1 Taarike 13 - ጌሻ ማፃፋ

ታቦተይ እስራኤለ ስምስ

¹ ዳዊቲ ሻላቃታራነ ማቶ ሀላቃታራ ዞረትስ።

² እስራኤለ አሳ ኡባ፥ “ህንተዉ ሎኦ ዳንያባ ግድኮነ ጎዳ ኑ ፆሳ ሸነ ግድኮ፥ እስራኤለ ቢታ ጋፃን ደእያ ኑ ዳቦት፥ ሄሳዳካ ባንታ ካታማታንነ ሄን በሳታን ደእያ ካህነትነ ሌወት ኑኮ ሺቃና መላ አሰ ኪቶስ።

³ ሳኦላ ካዎተ ዎደ ቀል ጌተትዳ ኑ ፆሳ ታቦትያ አነ ዛሪድ ኤሆስ” ያግስ።

⁴ ዳዊታ ኦዳይ ሎኦ ግድዳ ግሾ አሳ ኡባይ ማእስ።

⁵ ሄሳ ግሾ፥ ዳዊቲ ፆሳ ታቦትያ ቅርያት-ይኣርመፐ ኤሀና መላ ግብፀ ዛዋፐ ዶምድ ሀማታ ፕኖ ጋካናዉ ደእያ እስራኤለ አሳ ኡባ ሺሽስ።

⁶ ዳዊቲነ እስራኤለ አሳ ኡባይ ክሩበታፐ ግዶን ባ አራታ ቦላ ኡትዳ ጎዳ ሱንይ ፄገትዳ ፆሳ ታቦትያ ኤሀናዉ ይሁዳ ቢታን ደእያ ባላ ጌተትያ ቅርያት-ይኣርማ ብዶሶና።

⁷ ፆሳ ታቦትያ ኦራ ፓራ ጋረን ዎድ፥ አምናዳበ ሶፐ ኤህዶሶና፤ ኦዝነ አህዮይ ጋርያ ላጎሶና።

⁸ ዳዊቲነ እስራኤለ አሳ ኡባይ ዲነ ማስንቆ ካእሸ፥ ካራቦ ባቅሸ፥ ዳላ ጊርስሸ፥ ዛየ ፑንሸ ባንታ ኩመ ዎልቃን ፆሳ ስንን ኡፋይትድ፥ የፅሸ ፆሳ ቦንችዶሶና።

⁹ ኤንቲ ክዶና ዉዱማ ጋክያ ዎደ ቦራት በትዳ ግሾ ኦዝ ታቦትያ ኦይካናዉ ባ ኩሽያ የድስ።

¹⁰ ኦዛ ኩሸይ ታቦትያ ቦችዳ ግሾ፥ ጎዳ ሀንቆይ ኦዛ ቦላ ኤፅስ። ሄሳ ግሾ፥ ጎዳይ እያ ፃድክን፥ እ ሄ በሳን ፆሳ ስንን ሀይቅስ።

¹¹ ጎዳይ ሀንቀትድ ኦዛ ዎዳ ግሾ፥ ዳዊቲ ይሎትስ። ሀች ጋካናዉ ሄ በሳይ ኦዝ ከትዳ በሳ ጌተቴስ።

¹² ሄ ጋላስ ዳዊቲ ፆሳ ያይዳ ግሾ፥ “ፆሳ ታቦትያ ታኮ ዋታ ኤሀናዉ ዳንዳእያና?” ያግስ።

¹³ ዳዊቲ ታቦትያ የሩሳላመ ኤፋናፐ ግድ ጋተ አድያ አብዳራ ሶ ኤፍስ።

¹⁴ ፆሳ ታቦተይ አብዳራ ሶን እያ ሶ አሳራ ሄ አጌና ጋምእስ። ጎዳይ እያ ሶ አሳነ እያዉ ደእያ ኡባ አንጅስ።