1 Sameela 22 - ጌሻ ማፃፋ

ዳዊቲ አዱላማንነ ምፅጳን

¹ ዳዊቲ ጋተፐ ባቃትድ፥ አዱላማ ማታን ደእያ ጎንጎሉዋ ብስ። እያ እሻትነ እያ አዋ ሶ አሳ ኡባይ ሄሳ ስእዳ ዎደ ያ እያኮ ብዶሶና።

² መቶትዳይ፥ አጮትዳይነ ሳእ ኢትዳ ኡባይ ዳዊታኮ ሺቅን፥ ኤንታ ታይቦይ ኦይዱ ፄቱ ግድስ፤ እ ኤንታ ሀላቃ ግድስ።

³ ዳዊቲ ያፐ ደንድድ ሞአበን ደእያ ምፅጳ ብድ ሞአበ ካዋ፥ “ፆሳይ ታዉ ኦናባ ታ ኤራና ጋካናዉ ታ አዋነ አይዉ ነ ማታን ዎርክ” ያግድ ዎስስ።

⁴ ዳዊቲ ኤንታ ሞአበ ካዋ ማታን ዎስ፤ ዳዊቲ ቆሰትዳ በሳን ደእያ ዎደ ኡባን ኤንቲ ካዋ ማታን ደእዶሶና።

⁵ ሄሳፈ ጉየ፥ ናበይ ጋድ ዳዊታኮ ይድ፥ “ቆሰትዳ በሳን ጋምኦፋ፤ ሀይሳፈ ደንዳዳ ይሁዳ ቢታ ባ” ያግስ፤ ዳዊቲ ያፐ ከይድ ሄረታ ዎራ ብስ።

⁶ ዳዊቲነ እያ አሳይ በንትዳይሳ ሳኦል ስእስ። ሳኦል ግብአ ማታን ደእያ ደረ ቦላ፥ ታማርስከ ም ጋርሳን ቶራ ኦይክድ ኡትስ፤ እያ ሞርናት እያ ዩሹዋን ኤቅዶሶና።

⁷ ሳኦል ኤንታኮ፥ “ህንተኖ፥ ብንያመ አሳዉ፥ ስእተ፤ እሰየ ናአይ ጋደነ ዎይነ ቶክያ በሲ ህንተ ኡባስ እማኔ? ሻላቃታነ ማቶ ሀላቃታ ኦድ ህንተና ሹማኔ?

⁸ ህንተ ኡባይ ታ ቦላ ማቀትደታ፤ ታ ናአይ እሰየ ናኣራ ጫቅዳባ ታዉ ኦንካ ኦድቤና። ህንተፈ እስ አስካ ታዉ ቃተና፤ ሀች ሀንዳይሳዳ ታ ናአይ ታ አይልያን ታና ዎሳናዉ ደንዳይሳ ታዉ ኦንካ ኦድቤና” ያግስ።

⁹ ሳኦላ ሞርናታራ ኤቅዳ ኤዶመ አደይ ዶይቅ፥ “እሰየ ናአይ አክፁባ ናኣ አብመለከኮ ኖባ ብዳይሳ ታኒ በአስ።

¹⁰ ዳዊቲ አይ ኦነኮ አብመለከይ ጎዳ ኦይችስ፤ ያትድ ዳዊታስ ሽንቀነ ፍልስፄመ አድያ ጎልያዳ ማሻ እያዉ እሚስ” ያግድ ሳኦላስ ኦድስ።

¹¹ ሄሳፈ ጉየ፥ አክፁባ ናኣ ካህንያ አብመለከነ ኖባን ካህነ ግድድ ደእያ እያ አዋ ሶ አሳ ኡባ ካዎይ ፄግስን፥ ኤንቲ ካዋኮ ይዶሶና።

¹² ሳኦል፥ “አክፁባ ናአዉ፥ ስአ” ያግስ። አብመለከይ፥ “ኤሮ ታ ጎዳዉ” ያግስ።

¹³ ሳኦል፥ “ኔራ እሰየ ናኣራ ታ ቦላ አይስ ማቀትደቲ? ኔኒ እያዉ ኡይነ ማሸ እማዳ፥ እ ታና ዎናዉ ደንዳና መላ እያ ግሾ ፆሳ አይስ ኦይቻዲ?” ያግስ።

¹⁴ አብመለከይ፥ “ነ ኦሳንቾታ ኡባ ግዶን ዳዊቲ መላ አማነተይ፥ ካዋ ቦሎይ፥ ነና ናገይሳታ ኪተይነ ነ ሶ አሳ ግዶን ዳሮ ቦንቸተይ እያ መል ኦኔ?

¹⁵ ታኒ እያ ግሾ ፆሳ ኦይችሽን፥ ሀይስ ታዉ ኮይሮ? ግደና፥ ካዋዉ፥ ታና ነ አይልያ ዎይኮ ታ አዋ ሶ አሳ ኡባ አይኮካ ሞቶፓ። ታኒ ነ አይለይ ሀ ኦዳባ ጉ ግድን ዎይኮ ግታ ግድን ኤርከ” ያግስ።

¹⁶ ካዎይ፥ “አብመለከ፥ ነነ ነ አዋ ሶ አሳ ኡባይ ሀይቃና” ያግስ።

¹⁷ ሳኦል ባ ማታን ኤቅድ ናገይሳታ፥ “ጎዳ ካህነታ ዎተ፤ ኤንቲ ዳዊታ ማድዶሶና። ዳዊቲ ባቃትዳይሳ ኤርሸ ታዉ ኦድቦኮና” ያግስ። ሽን ካዋ ናገይሳት ጎዳ ካህነታ ቦላ ባንታ ኩሽያ ደንና እፅዶሶና።

¹⁸ ካዎይ ዶይቃ፥ “ኤንታ ነ ዎ” ያግድ ኪትስ። ኤዶመ አደይ ዶይቅ ካህነታ ሾጭድ፥ ሄ ጋላስ ኤፉደ ማእዳ ሆስፑን ታማነ እቻሹ ካህነታ ዎስ።

¹⁹ ቃስ ዶይቅ ካህነታ ካታማ፥ ኖባ ማሻን ዉርስስ፤ ሄ ካታማን ደእያ አደነ ማጫ፥ ናይታነ ዮጋ ናይታ፥ መሄታ፥ ሀረታነ ዶርሳታ ማሻን ዎስ።

²⁰ ሽን አክፁባ ናኣ አብመለከ ናይታፐ አብያታራ ጌተትያ እስ ናአይ ከስ ኤክድ፥ ዳዊታኮ ባቃትስ።

²¹ እ፥ ሳኦል ጎዳ ካህነታ ዎዳይሳ ዳዊታስ ኦድስ።

²² ዳዊቲ አብያታራ፥ “ኤዶመ አደይ ዶይቅ ሄ በሳን ደኤይሳ ታኒ በእዳ ዎደ እ ሳኦላስ ኦዳናይሳ ሄ ጋላስ ኤራስ። ነ አዋ ሶ አሳ ኡባ ሀይቆስ ጋዳይ ታና።

²³ ህዛ ኔኒ ታራ ደአ፤ ያዮፋ። ነና ዎናዉ ኮይያ ኡራይ ታና ዎናዉ ኮዬስ፤ ኔኒ ታ ማታን ሳሮ ዳና” ያግስ።