2 ቆሮንቶሳ 3 - ጌሻ ማፃፋ

¹ ኑኒ ዛሪድ ኑና ሳቢኖዬ? ዎይኮ ሀራ አሳዳ፥ ሳባ ዳብዳብያ ህንተዉ የዳናዉ ዎይኮ ህንተፈ ኤካናዉ ኑና ኮሽዬ?

² አስ ኡባይ ህንተና ኤራና መላነ ናባባና መላ ህንተ ኑ ዎዛናን ፃፈትድ ደእያ ኑ ዳብዳበ።

³ ህንተ ቃላመን ግዶናሽን፥ ደኦ ፆሳ አያናን፥ ሹቻ ቦላ ግዶናሽን፥ አሳ ዎዛናን ፃፈትዳይሳታነ ኑናን ሀጋዘትዳ ክርስቶሳ ዳብዳበ ግደይሳ በስደታ።

⁴ ኑ ሄሳ ግዳይ፥ ክርስቶሳ ባጋራ ፆሳን አማኖይ ኑስ ደእያ ግሾሳ።

⁵ ኑ ሄሳ ኦናዉ ዳንዳእዳይ ፆሳ ዎልቃናፐ አትሽን፥ ኑኒ ኑ ዎልቃን አይኮካ ኦናዉ ዳንዳኦኮ።

⁶ ኑ ኦራ ጫቁዋ ኦሳንቾታ ግዳና መላ ፆሳይ ኑና ዳንዳእስስ። ሄ ኦራ ጫቆይ ጌሻ አያናን በንትዳይሳፈ አትሽን፥ ፃፈትዳ ህገን ግደና። ህገይ ዎስ፥ ሽን ጌሻ አያናይ ደኦ እሜስ።

⁷ ሹቻ ቦላ ፃፈትዳ ህገይ እመትያ ዎደ ፆሳ ቦንቾይ ቆንጭስ። ሙሰ ሶምኡዋን ደእያ ቦንቾይ ይሸ ብያባ ግድኮካ፥ እስራኤለ አሳይ እያ ሶምኡዋ ትሽ ኦድ ፄላናዉ ዳንዳእቦኮና። ህዛ፥ ሀይቆ ኤህያ ህገይ ሄሳ መላ ቦንቾን ቆንጭኮ፥

⁸ ያትን፥ ጌሻ አያናን ኦሰትያ ኦሱዋ ቦንቾይ ዋንድ አኔ?

⁹ አሳ ቦላ ፕርዳ ኤህያ ህገይ ቦንቾ ግድኮ ያትን፥ አሰ ፅልስያ ኦራ ኦገይ ዋንድ አድ ቦንቸተኔ?

¹⁰ ካሰ ቦንቾ ግድዳይሳ ሀእ አያ ቦንቾይ ደኤይሳራ ጋ በእያ ዎደ ቦንቾይ ባይናባ ግድስ።

¹¹ ጉ ዎደስ ቆንጭድ ጉየፐ ይዳይስ ሀይሳዳ ቦንቸትኮ፥ መርናዉ ደኤይስ ዋንድ አድ ቦንቸተኔ?

¹² ኑስ ሀይሳ መላ ኡፋይሳይ ደእያ ግሾ፥ ዬላቶና ኦደቶስ።

¹³ ኑኒ፥ እስራኤለ አሳይ ይሸ ብያ ቦንቹዋ ዉርሰ በኦና መላ ባ ሶምኡዋ ካምዳ ሙሰ መላ ግዶኮ።

¹⁴ ሽን ኤንታ ዎዛናይ ዶጭስ። ሀች ጋካናዉ ኤንቲ ጋልአ ጫቁዋ ናባብያ ዎደ ኤንታ ዎዛናይ ሄ ካማን ካመትድ ደኤስ። ሄ ካማይ ክርስቶሳ ፃላላን ቃረቴስ።

¹⁵ ሽን ሀች ጋካናዉካ ኤንቲ ሙሰ ማፃፋ ናባብያ ዎደ ኡባን ሄ ካማይ ኤንታ ዎዛና ካሜስ።

¹⁶ ሽን ኦንካ ጎዳኮ ስምያ ዎደ አዉደካ ሄ ካማይ ቃረቴስ።

¹⁷ ጎዳይ አያና፤ ጎዳ አያናይ ደእያ በሳን ላአተ ደኤስ።

¹⁸ ኑኒ ኡባይ ካመትቦና ሶምኦን ጎዳ ቦንቹዋ በአና። ኑኒ አያና ግድዳ ጎዳ ማላ ዳናናዉ ቦንቾፈ ቦንቾን ላመታና።