2 ቆሮንቶሳ 5 - ጌሻ ማፃፋ

¹ ሀእ ኑ ደእያ ዱንካነ ዳንያ ሀ ሳአ አሳተይ ላለትኮካ፥ አስ ኬፅቦና፥ ፆሳይ ኬፅዳ መርና ኬይ ኑስ ሳሎን ደኤይሳ ኤሮስ።

² ሳሎ አሳተ ማአናዉ አሞትሸ ሀእ ሀ ሳአን ደእሸ ኦሎስ።

³ ኑኒ ሄሳ ማእያ ዎደ ካሎቶኮ።

⁴ ዱንካነ ዳንያ ሀ ሳአ አሳተን ኑ ደእሸ ዴፀትድ ኦሎስ። ሀይቅያ ኑ አሳተይ ደኦን ላመታና መላ ሳሎ አሳተ ማአናዉ ኮዮስፐ አትሽን፥ አሹዋፐ ሻከታናዉ ኮይድ ግደና።

⁵ ኑና ሀይሳስ ጊግስዳይ ፆሳ። ቃስ ስንፈ ያናባስ ኦይ ኦድ ባ አያና ኑስ እሚስ።

⁶ ሄሳ ግሾ፥ ኑኒ ሀ ሳአ አሳተን ደእያ ዎደ ኡባን ጎዳፐ ሃክድ ደኤይሳ ኤርኮካ ኡባ ዎደ አማነትድ ደኦስ።

⁷ ኑኒ ደኤይ አማኖናፐ አትሽን፥ በእያባን ግደና።

⁸ ኑ ሀ ሳአ አሳተፈ ሻከትድ፥ ኑ ሶ ብድ ጎዳራ እስፈ ዳናዉ አሞትያ ግሾ፥ አማነትድ ደኦስ።

⁹ ሄሳ ግሾ፥ ኑ ሀ አሳተን ደእን ዎይኮ ሀ አሳተፈ ሻከትን፥ ኑ አሞይ እያ ኡፋይሳናይሳ።

¹⁰ ኑኒ እሶይ እሶይ ሀ ሳአን ደእሸ ሎኦ ግድን ዎይኮ ኢታ ግድን፥ ኦዳ ኦሱዋስ በሲያ ፕርዳ ኤካናዉ ክርስቶሳ ፕርዳ አራታ ስንን ሺቃና።

አሰ ፆሳራ ስገ

¹¹ ህዛ፥ ጎዳስ ያሺ አይ ጉሰኮ ኑኒ ኤርያ ግሾ፥ አሳይ ኑ ኦደይሳ ኤካና መላ ዞሮስ። ፆሳይ፥ ኑኒ ኦነኮ ኑና ኤሬስ፤ ቃስ ህንተካ ህንተ ካሀን ኑ ኦነኮ ኤሬታ ያጋዳ ቆፓይስ።

¹² ዎዛናን ግዶናሽን፥ ማላን ጬቀትያ አሳ ዶና ኦይናዉ ህንተ ኑናን ጬቀታና መላ ህንተዉ ጋሶ ግዳናዉ ኮዮስፐ አትሽን፥ ኑ ኑና ዛሪድ ናሻናዉ ኮዮኮ።

¹³ ኑ ጎሽ ግድኮ ፆሳ ቦንቾሳ፤ ዎዛናማ ግድኮ ህንተሳ።

¹⁴ እሶይ ኡባስ ሀይቅዳይሳነ ኡባይ ቃስ እያራ ሀይቅዳይሳ ኑ ኤርያ ግሾ፥ ክርስቶሳ ሲቆይ ኑና ሃሬስ።

¹⁵ ደኦን ደኤይሳት ህዛፐ ጉየ ባንታዉ ግዶናሽን፥ ኤንታዉ ሀይቅዳይሳስነ ሀይቆፐ ደንድዳይሳስ ዳና መላ ክርስቶስ አሳ ኡባ ግሾ ሀይቅስ።

¹⁶ ህዛፐ ጉየ፥ ኑኒ ኦናካ አሳ ቆፋን ፕርዶኮ። ሀይሳፈ ካሰ ኑኒ ክርስቶሳካ አሳ ቆፋን በእዳባ ግድኮካ፥ ህዛፐ ሄሳዳ ቤኦኮ።

¹⁷ ሄሳ ግሾ፥ ኦንካ ክርስቶሳን ደእኮ ኦራ መተ፤ ጋልአ መተይ አስ፤ ኡባይካ ኦራ ግድስ።

¹⁸ ሄሳ ኡባ ፆሳይ ኦስ። እ ክርስቶሳ ባጋራ ኑና ባራ ስገስ። ቃስ ሀራታ ባራ ስገና መላ ኑስ ስገ ኦሶ እሚስ።

¹⁹ ፆሳይ ክርስቶሳ ባጋራ አሳ ኡባ ባራ ስገስ። ኤንታ ናጋራ ታይብቤና፤ ቃስ አሳ ባራ ስገያ ቃላ ኑስ እሚስ።

²⁰ ፆሳይ አሳ ኑ ባጋራ ፄግያ ግሾ፥ ኑ ክርስቶሳን ኪተትድ አሳ ፆሳራ ስገትተ ግድ ክርስቶሳ ግሾ፥ ዎሶስ።

²¹ ኑኒ ፆሳ ፅሎተ ክርስቶሳ ባጋራ ኤካና መላ፥ ናጋራ ኤሮና ክርስቶሳ ኑ ግሾ፥ ናጋራንቾ አሳዳ ኦስ።