1 Sameela 2 - ጌሻ ማፃፋ

ሃን ዎሳ

¹ ሃና ሀይሳዳ ያጋዳ ዎሳሱ፤ “ታ ዎዛናይ ጎዳን ኡፋይቴስ፤ ታ ካጨይ ጎዳን ቁ ግስ። ታ ሞርከታ ቦላ ታኒ ጬቀታይስ፤ ነ አሾይ ታና ኡፋይሴስ።

² ጎዳ መላ ጌሽ ባዋ፤ ነ መል ኦንካ ባዋ። ኑ ፆሳፈ አትሽን፥ ሀራ ዛል ባዋ።

³ ኦቶሮ ሃሳያ አግተ፤ ኦቶሮ ቃል ህንተ ዶናፐ ከዮፖ። ጎዳ ፆሳይ ኡባ ኤሬስ፤ አሳ ኦሶ ይግድ ፄሌስ።

⁴ ኦላንቾታ ዶንገይ መቅስ፤ ሽን ዳቡራንቾት ዎልቃ ደምዶሶና።

⁵ ካልዳይሳት ኮሻትድ ኡነትዶሶና፤ ሽን ኮሻትዳይሳት ሀእ ካልዶሶና። ማይንያ ላፑን ናይታ የላሱ፤ ሽን ዳሮ ናይታ የልዳራ ባርካ አታሱ

⁶ ጎዳይ ዎስ፥ ፓስ፤ ስኦለን የጌስ፥ ያፐ ከሴስ።

⁷ ጎዳይ ዱረዬስ፤ ጎዳይ ማንቀስ፤ ካዉሼስ፤ ቁ ኦስ።

⁸ እ ማንቆታ ባናፐ ደንስ፤ መቶታንቾታ ብዶፐ ደንስ። ኤንታ ቦንቾ አሳራ ኡትሴስ፤ ቦንቾ አራታ ላትሴስ። ቢታ ባሶት ጎዳሳ፤ ኤንታ ቦላ አላምያ ኤስስ።

⁹ “እ ጌሻታ ቶሁዋ ናጌስ፤ ሽን ኢታታ ማን ስእ ኦና፤ አስ ባ ዎልቃን ፆነና፤

¹⁰ ጎዳራ ኤቀተይሳት ሊቃና፤ ጎዳይ ሳሎፐ ኤንታ ቦላ ዳዳዳ ደቻና። ጎዳይ ሳአን ደእያ ኡባ ፕርዳና፤ እ ባ ካዋስ ምኖተ እማና፤ እ ባ ትይዳይሳስ ፆኖ እማና።”

¹¹ ሄሳፈ ጉየ፥ ህልቃን ራማን ደእያ ባ ሶ ብስ፤ ሽን ናአይ ሳሜል ካህንያ ኤልፐ ጋርሳራ ጎዳስ ኦስ።

ኤል ናይታ ኢታተ

¹² ኤል አደ ናይት ኢታ፤ ኤንቲ ጎዳ ቦንቾኮና።

¹³ ሄ ዎደ ካህነት አሳራ ደእያ ጋሄተን ኦያ ዎግ ደኤስ። ሄስካ አሳይ ያርሾ ያርሽያ ዎደ ካህንያ ኦሳንቾይ ሄ አቻራ ደእያ ቃጰ ኤክድ ቡሮ አሾይ ካፅሽን ዬስ።

¹⁴ ዶይስያ ኦቱዋን ዎይኮ ድስትያን ዎይኮ ፃሩዋን ባ ቃጵያ የድድ፥ አይ ቆሞ አሾ ግድኮካ ከስ ኤፍድ ካህንያስ እሜስ። ያርሾ ያርሻናዉ ሴሎ ያ እስራኤለ አሳ ኡባ ቦላ ኤንቲ ሀይሳዳ ኦሶና።

¹⁵ ቃስ ሞዋ ያርሾ በሳን ፁጋናፐ ስን ካህንያ ኦሳንቾይ ያርሾ ያርሽያ አድያኮ ብድ፥ “ካህነይ ቃየ አሾፐ አትሽን፥ ካፅዳ አሾ ኔፐ ኤኮና ግሾ፥ እያዉ ጫጫናዉ አሾ ሀማ” ያጌስ።

¹⁶ አደይ ዛሪድ፥ “ኮይሮትድ ሞይ ፁገቶ፤ ሄሳፈ ጉየ፥ ነ ኮየይሳ ኤካ” ያጌስ፤ ሽን ካህንያ አይለይ፥ “አካይ፥ ታዉ ሀእ እማ፥ ነ ድግኮ፥ ታኒ ዎልቃን ኤካና” ያጌስ።

¹⁷ ጎዳስ እምያ ያርሹዋ ኤል ናይት ካዳ ግሾ፥ ኤንታ ናጋራይ ጎዳ ስንን አድ ዳርስ።

¹⁸ ሽን ሳሜል ናአ ደእሸ ሊኖፐ ኦሰትዳ ኤፉደ ማኦ ማእድ ጎዳ ስንን ኦስ።

¹⁹ ሳሜላ አይያ ላይን ላይን ጉ ቆለ ጊግሳዳ፥ ላይ ያርሾ ያርሻናዉ ባ አዝናራ ባሸ እያዉ ኤካዳ ባዉሱ።

²⁰ ኤል ህልቃናነ እያ ማችዉ፥ “ህንተ ጎዳስ ዱማይድ እምዳ ሀ ናኣ በሳን ጎዳይ ነዉ ሀ ማቸፈ ሀራ ናይታ እሞ” ያግድ አንጄስ፤ ያትን፥ ኤንቲ ባንታ ሶ ስሞሶና።

²¹ ጎዳይ ሃና አንጅን፥ ቃንታዳ ሄ አደ ናይታነ ናምኡ ማጫ ናይታ የላሱ። ናአይ ሳሜል ጎዳ ስንን ድጭስ።

²² ኤል ዳሮ ጭምስ። እያ ናይት እስራኤለ አሳ ኡባ ቦላ ኦዳ ኢታባነ ጌሻ ዱንካንያ ፐንገን ጎዳስ ኦያ ማጫሳታራ ቱንዳይሳ ስእስ።

²³ ሄሳ ግሾ ኤንታኮ፥ “ህንተ ሀይሳ መላባ አይስ ኦቲ? ህንተ ኢታ ኦሱዋ ታኒ አሳ ኡባፈ ስአስ።

²⁴ ታ ናይቶ፥ ሄሳ አግተ፤ ጎዳ አሳይ ህንተና ግያባይ ሎኦ ግደና።

²⁵ እስ አስ አሰ ናቅኮ፥ ፆሳይ እያዉ ጋናታና፤ ሽን አስ ጎዳ ናቅኮ፥ እያዉ ጋናታናይ ኦኔ?” ያግስ። ጎዳይ ኤንታና ዎናዉ ኮይዳ ግሾ ኤንቲ ባንታ አዋ ዞርያ ስኦና እፅዶሶና።

²⁶ ናአይ ሳሜል ጎዳ ስንንነ አሳ ስንን ድጭስነ ሳበትስ።

ኤል ኬ ቦላ ኦደትዳ ትንብተ

²⁷ እስ ጋላስ ናበይ ኤልኮ ይድ፥ “ጎዳይ ሀይሳዳ ያጌስ። ‘ነ አዋ ሶ አሳይ ግብፀ ቢታን ፓሮና ኩሸን ደእያ ዎደ ታ ኤንታዉ ቆንጫብክና?

²⁸ ነ አዋይ ካህነ ግድድ ታ ያርሾ በሳ ከያና መላ፥ እፃነ ጩይሳና መላነ ታ ስንን ኤፉደ ማእድ ኦና መላ እስራኤለ ዛረ ኡባፈ እያ ዶራስ። እስራኤለ አሳይ ታማን ያርሽያ ያርሾ ኡባ ታኒ ነ አዋ ኮቻስ እማስ።

²⁹ ታኒ ታ ደእያ በሳን ሺቃና መላ ኪትዳ ታ ያርሹዋነ እሙዋ ህንተ አይስ ካደቲ? ታ አሳ እስራኤለ፥ ታዉ ሺሽዳ ያርሾ ኡባፈ ዶረትዳይሳ ምድ ሞና መላ ኦዳ ነ ናይታ ታፐ አዳ አይስ ቦንቻዲ?’

³⁰ “ሄሳ ግሾ፥ ጎዳይ፥ እስራኤለ ፆሳይ ሀይሳዳ ያጌስ። ነ ኮቻይነ ነ አዋ ኮቻይ መርናዉ ታዉ ኦና። ሽን ሀእ ሄስ ታፐ ሃኮ፤ ታና ቦንቸይሳታ ቦንቻና፤ ታና ካይሳት ካታና።

³¹ ነ ኮቻን አስ ጬጎና መላ ታኒ ነ ዎልቃነ ነ አዋ ሶ አሳ ዎልቃ ይስያ ዎደይ ያና።

³² ኔኒ ታ ኬን መቶ በአና፤ ታኒ እስራኤለ አሳስ እምያ አንጁዋ ኔኒ በአዳ ቃናታና፤ ሽን ነ ሶ አሳን ጬጋና አስ ኦንካ ባዋ።

³³ ታኒ ታ ያርሾ በሳፈ ይሶና አስ ደእኮ፥ እያ ጋሶን ነ አይፈይ አፉፅሸ ቆቃና፤ ነ ዎዛናይ አዛኖን ፁገታና፤ ነ ኮቻ ኡባይ ናአተን ሀይቃና።

³⁴ ነ ናይት ናምአይ፥ አፍናንነ ፍንሃስ እስ ጋላስ ሀይቃና፤ ሄሳ ነዉ ማላ ግዳና።

³⁵ ታ ዎዛናዳነ ታ ቆፋዳ ኦያ ታዉ አማነትያ ካህነ ደንና። ታኒ እያዉ አማነትዳ ሶ አስ እማና፤ ታኒ ትይዳ ካዋ ስንን ኤንቲ ኡባ ዎደ ኦና።

³⁶ ነ ኮቻ ግዶፈ አትዳ ኡባይ ጉ ሚሸ ዎይኮ ባሶ ኡይ ዎሳናዉ ይድ፥ እያ ስንን ጉፋንድ፥ ‘ታኒ ምያባ ደማና መላ ካህነ ኦዳ ታና ሹማርክ’ ያጋና” ያግስ።