኡፋይሳይ ዎልቃማ። ኤንታ ማንቆተስ ዛው ባዋ፥ ሽን ባንታ እሙዋን ዳሮ ኬህዶሶና።

³ ኤንቲ ባንታ ዎልቃ መላነ ባንታ ዎልቃፈ አይሳ ዶስድ እምዳይሳስ ታ ማርካ።

⁴ ኤንቲ ፆሳ አሰ ማድያ ሎኦ ኦሶ ኑራ ኦናዉ ኮይድ ኑና ዳሮ ዎስዶሶና።

⁵ ኤንቲ ኑኒ ቆፕዳይሳፈ አድ ኦዶሶና። ፆሳ ሸንያዳ፥ ኮይሮትድ ባንታና ጎዳስ እምዶሶና፤ ካልድ፥ ባንታና ኑስ አድ እምዶሶና።

⁶ ሀ ሎኦ ኦሱዋ ዶምዳ ትቶይ፥ ጉጅድ ኦናዳነ ህንተና ማድድ፥ ሄ ኦሱዋ ፖልሳናዳ እያ ዎስዳ።

⁷ ሽን ህንተ ኡባባን፥ አማኖን፥ ኦዳን፥ ኤራተን፥ ግታ አሞን፥ ኑና ዶሶንነ ኡባባን ዱረትዳይሳዳ ሀ ሎኦ ኦሱዋንካ ህንተ ኬሀ ግዳና መላ ኑ ኮዮስ።

⁸ ታኒ ሄሳ ኪታናዉ ጊከ። ሽን ሀራታ ግታ አሙዋ ህንተ ሲቁዋራ ጋ በአዳ፥ ህንተ አይ ኬና ቱሜኮ ኤራናዉ ጋይስ።

⁹ ህንተ፥ ኑ ጎዳ የሱስ ክርስቶሳ አ ኬሀተ ኤሬታ። ክርስቶስ ዱረ ግድ ኡትድ፥ ህንተ እያ ማንቆተን ዱረታናዳ ህንተ ግሾ ማንቅስ።

¹⁰ ታኒ ሀ ኦዳን ህንተና ማድያ ዞረ ዞራናዉ ኮያይስ። ህንተ ዝላይ እማናዉ ፃላላ ግዶናሽን፥ ሄሳ ኦናዉ አሞትሸካ ህንተ ኮይሮ።

¹¹ ህንተ ኦናዉ ዶምዳ ኦሱዋ ሀእ ፖልተ። ህንተ ህንተዉ ደኤይሳ ኬና እምኮ፥ ሄስ ህንተ እማናዉ ዳሮ አሞተይሳ ቆንጭሴስ።

¹² እስ አስ እማናዉ አሞትኮ፥ እያ እሞይ ፆሳ ስንን ኤከተይ፥ እ ባዉ ደእዳይሳ ኬና እምናፐ አትሽን፥ ባይናባፐ እማናዉ ኡንኤትን ግደና።

¹³ ታኒ ሄሳ ገይ፥ ህንተ ኡባይ እስ ግና ግዳና መላሳፈ አትሽን፥ ሀራት ዋያፐ ሸምፕን፥ ህንተ ዋየታና መላሳ ግደና።

¹⁴ ዎደ ኤንታ ፓላሀይ ህንተ ፓጫ ኩንና መላ፥ ሀእ ህንተ ፓላሀይ ኤንታ ፓጫ ኩን። ሄሳን ህንተ ግና ግዳና።

¹⁵ ጌሻ ማፃፋን፥ “ዳሮ ሺሽዳይሳስ ፓላህቤና፤ ጉ ሺሽዳይሳስ ፓጭቤና” ጌተትድ ፃፈትዳይሳ መላ።

ትቶነ እያ ላገታ

¹⁶ ኑኒ ህንተዉ ቆፐይሳዳ ትቶይካ ህንተዉ ቆፓና መላ ኦዳ ፆሳይ ጋላተቶ።

¹⁷ ትቶይ ህንተኮ ብዳይ፥ ኑኒ እያ ደንዳ ግሾ ፃላላ ግዶናሽን፥ እ ባ ሸነን ባናዉ አሞትዳ ግሾሳ።

¹⁸ ዎንገላ ማርካተን ዎሳ ኬ ኡባን ዳሮ ኤረትዳ እሻ፥ ኑኒ ትቶራ እስፈ ኪቶስ።

¹⁹ ሄሳ ቦላ ኑኒ ሀ ኬሀ እሞታ ኤፍያ ዎደ ኑራ ባና መላ፥ ሀ ሎኦ ኦሱዋን ጎዳ ቦንቻናዉነ ሀራታ ማዳናዉ ደእያ አሙዋ በሳናዉ እ ዎሳ ኬታን ዶረትስ።

²⁰ ሀ እመትዳ ኬሀ እሙዋ፥ ኑኒ ኦሶ ቦላ ፔሽያ ዎደ ቦረቶና መላ ናገቶስ።

²¹ ኑኒ ጎዳ ስንን ፃላላ ግዶናሽን፥ አሳ ስንንካ ሎኦ ግድዳባ ኦስ።

²² ቃስ ዳሮ ዎደ ፓጨን ምንድ አዳ ኑ እሻ፥ ኤንታራ ህንተኮ ኪትዳ። እ ህንተናን ዳሮ አማነትያ ግሾ፥ ሀእ ህንተና ማዳናዉ ዳሮ አሞቴስ።

²³ ትቶባ ኤራናዉ ኮይኮ፥ ህንተና ማዳናዉ ታራ ኦያ ታ ኦሶ ላገ። ሀንኮ እሻታባ ግድኮ ዎሳ ኬት ኪትዳይሳታ፤ ቃስ አሳይ ኤንታ ዱሳ በእድ ክርስቶሳ ቦንቾሶና።

²⁴ ሄሳ ግሾ፥ ዎሳ ኬት ህንተ ሲቁዋነ ኑ ህንተና ናሽያ ናሾይ ቱማ ግደይሳ ቆንጭሳናዉ ህንተ ሲቁዋ ሀ አሳታ በስተ።