1 Sameela 12 - ጌሻ ማፃፋ

ሳሜላ ዉርሰ ሃሳያ

¹ ሳሜል እስራኤለ ኡባኮ፥ “ህንተ ታዉ ኦድዳ ኡባ ስአዳ፥ ህንተ ቦላ ካዎ ካዎስ።

² ሀእ ህንተና ካለናዉ ካዎይ ደኤስ። ታኒ ዳሮ ጭማዳ ፑሉማስ፤ ታ ናይት ህንተራ ደኦሶና። ታኒ ታ ናአተፈ ዶማዳ ሀች ጋካናዉ ህንተና ካለስ።

³ ሄኮ፥ ታኒ ህንተ ስንን ኤቃስ፤ ጎዳ ስንንነ እ ትይዳ ካዋ ስንን ታ ቦላ ማርካትተ። ታኒ ኦደ ቦሩ ኤካድና? ኦደ ሀረ ኤካድና? ኦና ጭማድና? ኦና ኡንኤድና? በአሸ በኦናዳ ሀናናዉ ኦደፈ ዎፈ ኤካድና? ሀይሳታፐ እሱዋ ታኒ ኦዳባ ግድኮ ታዉ ኦድተ፤ ታ ቃንፃና” ያግስ።

⁴ ኤንቲ ዛሪድ፥ “ኔኒ ኑና ጭማባካ፤ ዎይኮ ኑና ኡንኤባካ፤ ነ ኦደ ኩሸፐ አይባካ ኤካባካ” ያግዶሶና።

⁵ ሳሜል፥ “ህንተ ታ ኩሸን አይ ባላካ ደምቦናይሳ ጎዳይነ እ ትይዳ ካዎይ ሀች ህንተ ቦላ ማርካ” ያግስ። አሳይ፥ “ኤ፥ ፆሳይ ማርካ” ያግዶሶና።

⁶ ቃስካ ሳሜል፥ “ሙሰነ አሮና ዶርዳይነ ህንተ ማይዛታ ግብፀፈ ከስዳይ ጎዳ።

⁷ ሀእ ህንተዉነ ህንተ ማይዛታስ ጎዳይ ኦዳ ፅሎ ኦሶ ኡባስ ታኒ ህንተነራ ጎዳ ስንን ሞተታና መላ ሀይሳን ኤቅተ።

⁸ ያይቆብነ እያ ሶ አሳይ ግብፀን ደእሽን፥ ግብፀ አሳይ ኤንታ ኡንኤዳ ዎደ ህንተ ማይዛት ጎዳኮ ዋስዶሶና። ጎዳይ ሙሰነ አሮና ኪትስ፤ ኤንቲ ህንተ ማይዛታ ግብፀፈ ከስድ ሀይሳን ዎዶሶና።

⁹ “ሽን እስራኤለ አሳይ ጎዳ ባንታ ፆሳ ዶግዶሶና። ጎዳይ ኤንታ ሀፆራ ቶራ ሞጮና ስሳራ ኩሸን፥ ፍልስፄመ አሳ ኩሸንነ ሞአበ ካዋ ኩሸን አድ እምን ኤንታ ኦልዶሶና።

¹⁰ ኤንቲ፥ ‘ኑኒ ናጋራ ኦዳ፤ ጎዳ አግድ፥ ባኣለነ አስታሮታ ጎይንዳ። ሽን ሀእ ነ ኑና ኑ ሞርከታ ኩሸፐ አሻ፤ ኑኒ ነና ጎይናና’ ያግድ ጎዳኮ ዋስዶሶና።

¹¹ ጎዳይ ገድዮና፥ ባራቃ፥ ዮፍታሄነ ሳሜላ ኪትድ፥ ህንተ ዩሾ ኡባን ደእያ ሞርከታ ኩሸፐ ህንተና አሽስ። ያትን፥ ህንተ ሳሮ ደእደታ።

¹² “አሞነ ካዎይ ናኦስ ህንተኮ ይዳይሳ በእዳ ዎደ ጎዳይ ህንተ ፆሳይ ህንተ ካዎ ግድኮካ፥ ህንተ፥ ‘አካይ፥ ኑኒ ካዎ ኮዮስ’ ያግደታ።

¹³ ሀእ ህንተ ዶርዳነ ኦይችዳ ካዎይ ሀይስሽ። ሄኮ፥ ጎዳይ ህንተ ቦላ ካዎስ።

¹⁴ ህንተ ጎዳስ ያይኮ፥ እያዉ ኪተትኮ፥ እያ ቃላ ስእኮ፥ እያ ኪታ ቦላ ማካሎና እፅኮ፥ ህንተነ ህንተ ቦላ ካዎትያ ካዎይ ጎዳ ህንተ ፆሳ ካልኮ ኡባባይ ሱራና።

¹⁵ ሽን ህንተ ጎዳ ቃላስ ኪተቶና እፅኮነ እያ ኪታ ቦላ ማካልኮ፥ ጎዳ ፕርዳይ ካሰ ህንተ አዋታ ቦላ ይዳይሳዳ ህንተ ቦላካ ያና።

¹⁶ “ህዛ ምንድ ኤቅተ፤ ጎዳይ ህንተ አይፍያ ስንን ኦና ግታባ በእተ።

¹⁷ ሀእ ግስተ ጫካ ዎደ ግደኔ? ጎዳይ ዳዳነ እራ የዳና መላ ታኒ ጎዳ ዎሳና። ህንተ ካዎ ኦይችድ፥ ጎዳ ስንን አይ መላ ኢታባ ኦዳኮ ህንተ አኬካና” ያግስ።

¹⁸ ሳሜል ጎዳ ዎስስ፤ ጎዳይ ሄ ጋላስ ዳዳነ እራ የድስ፤ ሄሳ ግሾ፥ አሳይ ጎዳነ ሳሜላ ዳሮ ያይዶሶና።

¹⁹ አሳይ፥ “ኑኒ ካዎ ኦይችድ፥ ኑ ናጋራ ኡባ ቦላ ሀ ኢታተ ጉጅዳ ግሾ ኑኒ ነ አይለት ሀይቆና መላ ኑስ ጎዳ ነ ፆሳ ዎሳርክ” ያግስ።

²⁰ ሳሜል አሳኮ፥ “ያዮፍተ፤ ህንተ ሀ ኢታተ ኡባ ኦደታ፤ ሽን ህንተ ኩመ ዎዛናን ጎዳስ ኪተትተ፤ እያ ካሎ አጎፍተ።

²¹ ፓናባ ግድያ ግሾ ማዶናነ አሾና ኤቃታ ካሎፍተ።

²² ጎዳይ ባ ግታ ሱን ግሾ ባ አሳ አገና፤ እ ህንተና ባ አሰ ኦናዉ ኡፋይቴስ።

²³ ህንተ ግሾ ዎሳ አጋዳ ጎዳ ቆሆይ ታፐ ሃኮ፤ ታኒ ህንተና ሎኦነ ሱረ ኦግያ ታማርሳና።

²⁴ ጎዳ ያይተ፤ ህንተ ኩመ ዎዛናን አማነትድ፥ እያዉ ኪተትተ፤ ህንተዉ እ ኦዳ ግታባ ሀሳይተ።

²⁵ ሽን ህንተ ዛር ዛር ናጋራ ኦኮ፥ ህንተነ ህንተ ካዎይ ያና” ያግስ።