1 Sameela 30 - ጌሻ ማፃፋ

ዳዊቲ አማለቃታ ኦልስ

¹ ዳዊቲነ እያ አሳት ሄን ጋላስ ፅቅላጋ ጋክዶሶና። አማለቃት ነገባነ ፅቅላጋ ኦልድ፥ ፅቅላጋ ታማን ፁግዶሶና።

² ፅቅላጋን ደእያ ማጫሳነ ናአፐ ጭማ ጋካናዉ ደእያ ኡባ ድእዶሶና፤ ኤንታፈ እስ አስካ ዎና ኤንታ ኡባ ድእድ ኤፍዶሶና።

³ ዳዊቲነ እያ አሳት ፅቅላጋ ጋክያ ዎደ ካታማይ ታማን ፁገትዳይሳነ ኤንታ ማቸት፥ አደ ናይትነ ማጫ ናይት ድኤትዳይሳ በእዶሶና።

⁴ ዳዊቲነ እያራ ደእያ አሳይ ባንታ ዎልቃይ እፃና ጋካናዉ ዋስድ ዬክዶሶና።

⁵ ዳዊታ ማቸት እዝራኤለ አክናሆማነ ካሰ ናባላ ማችያ ቃርመሎሳ አብግያ ናምአይካ ድኤትዶሶና።

⁶ እያ አሳይ ባንታ አደ ናይትነ ማጫ ናይት ድኤትዳ ግሾ ይሎትድ ዳዊታ ሹቻን ጫዳናዉ ኦደትን፥ ዳዊቲ ዳሮ ኡንኤትስ። ግዶሽን፥ ዳዊቲ ጎዳን ባ ፆሳን ምነትስ።

⁷ ዳዊቲ አብመለከ ናኣ ካህንያ አብያታራኮ፥ “ኤፉድያ ኤካዳ ያ” ያግን፥ አብያታር ኤፉድያ ዳዊታስ ኤህስ።

⁸ ዳዊቲ፥ “ታኒ፥ ታና ኦልያ አሳታ ካላዳ ጋካኔ?” ያግድ ጎዳ ኦይችስ። ጎዳይ፥ “ኤ፤ ኤንታ ካላዳ ባ፤ ቱማ ኤንታ ነ ጋካና፤ ቱማ ድኡዋ ዛራና” ያግስ።

⁹ ዳዊቲነ እያራ ደእያ ኡሱፑን ፄቱ አሳት ደንድድ ቦሶራ ሻፋ ጋክያ ዎደ ኤንታፈ ጉ አሳት ያን አትዶሶና።

¹⁰ ናምኡ ፄቱ አሳይ ሻፋ ፕናናዉ ዳሮ ዳቡርዶሶና። ሽን ዳዊቲነ ኦይዱ ፄቱ አሳይ ካልዶሶና።

¹¹ ኤንቲ እስ ግብፀ አስ ደንባን ደምድ፥ ዳዊታኮ ኤህድ፥ እያዉ ሃነ ካ እምዶሶና።

¹² ባላሰ ኦንጎቾነ ናምኡ ዎይነ ኑካ እያዉ እምን ምድ ጋሽትስስ። እ ሄ ጋላስነ ሄ ቃማ ካ ሞና ሃ ኡዮና ጋምእስ።

¹³ ዳዊቲ፥ “ኔኒ ኦደ አይሌ? አዉፐ ያዲ?” ያግድ አድያ ኦይችስ። አደይ፥ “ታኒ አማለቃ አድያስ አይለትዳ ግብፀ አስ፤ ሄ ጋላሳፐ ካሰ ታ ሳከትን፥ ታ ጎዳይ ታና የግ አግድ ብስ።

¹⁴ ኑኒ ይሁዳ ዛዋ፥ ከልታወታ ዱገሀ ባጋነ ካለባ ዱገሀ ባጋ ኦልድ ፅቅላጋ ታማን ፁግዳ” ያግስ።

¹⁵ ዳዊቲ፥ “ኔኒ ታና ሄ ኦልዳ ጩጋታኮ ካለናዉ ዳንዳአይ?” ያግድ ኦይችስ። እ ዛሪድ፥ “ኔኒ ታና ዎና መላነ ታ ጎዳስ አዳ እምከ ጋዳ ታዉ ፆሳን ጫቃ፤ ታኒ ነና ኤንታኮ ካለና” ያግስ።

¹⁶ ዳዊቲ ካለድ ኤንታኮ ጋስ። ኤንቲ ፍልስፄመፐነ ይሁዳፐ ዳሮ ድኦ ድእዳ ግሾ ኡፋይትድ ምሸነ ኡይሸ ላለትድ ኡትዶሶና።

¹⁷ ሄ ጋላስ ኦማርሳፈ ዶምድ ዎንተ ጋላስ ኦማርስ ጋካናዉ ዳዊቲ ኤንታ ሾጭስ። ግማለ ቶግድ ባቃትዳ ኦይዱ ፄቱ ፓንታፐ አትሽን፥ ሀር እስ አስካ አትቤና።

¹⁸ አማለቃ አሳት ኤፍዳ ኡባ፥ ባ ናምኡ ማቸታራ እስፈ ዳዊቲ ዎስስድ ኤክስ።

¹⁹ አሳት ድእድ ኤፍዳባፐ እስባይካ ፓጭቤና፤ ናእ ዎይኮ ጭም፥ አደይ ዎይኮ ማጭ፥ ሄሳዳካ ኤንቲ ድእድ ኤፍዳ ሀራባ ኡባይ ፓጮና ደእሽን ዳዊቲ ኡባ ዛርስ።

²⁰ ዳዊቲ ዶርሰ፥ ዴሸነ መሄ ኡባ ድእስ፤ ዳዊቲ አሳይ እ ድእዳ መህያ ሀንኮ መህያፐ ስንራ ላግሸ፥ “ሀይስ ዳዊታ ድኦ” ያግዶሶና።

²¹ ዳዊቲ ዳቡርድ ቦሶራ ሻፋ አቻን አትዳ ናምኡ ፄቱ አሳኮ ይስ። ኤንቲ ዳዊታነ እያራ ደእያ አሳ ሞካናዉ ከይዶሶና። ዳዊቲ ባ አሳራ ሺቅድ ኤንታ ሳሮስ።

²² ሽን ዳዊታራ ብዳ አሳታ ግዶፈ ፓና ኢታ አሳት፥ “ኤንቲ ኑራ ቦና ግሾ ኑኒ ዛሪድ ኤህዳባፐ አይኮካ ኤንታዉ ሻኮኮ፤ ኤንቲ ባንታ ናይታነ ባንታ ማቸታ ኤክድ ቦና” ያግዶሶና።

²³ ዳዊቲ ዛሪድ፥ “ታ እሻቶ፥ ጎዳይ ኑስ እምዳባን ህንተ ሀይሳዳ ኦናዉ በሰና። እ ኑና ናግድ፥ ኑና ኦልዳ ጩጋታ ኑስ አድ እሚስ።

²⁴ ህንተ ግያባ ኦንካ ኤከና። ኦለታናዉ ብዳይሳታነ ኑባ ናግሸ ሀይሳን ጋምእዳይሳታ ግሾይ እስኖ፤ ኡባይ ግና ሻከታና” ያግስ።

²⁵ ሄ ጋላሳፐ ዶምድ ሀች ጋካናዉ እስራኤለ ቢታን ሄስ ህገነ ዎጋ ግድስ።

²⁶ ዳዊቲ ፅቅላጋ ጋክዳ ዎደ ባ ላገ ግድዳ ይሁዳ ጭማታኮ፥ “ጎዳ ሞርከታፐ ድኤትዳባፐ ታኒ ህንተዉ እመይሳ ኤክተ” ያግድ ጉራ የድስ።

²⁷ እ ሄሳ ቤተለን፥ ራሞታ ነገባንነ ያትራን ደኤይሳታስ፥

²⁸ አሮኤራን፥ ስፍሞታን፥ ኤሽታሞአንነ

²⁹ ራካላን፥ ይራህማኤላን፥ ቄና ካታማታን፥

³⁰ ሆርማና፥ ቦራሳና፥ አታካንነ

³¹ ከብሮናን ደኤይሳታስ የድስ። እነ እያ አሳት ዩይዳ በሳ ኡባን ደእያ አሳስ የድስ።