1 Sameela 18 - ጌሻ ማፃፋ

ዳዊታነ ዮናታና

¹ ዳዊቲ ሳኦላራ ሃሳያ ዉርስዳፐ ጉየ፥ ሳኦላ ናአይ ዮናታን ዳዊታራ ዳሮ ማታ ዳቦተ መስ፤ ዮናታን ዳዊታ ባ ሸምፑዋዳ ዶስስ።

² ሄ ጋላሳፐ ዶምድ፥ ሳኦል ዳዊታ ባራ ዎስ፤ ባ አዋ ሶ ጉየ ስሞና መላ ድግስ።

³ ዮናታን ዳዊታ ባ ሁጰዳ ዶስያ ግሾ እያራ ጫቅስ።

⁴ ዮናታን ባ ማእዳ ካባ፥ ባ ኦላ ማኡዋ፥ ባ ማሻ፥ ባ ዶንግያነ ባ ሳቅያ ከስድ ዳዊታስ እሚስ።

⁵ ሳኦል ኪትዳ ኡባ ዳዊቲ ናገትድ ኦያ ግሾ፥ ሳኦል ዳዊታ ባ ኦላንቾታ ግዶን ሀላቃ ኦድ ሹምስ። ሄስ አሳ ኡባነ እያ ሞርናታ ኡፋይስስ።

⁶ ዳዉተ ፍልስፄመ አድያ ጎልያዳ ዎን፥ አሳይ ሶ ስምያ ዎደ ማጫሳይ ኡፋይሳ የ የፅሸነ ዱርሸ፥ ካራቦ ባቅሸነ ዲ ዲፅሸ፥ ካዋ ሳኦላ ሞካናዉ እስራኤለ ካታማታ ኡባፈ ከይዶሶና።

⁷ ማጫሳት ዱርሸ፥ “ሳኦል ሙኩላታ ዎስ፤ ዳዊቲ ታሙ ሙኩላታ ዎስ” ያግድ የፅዶሶና።

⁸ ሳኦላ ሀ የይ ሻትን፥ ዳሮ ሀንቀትስ። ሳኦል ባ ቆፋን፥ “ዳዊቲ፥ ‘ታሙ ሙኩላታ ዎዳሳ ግድ፥ ታና ሙኩላታ ዎዳሳ’ ግዶሶና። ያትን፥ ካዎተፈ አትሽን ሀር አይብ አትዴ?” ያግስ።

⁹ ሄ ዎደፐ ዶምድ ሳኦል ዳዊታ ቃናተ አይፈን ፄሌስ።

¹⁰ ዎንተ ጋላስ ኢታ አያን ፆሳፈ ኪተትድ ሳኦላ ኦይክን፥ ሳኦል ባ ሶን ኤልሞቴስ። ዳዊቲ ካሰይሳዳ ዲ ዲፅሽን ሳኦል ቶራ ባ ኩሸን ኦይክድ ኡትስ።

¹¹ እ፥ “ዳዊታ ጎዳራ ጋዳ ስካና” ያግ ቆፕድ ቶራ ፆንግስ። ሽን ዳዊቲ ናምኡ ቶሆ እያፐ አትስ።

¹² ጎዳይ ሳኦላ አግድ ዳዊታራ ደእያ ግሾ ሳኦል ዳዊታ ያይስ።

¹³ ሳኦል ዳዊታ ባ ስንፈ ሃሳናዉ ኮይድ ሙኩሉ ኦላንቾታስ ሀላቃ ኦስ። ያትን፥ ዳዊቲ ባ ጩጋ ኦላስ ካለስ።

¹⁴ ጎዳይ ዳዊታራ ደእያ ግሾ እ ኦያባይ ኡባይ እያዉ እንጀቴስ።

¹⁵ ዳዊቲ ኦያባ ኡባይ እንጀተይሳ ሳኦል በእድ እያዉ ዳሮ ያይስ።

¹⁶ ሽን ዳዊቲ ኤንታ ኦላን ካለያ ግሾ እስራኤለ አሳይነ ይሁዳ አሳ ኡባይ እያ ዶሶሶና።

¹⁷ ሳኦል ዳዊታኮ፥ “ታ ናአ ባይርያ መራባ ሀናሹ፤ ታኒ እዮ ነዉ ማቾ እማና፤ ኔኒ ምኖ አስ ግዳ፤ ጎዳ ኦላ ኦለታ” ያግስ። ሳኦል ባ ዎዛናን፥ “ታኒ እያ ቦችከ፤ ፍልስፄመት እያ ዎ” ያግድ ቆፕስ።

¹⁸ ሽን ዳዊቲ፥ “ካዎራ ቦሎታናዉ ታኒ ኦኔ? ታ ሶ አሳይ አይቤ? ዎይኮ ታ አዋ ያራይ እስራኤለ አሳ ግዶን አይቤ?” ያግስ።

¹⁹ ሽን ሳኦላ ናእያ መራባ ዳዊታስ እመትያ ዎደይ ጋክን፥ ማሆላ አድያ አድርኤላስ እመታሱ።

²⁰ ግዶሽን፥ ሳኦላ ናእያ መልኮላ ዳዊታ ዶሳሱ፤ ሳኦል ሄሳ ስእድ ኡፋይትስ።

²¹ እ ባ ዎዛናን፥ “እያዉ ፅሄ ግዳና መላነ ፍልስፄመት እያ ዎና መላ ታኒ ምልኮሎ ዳዊታስ እማና” ያግድ ቆፕስ። ሄሳ ግሾ፥ ሳኦል ዳዊታ፥ “ኔኒ ታራ ቦሎታናዉ ናምአን ቃዳ ነዉ እማስ” ያግስ።

²² ሳኦል ባ ኦሳንቾታ ፄግድ፥ “ ‘ካዎይ ነናን ኡፋይትስ፤ እያ አይለት ኡባይ ነና ዶሶሶና፤ ሀእ ኔኒ ካዉዋራ ቦሎታ’ ያግድ ዱማ ዳዊታስ ኦድተ” ያግድ ኪትስ።

²³ ሳኦል ግዳይሳዳ ኤንቲ ዳዊታስ ኦድዶሶና። ሽን ዳዊቲ፥ “ካዎራ ቦሎታናይስ ህንተዉ ላፋባ ዳንዬ? ታኒ ማንቆነ ኤረቶና አስ” ያግድ ዛርስ።

²⁴ ሳኦላ ሞርናት ዳዊቲ ግዳባ ሳኦላስ ኦድዶሶና።

²⁵ ሳኦል ባ አይለታኮ፥ “ዳዊታስ ሀይሳዳ ያግድ ኦድተ፤ ‘ካዎይ ባ ሞርከታ ሀሎ ከያናዉ ፄቱ ፍልስፄመ አሳታ ቃራትድ ኤሀና መላፐ አትሽን፥ ኔፐ ሀራ ኮይታ ኮየና’ ያግተ” ያግስ። ሳኦል ሄሳ ግዳይ ዳዊቲ ፍልስፄመታ ኩሸን ሀይቃና መላ ቆፕዳ ግሾሳ።

²⁶ ሳኦላ አይለት ሳኦል ግዳባ ዳዊታስ ኦድዶሶና፤ ካዋራ ቦሎታናይስ ዳዊታ ኡፋይስስ። ዎደይ አናፐ ስን፥

²⁷ ዳዊቲነ እያ አሳይ ደንድ ብድ ፍልስፄመታፐ ናምኡ ፄቱ አሳ ዎዶሶና። ዳዊቲ ካዋራ ቦሎታናዉ ሄ አሳታ ቃራት ኤህድ፥ ካዋስ ኩመ ታይብድ ሼስ። ሳኦል ባ ናእዉ መልኮሎ ዳዊታስ እሚስ።

²⁸ ሳኦል ጎዳይ ዳዊታራ ደኤይሳነ እያ ናእያ ምልኮላ ዳዊታ ዶሰይሳ ኤርስ።

²⁹ ሳኦል ዳዊታስ ካሰይሳፈ አድ ያይስ። ሳኦል ባ ደኦ ላይ ኡባን ዳዊታስ ሞርከ ግድስ።

³⁰ ፍልስፄመ ኦላንቾት ኦላስ ከስ አግቦኮና። ሽን ኦላስ ከይዳ ዎደ ኡባን ሳኦላ ቶራ ሞጮናታፐ አድ ፆኖይ ሀነይ ዳዊታሳ፤ ሄሳ ግሾ እ ኤረትዳ አስ ግድስ።