2 ቆሮንቶሳ 6 - ጌሻ ማፃፋ

¹ ኑኒ ፆሳራ እስፈ ኦያ አስ ግደይሳዳ፥ ህንተ ኤክዳ አ ኬሀተ ሀዳ ኦና መላ ኑ ህንተና ዎሶስ።

² ፆሳይ፥ “ታ ነና ስአና ዎደን ስአስ፤ አቶተ ጋላሳን ነና ማዳስ” ያጌስ። ሄኮ፥ ታ ስእያ ዎደይ ሀእ፤ አቶተ ጋላሳይ ሀች።

³ ኦንካ ኑ ኦሱዋ ቦራና መላነ ኑናን በታና መላ ኮዮኮ።

⁴ ግዶሽን፥ ኑ ቱማ ፆሳ ኦሳንቾታ ግደይሳ ኑ ኦያ ኡባባን በስዳ። ዳሮ ገንጫን፥ ዋየን፥ መቶን፥ ኡንአን፥

⁵ ጋራፈተን፥ ቃሾን፥ እፆን ኩምዳ ዎጫማን፥ ዳቡራን፥ ስኮ ዮን፥ ፆማን፥

⁶ ጌሻተን፥ ኤራተን፥ ዳንዳአን፥ ኬሀተን፥ ጌሻ አያናን፥ ቱማ ሲቆን፥

⁷ ቱማ ኦዳንነ ፆሳ ዎልቃን ኑኒ እያ ኦሳንቾታ ግደይሳ በስዳ። ቃስ ፅሎተይ ኑስ ቶራነ ጎንዳለ።

⁸ ኑኒ ቦንቸትዳነ ቶሸትዳ፤ ጫየትዳነ ጋላተትዳ። ቱማ ሃሳዮስ፥ ሽን አሳይ ኑና ዎርዳንቾ ግዶሶና።

⁹ ኑ አሳን ኤረትዳ አስ፥ ሽን ኤረቶና አሳ መላ ግድዳ። ሀይቅዶሶና ያገትዳ፥ ሽን ፓፃ ደኦስ፤ ሾጨትዳ፥ ሽን ሀይቅቦኮ።

¹⁰ ኑኒ አዛንኮካ ኡባ ዎደ ኡፋይቶስ። ኑ ማንቆ ዳኖስ፥ ሽን ዳሮ አሳ ዱረዮስ። ቃስ አይኮይካ ባይና አስ ዳኖስ፥ ሽን ኡባይ ኑባ።

¹¹ ቆሮንቶሳ አሳቶ፥ ኑ ህንተዉ ቆንጨን ኦድዳ፤ ኑ ኡሉዋ ህንተና በስዳ።

¹² ህንተ ኑና ህንተ ሲቁዋ በሶና ድግደታፐ አትሽን፥ ኑኒ ኑ ሲቁዋ ህንተና ድግቦኮ።

¹³ አዉ ባ ናይታስ ኦደይሳዳ ታ ህንተዉ ኦዳይስ፤ ኑ ህንተና ኑ ኡሉዋ በስዳይሳዳ፥ ህንተካ ህንተ ኡሉዋ ኑና በስተ።

አማኖና አሳራ ደእያ ጋሄተ

¹⁴ አማኖና አሳራ በሶና ኦገን ዋፀቶፍተ። ፅሎተስነ ናጋራስ አይብ ጋሄተ ደኢ? ፖኦስነ ማስ አይብ እስፈተ ደኢ?

¹⁵ ክርስቶሳነ ፃላሄ እስፈ ጋያባይ አይቤ? ቃስ አማነይስነ አማኖናይስ እስፈ ኮፅያባይ አይቤ?

¹⁶ ፆሳ ኬስ ኤቃታራ አይብ እስፈተ ደኢ? ፆሳይ፥ “ታኒ ኤንታ ግዶን ደአና፥ ኤንታ ግዶን ሄመታና። ታኒ ኤንታ ፆሳ ግዳና፤ ኤንትካ ታ አሰ ግዳና” ግዳይሳዳ፥ ኑኒ ደኦ ፆሳ ኬ።

¹⁷ ሄሳዳካ፥ ጎዳይ፥ “ኤንታ ግዶፈ ሻከትድ ከይተ፤ ቱና ግድዳባ ቦቾፍተ፤ ታ ህንተና ኤካና።

¹⁸ ታ ህንተዉ አዋ ግዳና፤ ህንተ ታዉ አደ ናይታነ ማጫ ናይታ ግዳና፤ ያጌስ ኡባፈ ዎልቃማ ጎዳይ” ያግስ።