1 Sameela 13 - ጌሻ ማፃፋ

ሳሜል ሳኦላ ሀንቀትስ

¹ ሳኦል ካዎትያ ዎደ እያዉ ላይ ሀስታማ፤ እ እስራኤለ ቦላ ናምኡ ላይ ካዎትዳፐ ጉየ፥

² እስራኤለታ ግዶፈ ሄ ሙኩሉ አስ ዶርስ። ኤንታፈ ናምኡ ሙኩሉ አሳይ ምክማሳንነ ደረይ ዳርያ ቤተለ ቢታን ሳኦላራ ደኤስ። እስ ሙኩሉ አሳይ ቃስ ብንያመን ደእያ ግብአን ዮናታናራ ደኤስ፤ አትዳ አሳ ሳኦል ኤንታ ሶ ሶ የድስ።

³ ዮናታን ግብአን ደእያ ፍልስፄመ ኦላንቾታ ኦልስ፤ ፍልስፄመ አሳይ ሄሳ ስእዶሶና። ሄሳፈ ጉየ፥ ሳኦል፥ “እብራወት ሀይሳ ስኦ” ግድ ቢታ ኡባን ሞይዘ ፑንስስ።

⁴ ሳኦል ፍልስፄመ አሳ ኦልድ ፆንዳይሳ እስራኤለ አሳይ ስእዶሶና፤ እስራኤለ አሳይ ፍልስፄመ አሳ ማታን እፀትዳይሳታ ግደይሳ ኤርዶሶና። እስራኤለ አሳይ ሳኦላ ካላናዉ ፄገትድ ጋልጋላን ሺቅዶሶና።

⁵ ፍልስፄመ አሳይ እስራኤለ አሳ ኦላናዉ ሄ ሙኩሉ ፓራ ጋረታራ፥ ኡሱፑን ሙኩሉ ፓራ አሳታራነ አባ ዶናን ደእያ ሻፈዳ ዳርዳ ኦላንቾታራ ሺቅዶሶና። ኤንቲ ብድ፥ ቤት-አዌናፐ ዶሎሀ ባጋራ ደእያ ምክማሳን ዙግድ ኡትዶሶና።

⁶ እስራኤለ አሳይ ሳእ ኤንታዉ ኢታ ግደይሳነ ኦላንቾት ዳጋምዳይሳ በእዳ ዎደ ጎንጎሎን፥ ቡረን፥ ዛላ ግዶን፥ ካካን፥ ሃ ኦላን ቆሰትዶሶና።

⁷ እብራወታፐ ጉት ዮርዳኖሰ ሻፋ ፕንድ፥ ጋደነ ጋላዳ ቢታ ብዶሶና። ሽን ሳኦል ጋልጋላን አትስ፤ እያራ ደእያ ኦላንቾት ኡባይ ያሻን ኮኮርዶሶና።

⁸ ሳኦል ሳሜል ኬርዳ ላፑን ጋላስ ጋካናዉ ጋምእስ፤ ሽን ሳሜል ጋልጋላ ይቤና፤ ያትን፥ ሳኦላራ ደእያ ኦላንቾት ላለተ ዶምዶሶና።

⁹ ሄሳ ግሾ፥ ሳኦል፥ “ፁሳ ያርሾነ እስፈተ ያርሾታ ታዉ ኤህተ” ያግድ፥ ፁሳ ያርሾ ያርሽስ።

¹⁰ ሳኦል ፁሳ ያርሹዋ ያርሽድ ፖልዳፐ ጉየ ሳሜል ይስ። ያትን፥ ሳኦል ሳሜላ ሞካናዉ ካረ ከይስ።

¹¹ ሳሜል፥ “ሀ ኔኒ ኦዳባይ አይቤ?” ያግድ ሳኦላ ኦይችስ። ሳኦል፥ “አሳይ ላለታናዉ ማትዳይሳ፥ ነካ ግዳ ዎድያን ያናዉ ጋምእዳይሳነ ፍልስፄመት ምክማሳን ሺቅዳይሳ ታኒ በአስ።

¹² ሄሳ ግሾ፥ ‘ፍልስፄመት ታራ ኦለታናዉ ጋልጋላ ዎና ሀኖሶና፤ ታኒ ጎዳ ማዶ ኦይቻብከ’ ጋዳ ቆፓስ። ያትን፥ ፁሳ ያርሾ ያርሻናይስ ታዉ አቶናባ ግድስ” ያግድ ዛርስ።

¹³ ሳሜል፥ “ኔኒ ቦዛባ ኦዳሳ፤ ጎዳይ፥ ነ ፆሳይ ነዉ እምዳ ኪታ ናጋባካ። ኔኒ ናግዳኮ ጎዳይ ሀች ነ ካዎተ እስራኤለ ቦላ መርናዉ ምንናሽን።

¹⁴ ሽን ሀእ ነ ካዎተይ ጋምኤና፤ ኔኒ ጎዳ ኪታ ናጋቦና ግሾ፥ ጎዳይ ባ ዎዛናዳ ኦያ አስ ደምስ፤ ባ አሳ ካለና መላ እያ ዶርስ” ያግስ።

¹⁵ ሳሜል ጋልጋላፐ ደንድድ፥ ብንያመን ደእያ ግብአ ብስ። ሳኦል ባራ ደእያ አሳ ታይብን፥ አሳይ ኡሱፑን ፄቱ ግድስ።

¹⁶ ሳኦል፥ እያ ናኣ ዮናታንነ ኤንታራ ደእያ አሳይ ብንያመን ደእያ ግብአን ጋምእዶሶና፤ ፍልስፄመ አሳይ ምክማሳን ዱንካንዶሶና።

¹⁷ ፍልስፄመ ኦላንቾት ሄ ጩጋን ሻከትድ ከይዶሶና። ኤንታፈ እስ ጩጋይ ሹኣላ ቢታን ደእያ ኦፍራኮ ስሚድ ብስ፤

¹⁸ ናምአንይ ቤት-ሆሮናኮ ብስ፤ ሄን ጩጋይ መላ ቢታ ስንን ደእያ ሳቦይማ ዛንጋራ ዱገ ፄልያ ዛዋ ኦግያ ኦይክድ ብስ።

¹⁹ ፍልስፄመ አሳይ፥ “እብራወት ማሸነ ቶራ ቆፆፎ” ግዳ ግሾ፥ እስራኤለ ቢታን ብራታ ቆፅያ አስ ባዋ።

²⁰ ሄሳ ግሾ፥ እስራኤለ አሳይ ባንታ ማራሻ፥ ኮንተ፥ ካልታነ ባጫ ፖሽሳናዉ ፍልስፄመ ቦሶና።

²¹ ማራሻነ ኮንተ ፖሽሳናዉ ሆስፑን ግራመ ዴፅያ ብራ ቃንፆሶና፤ ካልታነ ፆፀ ፖሽሳናዉ ኦይዱ ግራመ ቃንፆሶና።

²² ሄሳ ግሾ፥ ኦላ ጋላስ ሳኦልነ እያ ናኣ ዮናታን አትሽን፥ ሀራታ ኩሸን ቶርነ ማሽ ባዋ።

²³ ፍልስፄመ ጩጋይ ምክማሳ ፕን ባናዉ ከይስ።