2 ቆሮንቶሳ 12 - ጌሻ ማፃፋ

ጳዉሎስ በእዳ ቆንጨ

¹ ጬቀተስ ጎእ ባይናይሳ ኤራይስ። ሽን ጬቀታናዉ ኮሽኮ፥ ጎዳፐ ኤክዳ ቆንጨን ጬቃና።

² ታማነ ኦይዱ ላይፈ ካሰ፥ ክርስቶሳ አማንያ እስ ኡራይ ሄን ሳሉዋ ብዳይሳ ታ ኤራይስ። ሄ ኡራይ አሾን ዎይኮ አሾፐ ካረራ ብዳኮ ታ ኤርከ፤ ፆሳይ ኤሬስ።

³ ሄ ኡራይ ሄን ሳሉዋ ኤከትዳይሳ ኤራይስ። ሽን እ አሾን ዎይኮ አሾፐ ካረራ ኤከትዳኮ ታ ኤርከ፤ ፆሳይ ኤሬስ።

⁴ ሄ ኡራይ ጋናተ ኤከትድ አስ ቆንጭሳናዉነ አስ ኦዳናዉ ዳንዳኦናባ ስእስ።

⁵ ታኒ ሄ አድያባን ጬቀታና፥ ሽን ታኒ ታ ዳቡራፐ አትሽን፥ ታናን ጬቀትያባይ ባዋ።

⁶ ታኒ ቱማ ኦደትያ ግሾ፥ ጬቀታናዉ ኮይኮካ ኤያ ግድከ። ሽን አስ ታ ኦይሳ በኤይሳፈነ ስኤይሳፈ አድ ቆፖና መላ ጋዳ ጬቀተ አጋይስ።

⁷ ታዉ ቆንጭዳ ግታ ቆንጨን ታ ኦቶርቶና መላ ታና ዋይሳናዉ ታ አሹዋን ጫድያ ፃላህያ ኪታንቾይ ታዉ እመትስ።

⁸ ሀ ዋይስያባ ታፐ ድጋና መላ ታኒ ጎዳ ሄ ቶሆ ዎሳስ።

⁹ ሽን ጎዳይ፥ “ታ ዎልቃይ ነ ዳቡራን ቆንጭያ ግሾ ታ አ ኬሀተይ ነዉ ግዳና” ያግስ። ክርስቶሳ ዎልቃይ ታናን ቆንጫና መላ ታ ዳቡራን ኡፋይታሸ ጬቀታይስ።

¹⁰ ታኒ ክርስቶሳ ግሾ፥ ዳቡርያ ዎደ ጫየትያ ዎደ ዋየትያ ዎደ ጎደትያ ዎደ መቶትያ ዎደ ታ ዳቡራን ኡፋይታይስ። አይስ ጊኮ፥ ታ ዳቡርያ ዎደ፥ ሄ ዎደ ምናይስ።

ጳዉሎስ ቆሮንቶሳ አሳስ ቆፔስ

¹¹ ታኒ ኤያ አሳዳ ጬቀታስ። ሄሳዳ ታ ጬቀታና መላ ኦዳይ ህንተና። ታ፥ ታ ሁጰን ኤረቶና አስ ግድኮካ፥ “ግታ ሀዋረታ” ጌተተይሳታፐ ጉፅከ። ሄሳ ታዉ ማርካታናዉ በሰይ ህንተናሽን።

¹² ታ ህንተ ግዶን ደአሸ ዳንዳአን ኦዳ ማላታትነ ማላት ታ ቱማ ሀዋረ ግደይሳ በሶሶና።

¹³ ታ ህንተዉ ቶሆ ግዶናይሳፈ አትሽን፥ ሀራ ዎሳ ኬታፐ ህንተ አይብን ጉፅደቲ? ሄስ ባላ ግድኮ ታና ማርተ።

¹⁴ ታኒ ህንተኮ ባናዉ ጊገትሽን ሀይስ ታዉ ሄን። ታ ህንተናፐ አትሽን፥ ህንተዉ ደእያባ ኮዮና ግሾ ህንተና ዋይሳናዉ ኮይከ። የልዳይሳት ባንታ ናይታስ ሻሎ ምንጆሶናፐ አትሽን፥ ናይት ባንታና የልዳይሳታስ ሻሎ ምንጆኮና።

¹⁵ ታ ህንተ ግሾ፥ ታዉ ደእያባነ ታና አ እምንካ ታና ኡፋይሴስ። ያትን፥ ታኒ ህንተና ሄሳዳ ኬሀ ሲቅያ ዎደ ህንተ ታና ጉራ ሲቀቲ?

¹⁶ ግድኮካ፥ ታ ህንተዉ ቶሆ ግድከ፤ ዋይሳብከ፤ ሽን ህንተና ጭሞንነ ገነን ኦይክዳባ ህንተዉ ዳኖና አገና።

¹⁷ ሀር አቶሽን፥ ታ ህንተኮ ኪትዳ አሳታፐ ህንተና ጭምዳ አስ ደኢ?

¹⁸ ትቶይ ህንተኮ ባና መላ ታኒ ዎሳስ፤ ቃስ አማንያ እሻካ እያራ የዳስ። ያትን፥ ትቶይ ህንተና ጭምዴ? ኑኒ ኑ ኦሱዋ እስ አያናን ኦቦኮ? ቃስ ኑ ሀኖይካ እስኖ ግደኔ?

¹⁹ ኑ ኡባ ዎደ ህንተ ስንን ኑና ፅልሳናዉ ሞተትያባ ህንተዉ ዳኒ? ኑ ክርስቶሳን ደእድ ፆሳ ስንን ሀእ ጋካናዉ ኦዶስ። ኑ ሲቆ እሻቶ፥ ኑ ሀ ኡባ ኦይ ህንተና ድቻናሳ።

²⁰ ታ ህንተኮ ብያ ዎደ ኦን ኤር ህንተ ታ ኮየይሳዳ ሀኖና፥ ቃስ ታካ ህንተ ኮየይሳዳ ሀኖና ጋሄቶና አጎኮ ጋዳ ያያይስ። ቃስ ኦን ኤር ህንተ ግዶን ፓላም፥ ቃናተይ፥ ሀንቆይ፥ ዪቀይ፥ ዝግርስ፥ አሳ ሱን ኢሶይ፥ ኦቶሮይነ ካች ዶና አገና ጋዳ ያያይስ።

²¹ ታኒ ናምአን ህንተኮ ብያ ዎደ ፆሳይ ህንተ ስንን ታና ካዉሻና ጋዳ ያያይስ። ካሰ ናጋራ ኦድ ሄ ባንታ ኦዳ ቱናተፈ፥ ላይማተፈነ ዬላይያ ኦሱዋፐ ስምቦና አሳታ በአዳ አዛኖና አግከ ጋዳ ያያይስ።