2 ቆሮንቶሳ 11 - ጌሻ ማፃፋ

ጳዉሎሳነ ዎርዶ ሀዋረታ

¹ ታ ጉ ኤያተ ህንተ ሀእካ ዳንዳአና ጋዳ ቆፓይስ፤ ሀያና ዳንዳእተ።

² ፆሳይ ህንተዉ ቆፕዳይሳዳ፥ ታካ ህንተዉ ቆፓይስ። ታኒ ህንተና ጌሻ ጌላእዳ እስ አድያ፥ ክርስቶሳስ እማናዉ ኦይቻ ዎስ።

³ ሽን ሾሻይ ባ ገንያን ሄዋኖ ባለዳይሳዳ ኦን ኤር ህንተ ዎዛናይ ኢትድ ክርስቶሳስ ደእያ ህንተ ሱረተነ ጌሻተ አጋንደት ጋዳ ህርጋይስ።

⁴ እስ አስ ይድ፥ ኑኒ ህንተዉ ማርካትዳ የሱሳፐ ሀራ የሱሳ ህንተዉ ማርካትኮ፥ ዎይኮ ህንተ ኤክዳ አያናፐነ ዎንገላፐ ሀራ አያናነ ዎንገላ ህንተዉ ኦድኮ፥ ስእ ግድ ኤኬታ።

⁵ ሽን ታኒ የሱሲ ኪትዳ “ግታ ሀዋረታ” ገተትድ ፀገተይሳታፐ ጉፃይስ ጋዳ ቆፕከ።

⁶ ታኒ ኦዳ ኤሮና አስ ግድኮካ፥ ኤራተ ታዉ ደኤስ። ሄሳ ታ ህንተዉ ዳሮ ኦገን ቆንጭሳስ።

⁷ ታኒ ሚሸ ኦይቾና ፆሳ ዎንገላ ህንተዉ ጮ ኦድዳይስነ ህንተና ቁ ኦዳ ታና ቶችዳይስ ታዉ ናጋራ ግዲ?

⁸ ታኒ ህንተዉ ኦናዉ ሀራ ዎሳ ኬታፐ ሚሸ ቦንቃ ኤካስ።

⁹ ታ ህንተራ ደእያ ዎደ ታና መትንካ ህንተፈ እስ አስካ ዋይሳብከ። ማቀዶነፐ ይዳ አማነይሳት ታና ኮሽያባ ኡባን ማድዶሶና። ሀች ጋካናዉ ታ ህንተዉ ቶሆ ግዳብከ ስንስካ ቶሆ ግድከ።

¹⁰ ክርስቶሳ ቱማተይ ታናን ደእሽን፥ ታ ጬቁዋ አካያ ቢታን ታና ኦንካ ድገና።

¹¹ ታ ሀይሳ አይስ ጋይና? ህንተና ዶሶና ግሾዬ? ታኒ ህንተና ዶሰይሳ ፆሳይ ኤሬስ።

¹² “ኑካ ህንተ መላ ኦስ” ያግድ ጬቅያ ሀንኮ ሀዋረታ ጬቁዋ ጋሱዋ ይሳናዉ ሀእ ታ ኦይሳ ስንስካ ኦና።

¹³ ሀይሳ መላ አሳት ክርስቶሳ ሀዋረ ዳናናዉ ባንታና ላምያ ዎርዳንቾ ሀዋረታነ ጭምያ ኦሳንቾታ።

¹⁴ ሄስ ማላልስያባ ግደና፤ አይስ ጊኮ፥ ፃላሄይ ፖኦ ኪታንቾ ዳናናዉ ባና ላሜስ።

¹⁵ ሄሳ ግሾ፥ ፃላሄ ኦሳንቾት ፅሎተ ኦሳንቾታ ዳናናዉ ባንታና ላምኮ ሄስ ግታባ ግደና። ኤንቲ ዉርሰን ባንታ ኦሱዋዳ ኤካና።

ጳዉሎሳ ጋክዳ መቶ

¹⁶ ኦንካ ታና ኤያ ግድ ቆፖና መላ ዛራዳካ ኦዳይስ። ታ ህንተዉ ኤያ ዳንኮካ ታ ጉራ ጬቀታና መላ ታና ኤያ ኦድ ኤክተ።

¹⁷ ታኒ ሀይሳዳ ጬቀታዳ ኦደተይ፥ ጎዳይ ኮየይሳዳ ግዶናሽን፥ ኤያተን ኦዳይስ።

¹⁸ ዳሮ አሳይ ሀ ሳአባን ጬቀትያ ግሾ፥ ታካ ጬቀታና።

¹⁹ ህንተ ዎዛናማ ግድያ ግሾ፥ ኤያ አሳባ ኡፋይሳን ዳንዳኤታ።

²⁰ ኦንካ ህንተና አይለይኮ ዎይኮ ህንተና ቦንቅኮ ዎይኮ ባዉ ማደታናዉ ህንተኮ ሺቅኮ ዎይኮ ህንተ ቦላ ኦቶርትኮ ዎይኮ ህንተና ባቅኮ ህንተ ዳንዳኤታ።

²¹ ኑኒ ሄሳ ኦናዉ ዳሮ ዳቡራንቾ ግደይሳ ዬላታሸ ታ ኦዳይስ። ሽን ኦንካ ምንድ ጬቀትኮ፥ ታካ ጬቀታናዉ ምናይስ። ታኒ ሄሳ ኤያ አሳዳ ኦደታይስ።

²² ኤንቲ እብራዌ? ታካ እብራወ። ኤንቲ እስራኤሌ? ታካ እስራኤለ። ኤንቲ አብራሃመ ሼሼ? ታካ አብራሃመ ሼሽ።

²³ ኤንቲ ክርስቶሳ ኦሳንቾ? ታኒ ጎሻ አሳዳ ኦዳይስ፥ ኤንታፈ አያ ክርስቶሳ ኦሳንቾ። ታኒ ኦሶን ዳሮ ዳቡራስ፤ ዳሮ ዎደ ቃሸታስ፤ ጋራፈታስ፤ ዳሮ ዎደ ሀይቆፐ አታስ።

²⁴ አይሁደት ታና ሀስታማነ ኡዱፉና እቻሹ ቶሆ ጋራፍዶሶና።

²⁵ ሄ ቶሆ ፃምአን ሾጨታስ፤ እስ ቶሆ ሹቻን ጫደታስ፤ ማርካበይ ሄ ቶሆ መእስ፤ አባ ግዶን እስ ቃማ ኩመ አቃዳ ፔአስ።

²⁶ ታኒ ዳሮ ኦግያ ዳቡራን ሄመታስ። ክፃ ሃፈነ ፓንጋፈ አታስ። አይሁደትነ አይሁደ ግዶና አሳይ ታ ቦላ መቶ ጋዶሶና። ካታማይ፥ ባዞይ፥ አባይ፥ ታና ያሽስ፤ አማንያ ዳንያ አሳት ታና ዋይስዶሶና።

²⁷ ታኒ ኦሶን ዳቡራስነ ጫዋታስ፥ ዳሮ ቶሆ ስኮ ያስ፥ ኮሻታስ፥ ሳሞታስ፥ ዳሮ ቶሆ ፆማስ፥ ሜገታስ፥ ካሎታስ።

²⁸ ሀራባ ኡባ ታይቦና ኡባ ዎደ ታና ቆፍሰይ ዎሳ ኬታባ።

²⁹ እስ አስ ዳቡርያ ዎደ እያራ ታ ዳቡራብክና? እስ አስ ናጋራን በትያ ዎደ ታ አዉደ ቂሮቶና አጋድና?

³⁰ ታ ጬቀታናዉ ኮሽያባ ግድኮ ታኒ ዳቡራንቾ ግደይሳ ኤርስያባን ጬቀታና።

³¹ መርናዉ ቦንቸትዳ ፆሳይ፥ ኑ ጎዳ የሱስ ክርስቶሳ አዋይ፥ ታ ዎርዶቶናይሳ ኤሬስ።

³² ዳማስቆ ካታማን ካዋ አርስፆሳፐ ጋርሳራ ሃረይስ ታና ኦይናዉ ኮይድ ዳማስቆ ካታማ ፐንግያ ናግስስ።

³³ ሽን አሳይ ታና ዳቾን የግድ፥ ካታማ ድርሳ ማስኮትያራ ዎስን ታኒ እያ ኩሽያፐ አታስ።