2 ቆሮንቶሳ 4 - ጌሻ ማፃፋ

መቃ ሚሸን ደእያ ቡቁራ

¹ ህዛ፥ ፆሳይ ባ ማሮተን ሀ ኦሱዋ ኑስ እምዳ ግሾ፥ ኑኒ ኡፋይስ ቃንፆኮ።

² ኑኒ ዬላያ ጌማ ኦሶ ኡባ አግዳ፤ ገነ ኦሶ ኦኮ፤ ፆሳ ቃላ ዎርዶራ ዋላኮኮ። ቱማ ቆንጨን ሃሳይሸ፥ አሳ ኡባ ካሀይ ኑና ኤካና መላ ፆሳ ስንን ኑና ሺሾስ።

³ ኑ ኦድያ ዎንገላይ ጌምዳባ ግድኮካ፥ ጌምዳይ ዮ ኦገን ደእያ አሳሳ።

⁴ ሀ አላምያ ሃርያ ፆሳይ አማኖና አሳ ዎዛና ጎዝስ። ኤንቲ ፆሳ መላ ግድዳ ክርስቶሳ ቦንቾ ዎንገላ ፖኡዋ በኦና መላ ድግስ።

⁵ ኑኒ፥ የሱስ ክርስቶሲ ጎዳ ግደይሳነ ኑ እያ ግሾ ህንተ ኦሳንቾ ግደይሳ ኦዶስፐ አትሽን፥ ኑባ ኦዶኮ።

⁶ “ማን ፖኦይ ፖኦ” ግዳ ፆሳይ፥ ክርስቶሳ ሶምኡዋን ፖእያ ፆሳ ቦንቹዋ ኤራ ፖኡዋ እማናዉ ባ ፖኡዋ ኑ ዎዛናን ፖእስስ።

⁷ ሽን ኡባፈ አያ ዎልቃይ ኑባ ግዶናሽን፥ ፆሳባ ግደይሳ በሳናዉ ሀ ቦንቾ ሻሎይ መቃ ሚሸ ግድዳ ኑ አሳተን ደኤስ።

⁸ ኑ ኡባ ባጋራካ ዋየትዳ፥ ሽን መቀረትቦኮ። ኑስ ሀድርስ ግድስ፥ ሽን ኡፋይስ ቃንፅቦኮ።

⁹ ኑ፥ ሞርከታን ጎደትዳ፥ ሽን ላገ ይቦኮ። ኑ ሞርከታን ሾጨትድ ኩንድዳ፥ ሽን ይቦኮ።

¹⁰ የሱሳ ደኦይ ኑ አሳተን ቆንጫና መላ እያ ሀይቁዋ ኡባ ዎደ ኑ አሳተን ቶክድ ዩዮስ።

¹¹ የሱሳ ደኦይ ሀይቅያ ኑ አሳተን ቆንጫና መላ ፓፃ ደእያ ኑኒ እያ ግሾ፥ ኡባ ዎደ ሀይቆስ አድ እመቶስ።

¹² ህዛ፥ ሀይቆይ ኑናን ኦያ ዎደ ደኦይ ህንተናን ኦስ።

¹³ ጌሻ ማፃፋን፥ “ታ አማናስ፤ ሄሳ ግሾ ኦዳስ” ያገትስ። ሄሳ መላ አማኖይ ኑስ ደእያ ግሾ ሃሳዮስ።

¹⁴ ጎዳ የሱሳ ሀይቆፐ ደንዳ ፆሳይ፥ ኑናካ የሱሳራ ሀይቆፐ ደንናይሳነ ህንተራ እስፈ ባ ስን ሺሻናይሳ ኤሮስ።

¹⁵ ሄስ ኡባይ ሀንዳይ ህንተ ግሾሳ። ፆሳ አ ኬሀተይ ዳሮ አሳ ጋክያ ዎደ አሳይ ፆሳ ቦንቹዋስ ዳሮ ጋላታ እማና።

¹⁶ ሄሳ ግሾ፥ ኑኒ ኡፋይስ ቃንፆኮ። ኑ በንትያ አሳተይ ዳቡርሸ ብያባ ግድኮካ፥ ኑ አያና አሳተይ ጋላስ ጋላስ ኦራፄስ።

¹⁷ ሀእስ ኑኒ ዋየትያ ሀ ካዉሻ ዋየይ፥ ኡባፈ ኬህ ግታትያ መርና ቦንቹዋ ኑስ እምሳና።

¹⁸ ኑኒ በንትያባ ግዶናሽን፥ በንቶናባ ፄሎስ። በንትያባይ ሀእሳ፥ ሽን በንቶናባይ መርናሳ።