1 Sameela 7 - ጌሻ ማፃፋ

¹ ቅርያት-ይኣርማ አሳይ ይድ፥ ጎዳ ታቦትያ ኤፍድ ደረ ሁጰን ደእያ አምናዳበ ሶን ዎዶሶና። ጎዳ ታቦትያ ናጋና መላ አምናዳበ ናኣ አላዛራ ዱማይድ ሱንዶሶና።

ሳሜላ ሹመተ

² ታቦተይ ቅርያት-ይኣርማን ዳሮ ዎደ ጋምእስ፤ ያን ላታሙ ላይ ኡትስ። እስራኤለ አሳ ኡባይ አዛንድ ጎዳ ኮይዶሶና።

³ ሳሜል እስራኤለ አሳኮ፥ “ኩመ ዎዛናፐ ህንተ ጎዳኮ ስምዳባ ግድኮ፥ አላጋ ፆሳታነ አስታሮተ ኤቃ ህንተ ግዶፈ ድግተ። ህንተናተ ጎዳስ ሼተ፤ እያ ፃላላስ ኪተትተ፤ እ ህንተና ፍልስፄመታ ኩሸፐ አሻና” ያግስ።

⁴ ሄሳ ግሾ፥ እስራኤለ አሳይ ባኣለነ አስታሮተ ኤቃ ባንታ ግዶፈ ድግድ፥ ጎዳ ፃላላ ጎይንዶሶና።

⁵ ሄሳፈ ጉየ፥ ሳሜል፥ “እስራኤለታ፥ ኡባይ ምፅጳ ሺቅተ፤ ታኒ ያን ህንተዉ ጎዳ ዎሳና” ያግስ።

⁶ ኤንቲ ምፅጳ ሺቅድ ሃ ዱቅድ፥ ጎዳ ስንን ጉስዶሶና፤ ሄ ጋላስ ፆምዶሶና፤ ሄ በሳን፥ “ኑኒ ጎዳ ቦላ ናጋራ ኦዳ” ያግድ ፓፅዶሶና። ምፅጳን ሳሜል እስራኤለ አሳ ቦላ ዳይናትስ።

⁷ እስራኤለት ምፅጳን ሺቅዳይሳ ፍልስፄመ አሳይ ስእዳ ዎደ ኤንታ ኦላናዉ ከይዶሶና። እስራኤለት ሄሳ ስእድ፥ ፍልስፄመታስ ያይዶሶና።

⁸ እስራኤለ አሳይ ሳሜላኮ፥ “ፍልስፄመ አሳ ኩሸፐ ኑና አሻና መላ ኔኒ ጎዳ፥ ኑ ፆሳ ዎሳ አጎፋ” ያግዶሶና።

⁹ ሳሜል እስ ምያ ዶርሳ ናአ ኤክድ፥ ኩመ ፁሳ ያርሾ ኦድ ጎዳስ ያርሽስ፤ እስራኤለ አሳ ግሾ ጎዳ ዎስስ፤ ጎዳይ እያ ዎሳ ስእስ።

¹⁰ ሳሜል ፁሳ ያርሾ ያርሽያ ዎደ ፍልስፄመት እስራኤለታ ኦላናዉ ሺቅዶሶና። ሽን ሄ ጋላስ ፍልስፄመታ ቦላ ጎዳይ ግታ ዳዳ ጉንድ ዳጋንን፥ ኤንቲ እስራኤለታ ስንፈ ባቃትዶሶና።

¹¹ እስራኤለት ምፅጳፈ ከይድ፥ ፍልስፄመታ የደድ፥ ቤት-ካራፐ ጋርሳ ባጋራ ደእያ በሳ ጋካናዉ ኦገ ቦላ ዎዶሶና።

¹² ሄሳፈ ጉየ፥ ሳሜል እስ ሹቹ ኤክድ፥ ምፅጳፈነ ሸናፐ ግዶን ኤስስ፤ “ሀእ ጋካናዉ ጎዳይ ኑና ማድስ” ያግድ ሄ በሳ አበንኤዘራ ግድ ሱንስ።

¹³ ፍልስፄመ አሳይ ፆነትዶሶና፤ ኤንቲ እስራኤለ ቢታ ቦላ ናምአን ደንድቦኮና። ሳሜል ደእዳ ላይ ኡባን ጎዳ ኩሸይ ፍልስፄመ አሳ ቦላ ዴፅስ።

¹⁴ ፍልስፄመ አሳይ ኤቅሮናፐ ጋተ ጋካናዉ እስራኤለፐ ድእዳ ካታማት እስራኤለስ ስምዶሶና። እስራኤለ አሳይ ባንታ ካሰ ዛዋ ፍልስፄመ አሳ ኩሸፐ ዎ ኤክዶሶና። እስራኤለ አሳይነ አሞረ አሳይ ሳሮ ደእስ።

¹⁵ ሳሜል ባ ደኦ ላይ ኡባን እስራኤለ ቦላ ፕርዴስ።

¹⁶ ሳሜል ላይን ላይን ቤተለ፥ ጋልጋላነ ምፅጳ ዩይድ እስራኤለ ቦላ ፕርዴስ።

¹⁷ እያ ኬይ ራማን ደእያ ግሾ ያ ስሚድ ሄ በሳንካ እስራኤለ ቦላ ፕርዴስ። እ ራማን ጎዳስ ያርሾ በሲ ኬፅስ።