2 ቆሮንቶሳ 2 - ጌሻ ማፃፋ

¹ ታኒ ናምአን ህንተኮ ቢከ ጋዳ ቆፋ ቃችዳይ ህንተና አዛንና አጋናሳ።

² ታኒ ህንተና አዛንኮካ ታ አዛንዳ ህንተፈ ሀር ታና ኡፋይሳናዉ ደኤይ ኦኔ?

³ ታኒ ህንተዉ ሄ ዳብዳብያ ፃፍዳይ፥ ታ ህንተና በአናዉ ብያ ዎደ ታና ኡፋይሳናዉ በሲያ አሳን ታ አዛናናዉ ኮዮና ግሾሳ። ታ ኡፋይትያ ዎደ ህንተ ኡባይካ ኡፋይታናይሳ ታ አማናይስ።

⁴ ታኒ ዳሮ ዋየንነ ኡንአን ቃስ ዳሮ አፉን ፃፍዳይ፥ ህንተና አዛንናሳ ግዶናሽን፥ ታኒ ህንተና ኡባ አይ መላ ዶስያኮ ህንተና ኤርሳና መላሳ።

ቆህዳ አስ አቶ ጉሱ

⁵ አሰ አዛንዳ ኦንካ ደእኮ ታ እያ ናቁዋ ዳርሳናዉ ኮይከፈ አትሽን፥ ታና ግዶናሽን፥ ህንተፈ ዳሮታ አዛንስ።

⁶ ህንተፈ ዳርያ አሳይ ሄ ኡራ ሴርዳ ሴራይ እያዉ ግዳና።

⁷ ሄሳ ግሾ፥ ሄ ኡራይ ዳሮ አዛንድ፥ ኡፋይስ ቃንፆና መላ ህንተ እያ ማራናዉነ ምንናዉ በሴስ።

⁸ ህንተ እያ ሲቀይሳ ዛር እያዉ ቆንጭሳና መላ ታ ህንተና ዎሳይስ።

⁹ ታ ሄ ዳብዳብያ ህንተዉ ፃፍዳይ፥ ህንተ ፓጨትድ፥ ኡባባን ታዉ ኪተተይሳ ኤራናዉ ኮይዳ ግሾሳ።

¹⁰ ህንተ ማርያ ኡራ ታካ ማራና። ታኒ ማራናባይ አይብ ደእኮካ፥ ክርስቶሳ ስንን ህንተ ግሾ ጋዳ ማራስ።

¹¹ ታኒ ሄሳ ኦዳይ ፃላህያ ጭሞ ኦሱዋ ኑ ኤርያ ግሾ፥ ፃላሄን ጭመቶና አታና መላሳ።

ክርስቶሳን ደእያ ፆኖ

¹² ታኒ ክርስቶሳ ዎንገላ ሳባካናዉ ፅሮኣዳ ብዳ ዎደ፥ ጎዳይ ያን ታዉ ኦሶ ኦገ ጊግስድ ዎስ።

¹³ ሽን ታኒ ታ እሻ ትቶ ያን ደማቦና ግሾ ታ ዎዛናይ ሸምፕቤና። ሄሳ ግሾ፥ ያን ደእያ አሳ ሳሮዳ እያ ኮያናዉ ማቀዶነ ባስ።

¹⁴ ሽን ክርስቶሳ ባጋራ ኡባ ዎደ ኑና ፆኖን ካለያነ ሽቶ መላ ሳውያ ክርስቶሳባ ኑ ኤርያ ትምርትያ ኡባ በሲ ጋና መላ ኦያ ፆሳ ጋላት ጋኮ።

¹⁵ ኑኒ አትያ አሳ ግዶንነ ይያ አሳ ግዶን ክርስቶሳ ባጋራ ፆሳስ እመትዳ ሳውያ ሽቶ መላ።

¹⁶ ያ አሳስ ሀይቆኮ ኤፍያ ሀይቆ ፔኖ፤ ቃስ አትያ አሳስ ደኦኮ ኤፍያ ደኦ ሳዎ፤ ያትን፥ ሄሳ መላ ኦሶስ ግዳናይ ኦኔ?

¹⁷ ኑኒ ፆሳ ቃላ ዎ ደማናዉ ኮይድ ዋላክድ ዛልእያ ዳሮ አሳ መላ ግዶኮ። ሽን ፆሳይ ኪትዳ ሱረ አሳታ መላ ክርስቶሳን ደእድ ፆሳ ስንን ቃላ ኦዶስ።