1 Taarike 21 - ጌሻ ማፃፋ

ዳዊቲ አሳ ታይብስ

¹ ፃለሄይ እስራኤለ ቦላ መቶ ኤሀናዉ ኮይድ፥ ዳዊቲ እስራኤለ አሳ ታይባና መላ ደንስ።

² ዳዊቲ እዮኣባኮነ ቶራ ሞጮናታኮ፥ “ዳነፐ በርሳበ ጋካናዉ ብድ፥ እስራኤለ አሳ ታይብተ። ያትድ፥ አሳ ታይቦይ አፑነኮ ታና ኤርስተ” ያግስ።

³ ሽን እዮኣብ፥ “ጎዳይ፥ ሀ ደእያ ባ አሳ ቦላ ፄቱ ኩሸ ጉጆ! ታ ጎዳዉ፥ ካዋዉ፥ ኤንቲ ኡባይ ታ ጎዳ አይለታ ግዶኮናዬ? ታ ጎዳይ ሄሳ መላባ ኦናዉ አይስ ኮዪ? እስራኤለ ቦላ አይስ ባላ ኦይ?” ያግስ።

⁴ ሽን ካዋ ቃላይ እዮኣባ ፆንን፥ እዮኣብ ከይድ እስራኤለ ቢታ ኡባ ዩይድ የሩሳላመ ስምስ።

⁵ እዮኣብ ታይብዳ አሳ ታይቡዋ ዳዊታስ እሚስ። እስራኤለ ቢታ ኡባን ማሻን ኦለታናዉ ዳንዳእያ እስ 1,100,000 አሳት ደኦሶና። ቃስ ይሁዳ ቢታን ማሻን ኦለታናዉ ዳንዳእያ 470,000 አሳት ደኦሶና።

⁶ እዮኣብ ካዋ ኪታ ዶስቦና ግሾ ሌወታነ ብንያመ ኮቻታ ታይቤና።

⁷ ፆሳይ ሄሳን ኡፋይትቦና ግሾ እስራኤለ ሴርስ።

⁸ ዳዊቲ ፆሳኮ፥ “ታኒ ሀይሳን ግታ ናጋራ ኦስ። ሽን ሀእ ነና ዎሳይስ፤ ነ አይልያ ናጋራ አቶ ጋ፤ ታኒ ዳሮ ኤያባ ሀናስ” ያግስ።

⁹ ጎዳይ ዳዊታ ቆንጨ በእያ ጋደኮ ሀይሳዳ ያግስ፤

¹⁰ “ባዳ ዳዊታኮ፥ ጎዳይ፥ ‘ታኒ ነና ሄ ዶሮ በሳይስ፤ ታኒ ነ ቦላ ኦና መላ ኤንታፈ ታዉ እሱዋ ዶራ’ ያጌስ” ያጋ።

¹¹ ጋድ ዳዊታኮ ብድ፥ “ጎዳይ ሀይሳታፐ እሱዋ ዶራ ያጌስ፤

¹² ሄ ላይ ኮሻ ዎይኮ ሄ አጌና ነ ሞርከታ ኩሸን አዳ እመታናይሳ ዎይኮ ሄ ጋላስ ጎዳ ማሻይ ነ ቢታ ሾጫናይሳነ ጋዶ እስራኤለ ቦላ ኤህያ ሀይቆ ኪታንቾ ኪተይሳፈ አዉሳ ዶራይ? ታና ኪትዳይሳስ ኦዳናባ ታዉ ኦዳ” ያግስ።

¹³ ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ ታኒ እያ ኩሸን ኩንዳና፤ አሳ ኩሸን ኩንድከ” ያግስ።

¹⁴ ሄሳ ግሾ፥ ጎዳይ እስራኤለ ቦላ ጋዶ የድን፥ 70,000 እስራኤለ አሳት ሀይቅዶሶና።

¹⁵ ፆሳይ የሩሳላመ ይሳናዉ ኪታንቾ ኪትስ። ሽን ኪታንቾይ የሩሳላመ ይሳናዉ ዶምዳ ዎደ ጎዳይ አዛንስ። ይስያ ኪታንቹዋኮ፥ “አጋ! ህዛ ግዳና!” ያግስ። ሄ ዎደ ጎዳ ኪታንቾይ ያቡሰ አድያ ኦርና ዉዱማ ማታን ኤቅስ።

¹⁶ ኪታንቾይ ባ ማሻ ባ ኩሸን ኦይክድ የሩሳላመ ይሳናዉ ሳአፐነ ሳሎፐ ግዶን ኤቅዳይሳ ዳዊቲ በእስ። ሄ ዎደ ዳዊቲነ ጭማት ካዮ ማኦ ማእድ፥ ሳአን ጉፋንዶሶና።

¹⁷ ዳዊቲ፥ “አሳይ ታይበታና መላ ኦዳይ ታና ግድክና? ናቅዳይነ ኢታባ ኦዳይ ታና። ሽን ሀ ዶርሳት አይ ኦዶና? አቤት ጎዳዉ፥ ታ ፆሳዉ፥ ሀያና ነ ኩሸይ ታናነ ታ ሶ አሳ ሴሮ። ነ ኩሸይ ነ አሳ ሴሮፖ!” ያግስ።

¹⁸ ጎዳ ኪታንቾይ ጋደኮ ሀይሳዳ ያግስ፤ “ዳዊቲ ያቡሰ አድያ ኦርና ዉዱማ ብድ ጎዳስ ያርሾ በሲ ግምባና መላ ኦዳ” ያግስ።

¹⁹ ጎዳ ሱንን ጋድ ኦድዳይሳ ስእድ ዳዊቲ ብስ።

²⁰ ሄ ዎደ ኦርንነ እያ ኦይዱ አደ ናይት ዉዱማን ግስተ ቆፆሶና። እ ጉየ ስሚድ ኪታንቾ በእስ፤ እያራ ደእያ ኦይዱ ናይት በእድ ቆሰትዶሶና።

²¹ ዳዊቲ ኦርናኮ ይዳ ዎደ ኦርን እያ በእድ፥ ዉዱማፈ ጋፃ ከይድ ዝግድ ሳሮስ።

²² ዳዊቲ፥ “ጋዶይ አሳ ቦላፈ ክቻና መላ ታኒ ጎዳስ ያርሾ በሲ ኬፃና መላ ነ ዉዱማ ታዉ ባይዛ። ታኒ ነዉ ኩመ ጋትያ ቃንፃና” ያግስ።

²³ ኦርን፥ “ኤካ፤ ታ ጎዳይ ካዎይ ባና ኡፋይስያባ ኦ። ሄኮ፥ ቦራት ፁሳ ያርሾስ፥ ካ ቡክያ ሚሽያ ኤናዉ፥ ግስተ ካ ያርሾስ እማና። ታኒ ሀ ኡባ ነዉ እማና” ያግስ።

²⁴ ሽን ካዎይ ዳዊቲ፥ “አካይ፥ ታኒ ኩመ ጋተ ቃንፃዳ ሻማና። ታኒ ነባነ ታ ሚሸን ሻሞናባ ኤካዳ ፁሳ ያርሾ ኦዳ ጎዳስ ያርሽከ” ያግስ።

²⁵ ዳዊቲ ዉዱማ ኡሱፑን ፄቱ ዎርቃ ሳንትመን ሻምስ።

²⁶ ዳዊቲ ያን ጎዳስ ያርሾ በሲ ኬፅስ። ያትድ ፁሳ ያርሾነ እስፈተ ያርሾ ያርሽስ። ጎዳ ዎስን፥ ጎዳይ ፁሳ ያርሹዋ ቦላ ሳሎፐ ታማ የድድ እያዉ ዛርስ።

²⁷ ጎዳይ ኪታንቹዋ ኪትን፥ ኪታንቾይ ባ ማሻ ሾሁዋን ዛርስ።

²⁸ ዳዊቲ፥ ጎዳይ እያ ዎሳ ዛርዳይሳ በእድ፥ ያቡሰ አድያ ኦርና ዉዱማን ዛሪድ ያርሽስ።

²⁹ ሙሰይ መላ ቢታን ጊግስዳ፥ ጎዳ ዱንካነይነ ፁሳ ያርሾ በሳይ ሄ ዎደ ጋባኦናን ጎይንያ ቃ በሳን ደኤስ።

³⁰ ሽን ዳዊቲ ጎዳ ኪታንቹዋ ማሻ ያይዳ ግሾ ፆሳ ኦይቻናዉ ሄ በሳ ባናዉ ዳንዳእቤና።