1 Sameela 1 - ጌሻ ማፃፋ

ሳሜላ የለተ

¹ ደረይ ዳርያ ኤፍሬማ ቢታን፥ ራማ ካታማን ደእያ፥ ኤፍሬማ ኮቸነ ዙፋ ኮቸ ግድዳ፥ ህልቃና ጌተትያ እስ አደይ ደኤስ። እ ይሮሃማ ናአ፤ ይሮሃም ኤልሁ ናአ፤ ኤልሁ ቶሁ ናአ፤ ቶሁይ ዙፋ ናኣ።

² ህልቃናስ ናምኡ ማቸት ደኦሶና፤ እስነ ሱንይ ሃኖ፤ ሀንኮር ሱንይ ፕናኖ። ፕናንስ ናይት ደኦሶና፥ ሽን ሃናስ ናእ ባዋ።

³ ህልቃን ላይን ላይን ኡባፈ ዎልቃማ ጎዳ ጎይናናዉነ እያዉ ያርሻናዉ ሴሎ ቤስ። ኤል ናይት ናምአይ፥ አፍናንነ ፍንሃስ ጎዳ ካህነ ግድድ ሴሎን ሀጋዞሶና።

⁴ ህልቃን ያርሾ ያርሽያ ዎደ ኡባን አሹዋፐ እስ እስ ኩሸ ባ ማቸ ፕናንስ፥ ባ አደ ናይታስነ ማጫ ናይታስ ሁጰን ሁጰን እሜስ።

⁵ ጎዳይ ሃኖ የሎ ድግኮካ፥ ህልቃን እዮ ዶስያ ግሾ፥ እዉ ናምኡ ኩሸ እሜስ።

⁶ ጎዳይ ሃኖ የሎ ድግዳ ግሾ፥ እ ዳዉያ እዮ ቶቻዳ ይሎያዉሱ።

⁷ ሄስ ላይን ላይን ኡባ ዎደ ሀንያባ። ሃና ጎዳ ኬ ብዳ ዎደ ኡባን እ ዳዉያ እያ ዬካና ጋካናዉነ ካ እፃና ጋካናዉ ይሎያዉሱ።

⁸ እ አዝናይ ህልቃን፥ “ሃነ፥ ነ አይስ ዬካይ? አይስ ካ ሚኪ? ነ ዎዛናይ አይስ አዛኒ? ታኒ ነዉ ታሙ ናይታፐ አክናዬ?” ያጌስ።

⁹ እስ ጋላስ ኤንቲ ሴሎን ምዳፐነ ኡይዳፐ ጉየ፥ ሃና ደንዳ ኤቃሱ። ካህነይ ኤል ጎዳ ኬ ፐንግያ ማታን ባ ኡትያ በሳን ኡትስ።

¹⁰ ሃና ዳሮ አዛንዳ ግሾ ጫመታዳ ዬካሸ ጎዳ ዎሳሱ።

¹¹ እያ ሀይሳዳ ያጋዳ ቃንገታሱ፤ “ኡባፈ ዎልቃማ ጎዳዉ፥ ታና ነ አይልዉ በአ። ታ መቱዋ በአዳ፥ ታና ሀሳያ፤ ታና ነ አይልዉ ዶጎፓ። ኔኒ ታዉ ነ አይሌስ አደ ናአ እምኮ፥ እያ ደኦ ላይ ኡባን ታኒ እያ ነዉ እማና፤ እያ ሁጰይ ፖሎ ሜደተና” ያጋሱ።

¹² ሃና ጎዳ ዎሳ አዱስዳ ዎደ ኤል እ ዶና በኤስ።

¹³ ሃና ባ ዎዛናን ፆሳ ዎስያ ዎደ እ መተርሻይ ቃፄስ፥ ሽን እ ቃላይ ስኤተና፤ ሄሳ ግሾ፥ ኤል እዮ ማትዳዳ ቆፕስ።

¹⁴ እ፥ “ኔኒ አዉደ ጋካናዉ ማታይ? ዎይነ ኡሻ ኔፐ ድጋ” ያግስ።

¹⁵ ሃን ዛራዳ፥ “ታ ጎዳዉ፥ ግደና፤ ታኒ ዳሮ አዛንዳ ማጫስ፤ ታኒ ታ ሸምፑዋፈ ጎዳ ዎሳይስፐ አትሽን፥ ዎይነ ዎይኮ ማይያ ኡሹ ኡያብከ።

¹⁶ ታኒ መቶይነ አዛኖይ ዳርዳ ግሾ ዎሳይስ። ታና ነ አይልዉ ፓና ማጫስ ኦዳ ቆፖፋ” ያጋሱ።

¹⁷ ኤል ዛሪድ፥ “ሳሮ ባ፤ ኔኒ ዎስያባ እስራኤለ ፆሳይ ነዉ እሞ” ያግስ።

¹⁸ ሃና፥ “ነ አይልያ ነ ስንን ሳባ ደሞ” ያጋሱ። ሄሳፈ ጉየ፥ እያ ባ ኦግያ ባዳ ካ ማሱ፤ ሄሳፈ ስማዳ እያ አዛናቡኩ።

¹⁹ ዎንተ ጋላስ ጉራ ደንድድ፥ ህልቃንነ እያ ሶ አሳይ ጎዳ ጎይንዳፐ ጉየ፥ ራማ ካታማን ደእያ ባንታ ሶ ስምዶሶና። ህልቃን ባ ማቸ ሃንራ አቅስ፤ ጎዳይ እዮ ቆፕስ።

²⁰ እያ ቃንታዳ አደ ናአ የላሱ። ሃና፥ “ታኒ ጎዳ ዎስን እ ታና ስእስ” ጋዳ እያ ሱን ሳሜላ ሱንሱ።

²¹ ህልቃን ባ ሶ አሳ ኡባራ ላይ ያርሾ ጎዳስ ያርሻናዉነ ቃንገ ጋናዉ ሴሎ ብስ።

²² ሽን ሃና ባቡኩ። እያ ባ አዝናኮ፥ “ናአይ ን ዱዳፐ ጉየ፥ እያ ኤፋዳ፥ ጎዳስ እማና፤ እ መርናዉ ያን ዳና” ያጋሱ።

²³ ህልቃን፥ “ነና ሎእዳባ ኦ፤ እ ን ዱና ጋካናዉ ሶን ጋምአናዉ ዳንዳኣሳ፤ ጎዳይ ባ ገልዳ ቃላ ነዉ ፖሎ” ያግስ። ሃና ባ ናኣ ን ዱና ጋካናዉ ሶን ጋምአሱ።

²⁴ ሃና ናአይ ን ዱዳፐ ጉየ፥ ናኣነ ሄ ላይ ዎፋኖ ላታሙ ክሎ ግራመ ለነ ኦጎሮ ኩመ ዎይነ ኡሹ ኤካዳ ሴሎን ደእያ ጎዳ ኬ ባሱ፤ ሄ ዎደ ናአይ ጉ።

²⁵ ኤንቲ ዎፋኑዋ ሹክዳፐ ጉየ ናኣ ኤልኮ ኤፍዶሶና።

²⁶ ሃና፥ “ታ ጎዳዉ፥ ነ ሸምፖይ ኤሮ፤ ነ ስንን ኤቃዳ ጎዳ ዎስዳ ማጫስያ ታና።

²⁷ ሀ ናኣ እማና መላ ዎስን፥ ጎዳይ ታ ዎስዳባ እሚስ።

²⁸ ሄሳ ግሾ፥ ታኒ እያ ጎዳስ እማስ፤ እ ባ ደኦ ላይ ኡባን ጎዳስ እመትስ” ያጋሱ። ኤንቲ ያን ጎዳ ጎይንዶሶና።