1 Sameela 15 - ጌሻ ማፃፋ

ሳኦል ቦረትስ

¹ ሳሜል ሳኦላኮ፥ “ባ አሳ እስራኤለ ቦላ ኔኒ ካዎታናዳ ትያና መላ ጎዳይ ኪትዳይ ታና። ሄሳ ግሾ፥ ጎዳ ቃላ ስአ።

² ኡባፈ ዎልቃማ ጎዳይ ሀይሳዳ ያጌስ፤ ‘እስራኤለት ግብፀፈ ከይድ ያ ዎደ አማለቃት ኦገን ኤንታራ ኤቀትዳ ግሾ ታኒ አማለቃታ ሴራና።

³ ሀእ ባዳ አማለቃታ ሾጫ፤ ኤንታዉ ደእያባ ኡባ ፖሎ ይሳ። ኤንታ አሾፋ፤ ማጫነ አደ፥ ናይታነ ዮጋ ናይታ፥ ሚዝነ ዶርሰ፥ ግማለነ ሀረ ኡባ ዎ’ ” ያግስ።

⁴ ሳኦል አሳ ፄግድ፥ ፀላመ ጌተትያ በሳን ታይብስ። ታይብያ ዎደ እስራኤለፐ ናምኡ ፄቱ ሙኩሉ ቶሆ ኦላንቾታ፤ ይሁዳፐ ታሙ ሙኩሉ አስ ደምስ።

⁵ ሳኦል አማለቃታ ካታማ ብድ እስ ሻፋን ቆሰትድ ኡትስ።

⁶ ሳኦል፥ “እስራኤለት ግብፀፈ ከይያ ዎደ ህንተ ኤንታዉ ኬህዳ ግሾ ታኒ ህንተና አማለቃታራ እስፈ ይሶና መላ ደንድድ ኤንታ ግዶፈ ከይተ” ያግድ ቄና አሳስ ኦድስ። ያትን ቄና አሳይ አማለቃታ ግዶፈ ከይድ ብዶሶና።

⁷ ሳኦል አማለቃታ ሀውላፐ ዶምድ፥ ግብፀፈ ዶሎሀ ባጋን ደእያ ሹራ ጋካናዉ ሾጭስ።

⁸ አማለቃታ ካዋ አጋጋ ፓፃ ድእስ፤ እያ አሳ ኡባ ማሻን ዎድ ዉርስስ።

⁹ ሽን ሳኦልነ እያ ኦላንቾት፥ አጋጋነ ሎኦ ዶርሳታ፥ ሚዛታ፥ አንቃራ ማራታነ ማራዘታ፥ ሄሳዳካ ሀራ ሎኦባታ ኡባ አሽዶሶና። ኤንቲ ሀይሳታ ፖሎ ዎናዉ ኮይቦኮና፤ ሽን ኤንቲ ላፋታነ ፓናይሳታ ይስዶሶና።

¹⁰ ጎዳይ ሳሜላኮ፥

¹¹ “ሳኦል ታና ካለይሳ አግድ፥ ታ ኪታ ናግቦና ግሾ፥ ታኒ ሳኦላ ካዎዳይሳን ቂሮታስ” ያግስ። ሳሜል ሄሳ ስእዳ ዎደ ኡንኤትድ ቃማ ኩመ ጎዳኮ ዋስስ።

¹² ሳሜል ዎንታ ጉራ ደንድድ፥ ሳኦላራ ጋሄታናዉ ብስ። ሽን አሳይ፥ “ሳኦል ቃርመሎሳ ካታማ ብድ፥ ያን ባና ሀሳይስያ ሀዉልተ ኤስዳፐ ጉየ፥ ጋልጋላ ዎስ” ያግድ ኦድዶሶና።

¹³ ሳሜል ሳኦላ ደምዳ ዎደ ሳኦል ሳሜላኮ፥ “ጎዳይ ነና አንጆ፤ ታኒ ጎዳ ኪታ ፖላስ” ያግስ።

¹⁴ ሽን ሳሜል ሳኦላኮ፥ “ያትን፥ ሀ ታኒ ስእያ ዶርሳ ዋሶይነ መሄ ዋሶይ አይቤ?” ያግስ።

¹⁵ ሳኦል፥ “ኦላንቾት ሀይሳታ አማለቃታፐ ኤህዶሶና፤ ኤንቲ ጎዳስ፥ ነ ፆሳስ ያርሻናዉ፥ ኡባፈ ሎእያ ዶርሳታነ መሄታ አሽዶሶና፥ ሽን ሀራታ ኡባ ይስዳ” ያግስ።

¹⁶ ሳሜል፥ “አነ አጋጋ፤ ጎዳይ ዝነ ቃማ ታዉ ኦድዳባ ታ ነዉ ኦዳና” ያግስ። ሳኦል፥ “ኤሮ ኦዳ” ያግስ።

¹⁷ ሳሜል ዛሪድ፥ “ነ አይፈ ስንን ነ ጉ ግድኮካ፥ እስራኤለ ዘረስ ካዎ ግዳብኪ? እስራኤለ ቦላ ካዎታና መላ ጎዳይ ነና ትይስ።

¹⁸ ጎዳይ፥ ‘ኔኒ ባዳ ኢታ ግድዳ አማለቃታ ኩመ ይሳ፤ ኤንቲ ዉራና ጋካናዉ ዎ’ ያግድ ኪትስ።

¹⁹ ያትን፥ አይስ ጎዳስ ኪተታብኪ? ድኦስ ያረታዳ ጎዳ ስንን አይስ ኢታባ ኦዲ?” ያግስ።

²⁰ ሳኦል፥ “ታኒ ጎዳስ ኪተታስ፤ እ ታና ኪትዳይሳዳ ባዳ አማለቃታ ዎ ዉርሳስ፤ ኤንታ ካዋ አጋጋ ኤሀስ።

²¹ ሽን ኦላንቾት ድኡዋፐ ሎእያ ዶርሰነ መህያ ጎዳስ፥ ነ ፆሳስ፥ ጋልጋላን ያርሻናዉ ኤህዶሶና” ያግስ።

²² ሳሜል፥ “ጎዳይ ባ ቃላስ ኪተተይሳን ኡፋይተይሳ መላ ፁሳ ያርሾንነ ሀራ ያርሾን ኡፋይቲ? ሄኮ፥ ኪተተ ያርሾፈ አስ፤ እያ ስስ ዶርሳ ሞ ያርሸይሳፈ አስ።

²³ ጌላተ ማሮ ናጋራ መላ፤ ቃስ ኦቶሮይ ኢታ ኤቃ ጎይኖ መላ። ኔኒ ጎዳ ቃላ እፅዳ ግሾ ጎዳይ ነ ካዎ ግዶና መላ እፅስ” ያግስ።

²⁴ ሳኦል፥ “ታኒ ናጋራ ኦስ፤ ጎዳ ኪታነ ነ ቃላ ቶቻስ። ታኒ አሳስ ያይዳ ግሾ ኤንቲ ግዳባ ኦስ።

²⁵ ሀእ ታ ናጋራ አቶ ጋርክ፤ ታኒ ጎዳ ጎይናና መላ ታራ የርክ” ያግስ።

²⁶ ሳሜል፥ “ታኒ ኔራ ስማዳ ቢከ፤ ኔኒ ጎዳ ቃላ እፅዳ ግሾ ነ እስራኤለ ቦላ ካዎ ግዶና መላ ጎዳይ እፅስ” ያግስ።

²⁷ ሳሜል ባናዉ ደንድን፥ ሳኦል እያ ማኡዋ ማጫራ ኦይክን፥ ማኦይ ዳከትስ።

²⁸ ሳሜል፥ “ጎዳይ ሀች እስራኤለ ካዎተ ኔፐ ዳክድ ኔፐ ሎእያ ሀራ አሳስ እሚስ።

²⁹ እስራኤለ ቦንቾይ፥ ፆሳይ ዎርዶተና ዎይኮ ባ ቆፋ ላመና፤ ባ ቃላ ላማናዉ እ አስ ግደና” ያግስ።

³⁰ ሳኦል፥ “ታኒ ናጋራ ኦስ፤ ሽን ታ ቢታ ጭማታ ስንንነ እስራኤለ አሳ ስንን ታና ቦንቻ። ታኒ ጎዳ፥ ነ ፆሳ ጎይናና መላ ታራ የርክ” ያግድ ዎስስ።

³¹ ሄሳ ግሾ፥ ሳሜል እያራ እስፈ ብን፥ ሳኦል ጎዳ ጎይንስ።

³² ሳሜል፥ “አማለቃታ ካዋ አጋጋ ታኮ ኤህተ” ያግስ። አጋግ ኮኮርሸ ሳሜላኮ ይድ፥ “ቱማ ሀይቆይ ሀይሳዳ ጫሚ?” ያግስ።

³³ ሳሜል አጋጋኮ፥ “ነ ማሻይ ማጫሳ ናይታፐ መላ አሽዳይሳዳ ነ አያካ ማጫሳ ግዶን ናይታፐ መላ አታና” ያግስ። ሳሜል አጋጋ ጎዳ ስንን ጋልጋላን ቃንፀረስ።

³⁴ ሳሜል ደንድድ፥ ራማ ብስ፤ ሳኦልካ ባ ሶ ግብአ ብስ።

³⁵ ሳሜል ሀይቃና ጋካናዉ ሳኦላ በአናዉ ስሚድ ብቤና፥ ሽን ሳሜል ሳኦላ ግሾ ዬክስ። ሳኦላ እስራኤለ ቦላ ካዎ ኦዳይሳስ ጎዳይ አዛንስ።