2 ቆሮንቶሳ 10 - ጌሻ ማፃፋ

ጳዉሎስ ሞትያ አሳስ ዛርዳ ዛሩዋ

¹ ታኒ ህንተራ ደእያ ዎደ፥ “ሹጎ”፥ ቃስ ህንተፈ ሃክያ ዎደ “ኑ ቦላ ምኔስ” ያገትዳ፥ ጳዉሎስ፥ ኬሀነ አሽከ ግድዳ ክርስቶሳ ሱንን ህንተና ዎሳይስ።

² ታኒ ህንተኮ ብያ ዎደ ኑ አሾ ቆፋራ ስመረትያ አስ ኦድ ቆፕያ አሳ ቦላ ምኖ ቃላን ኦደታናዉ ቆፋ ቃቻስ። ህንተ ቦላ ሄሳዳ ኦደታና መላ ህንተ ታና ኦናዳ ህንተና ዎሳይስ።

³ ኑኒ ሀ ሳአን ደእኮካ ሀ ሳኣ አሳዳ ኦለቶኮ።

⁴ ኑ ኦላ ሚሸይ ሀ ሳአባ ግደና። ሽን ሚፃ ላላናዉ ዎልቃራ ደእያ ፆሳ ቶራ። ቱማራ ኤቀትያ ፓላማነ፥

⁵ ፆሳ ኤራተ ቦላ ኦቶሮን ደንድያ ፓላማነ ሀዳ ቆፋ ኡባ ላሎስ። አሳ ቆፋ ኡባ ድእድ ክርስቶሳስ ኪተታና መላ ኦስ።

⁶ ህንተ ኪተተይ ፖሎ ግድያ ዎደ ኑኒ ኪተተ እፆ ኡባ ሴራናዉ ጊገታና።

⁷ ህንተ አይፈይ በእዳ መላ ፕርደታ። ኦንካ ባና ክርስቶሳባ ግድ ቆፕያባ ግድኮ፥ ኑካ ክርስቶሳባ ግደይሳ ኤሮ።

⁸ ጎዳይ ታዉ እምዳ ማታን ጬቀትኮካ ሄሳን ዬላትከ። ሄ ማታይ ታዉ እመትዳይ ህንተና ድቻናሳፈ አትሽን፥ ቆሀናሳ ግደና።

⁹ ታኒ ታ ዳብዳብያን ህንተና ያሽሳናዉ ኮያዳ ፃፍዳባ ዳኖፖ።

¹⁰ እስ እስ አሳይ፥ “ጳዉሎሳ ዳብዳበይ ዴፆነ ዎልቃማ፥ ሽን እያ ሶምኦን በእያ ዎደ እ ዳቡራንቾ፤ እያ ኦዳይካ ፓና” ያጎሶና።

¹¹ ሄ አሳት ኑ ሃሆን ደእሸ ፃፍያ ዳብዳብያንነ ማታን ህንተራ ደእሸ ኦያ ኦሱዋ ግዶን ዱማተ ባይናይሳ አኬኮ።

¹² ኑኒ ባንታና ናሽያ አሳታራ ኑና ግናያናዉ ዎይኮ ጋደያናዉ ኮዮኮ። ሽን ኤንቲ ባንታና ባንታራ ግናይድ ዎይኮ ጋደይድ በእሸ ኤያ።

¹³ ሽን ኑኒ ፆሳይ ኑስ እምዳ ሳን ጬቀቶስፐ አትሽን፥ ዛዋ ፕንድ ጬቀቶኮ፤ ሄ ዛዋይ ህንተኮካ ጋኬስ።

¹⁴ ኑኒ በሰይሳፈ አድ ጬቀቶኮ፥ ሽን ክርስቶሳ ዎንገላ ህንተኮ ጋዳይሳን ጬቀቶስ።

¹⁵ ኑኒ ፆሳይ ኤስዳ ዛዋፐ ፕንድ፥ ሀራት ኦዳ ኦሶን ጬቀቶኮ። ግዶሽን፥ ህንተ አማኖይ ድጫና መላ ፆሳይ እምዳ ዛዋን ህንተ ግዶን ኑ ኦያ ኦሶይ ዳልጋና ግድ ቆፖስ።

¹⁶ ኑኒ ሀራ አስ ባ ዛዋን ኦዳ ኦሶን ገልድ ጬቀቶኮ፥ ሽን ህንተፈ ፕንድ ሀራታስ ዎንገላ ማርካታናዉ ዳንዳኦስ።

¹⁷ ሽን፥ ጌሻ ማፃፋን፥ “ጬቅያ ኡባይ ጎዳ ሎኦተን ጬቆ” ያግድ ፃፈትስ።

¹⁸ ጎዳይ ናሽያ ኡራፐ አትሽን፥ ባና ባዉ ናሽያ ኡራይ ናሸተና።