1 Kawota 9 - ጌሻ ማፃፋ

ፆሳይ ሶሎሞነስ ዛሪድ ቆንጭስ

¹ ሶሎሞነይ ፆሳ ኬነ ካዎ ጋ ኬፅድ ዉርስዳ ዎደ ባ ዎዛናን ኦናዉ አሞትዳ ኡባ ፖልዳፐ ጉየ፥

² ጋባኦናን ካሰ ቆንጭዳይሳዳ ጎዳይ ዛሪድ እያዉ ቆንጭስ።

³ ጎዳይ፥ “ኔኒ ታ ስንን ዎስዳ ዎሳነ ዋሱዋ ታኒ ስአስ። ኔኒ ኬፅዳ ኬይ መርናዉ ታ ሱንይ እያን ፄገታና መላ ኦዳ ጌሻስ። ታ አይፈይነ ታ ዎዛናይ ኡባ ዎደ ያን ዳና።

⁴ ሽን ኔኒ ነ አዋይ ዳዊቲ ሄመትዳይሳዳ ቦረይ ባይና ሱረተን ታ ስንን ሄመትኮ፥ ታ ኪታ ኡባ ኦኮነ ታ ዎጋነ ታ ህግያ ናግኮ፥

⁵ ታኒ ነ አዋ ዳዊታስ፥ ‘እስራኤለ ካዎተ አራታን ኡትያ አስ ኔኒ ኩመ ያካ’ ” ግዳይሳዳ ነ አራታ እስራኤለ ቦላ መርናዉ ምንዳ ኤሳና።

⁶ “ሽን ነ ዎይኮ ነ ናይት ታና ካሎ አግድ ጉየ ስምኮ፥ ታኒ ህንተና ኪትዳ ታ ኪታነ ታ ዎጋ ናጎና እፅድ አላጋ ፆሳታ ጎይንኮ፥

⁷ እስራኤለ አሳ ታኒ ካሰ ኤንታዉ እምዳ ቢታፈ ሾዳና፤ ታኒ ታ ሱንስ ጌሽዳ ሀ ኬ አጋና። እስራኤለት አሳ ኡባ ግዶን ካስነ ሚቻስ አታና።

⁸ ሀ ማላልስያ ፆሳ ኬይ ላለትድ ላለ ዶረ ግዳና። ማታራ አያ አሳ ኡባይ ዳጋምድ፥ ‘ጎዳይ ሀ ቢታነ ሀ ፆሳ ኬ አይስ ሀይሳዳ ኦዴ?’ ያጋና።

⁹ አሳይ ዛሪድ፥ ‘ኤንታ ማይዛታ ግብፀፈ ከስዳ፥ ጎዳ ባንታ ፆሳ ኤንቲ አግድ፥ አላጋ ፆሳታ ካልዳ ግሾነ ኤንታ ጎይንዳ ግሾ ጎዳይ ኤንታ ቦላ ሀ ኢታባ ኡባ ኤህስ’ ” ያግድ ዛራና።

ሶሎሞነ ሀራ ኦሶታ

¹⁰ ሶሎሞነይ ሀ ናምኡ ኬታ፥ ፆሳ ኬነ ባ ካዎ ጋ ኬፅዳ ላታማን ላይ ዉርሰን፥

¹¹ ፅሮሳ ካዎይ ክራም ፂዳ፥ ዝጋነ ዎርቃ ኡባ እምዳ ግሾ፥ ጋልላን ደእያ ላታሙ ካታማታ ሶሎሞነይ እያዉ እሚስ።

¹² ሽን ክራም ፅሮሳፐ ከይድ፥ ሶሎሞነይ እያዉ እምዳ ካታማታ በአናዉ ብዳ ዎደ ካታማት እያ ኡፋይስቦኮና።

¹³ ክራም ሶሎሞነኮ፥ “ታ እሻዉ፥ ሀይሳቲ ነ ታዉ እምዳ ካታማት አይባ ካታሜ?” ያግስ። ሄሳ ግሾ፥ እ ሄ ካታማታ፥ “ፓና ቢታ” ያግድ ሱንስ። ሄ ሄራይ ሀች ጋካናዉ ሄ ሱንን ፄገቴስ።

¹⁴ ክራም 4,000 ክሎ ግራመ ዎርቃ ካዋ ሶሎሞነስ ካሰ የድስ።

¹⁵ ፆሳ ኬ፥ ካዎ ጋ፥ ሚሎ፥ የሩሳላመ ካታማ ግምብያ፥ ሀፆራ፥ ማግዶነ ገዘራ ግምባናዉ ካዋ ሶሎሞነስ ኦሳንቾት ደኦሶና።

¹⁶ ግብፀ ካዎይ ካሰ ገዘራ ኦይክድ ታማን ፁግስ። ካታማን ደእያ ካናነ አሳታ ዎስ፤ ሶሎሞነይ ኤክዳ ባ ናእዉ ዎይቶ ኦድ እሚስ።

¹⁷ ሶሎሞነይ ገዘራነ ጋርሳ ቤት-ሀሮና ዛሪድ ኬፅስ።

¹⁸ ባእላታ፥ ይሁዳ መላ ደእያ ታማራ፥

¹⁹ ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ናግያ ካታማታ፥ የሩሳላመን፥ ልባኖሰንነ እ ሃርያ ቢታ ኡባን ኬፃናዉ ኮይዳ ኡባ ኬፅስ።

²⁰ አሞረታፐ፥ ህተታፐ፥ ፓርዘታፐ፥ ህወታፐነ ያቡሰታፐ አትዳ አሳት ኡባይ እስራኤለ አሰ ግዶኮና።

²¹ ኤንቲ እስራኤለ አሳይ ቢታፈ ዉርስድ ይሳናዉ ዳንዳኦና እፅን ሄ ቢታን አትዳ አሳ ኮቻታ። ሶሎሞነይ ኤንታ አይለ ኦን፥ ኤንቲ ሀች ጋካናዉ አይለተን ኦሶና።

²² ሽን ሶሎሞነይ እስራኤለ አሳፐ ኦናካ አይለ ኦቤና። ኤንቲ እያዉ ሞርናታ፥ ኦላንቾታ፥ ቶራ ሞጮና፥ ፓራ ጋረ ላግያ አሳስ ሀላቃነ ፓራ አስ ግድድ ኦዶሶና።

²³ ኤንቲ ሶሎሞነይ ኦስስያ ኬ ኬፀይሳታ ሀላቃታ፤ ኤንቲ እቻሹ ፄታነ እሻታማ።

²⁴ ግብፀ ካዋ ናእያ ዳዊታ ካታማፐ ሶሎሞነይ እዉ ኬፅስዳ ኬ ይዳፐ ጉየ፥ እ ሚሎ ካታማ ግምብስ።

²⁵ ሶሎሞነይ ጎዳስ ግምብዳ ያርሾ በሳን ፁሳነ እስፈተ ያርሾ ላይን ሄ ቶሆ ያርሼስ። ጎዳ ስንን እፃነ ጩይሴስ፤ ሄሳን ፆሳ ኬይ ፖለትስ።

²⁶ ሄሳፈ ጉየ፥ ካዎይ ሶሎሞነይ ኤዶመ ቢታን ዞኦ አባ ጋፃን፥ ኤሎታ ማታን ደእያ ኤፅዮን-ጋብራን ማርካበታ ኦስ።

²⁷ ካዎይ ክራም ሶሎሞነ አሳራ ኦና መላ ማርካበ ላጎን ሎህዳ ባ አሳታ ኪትስ።

²⁸ ኤንቲ ኦፍራ ቢታ ብድ 14,000 ክሎ ግራመ ዎርቃ ካዋ ሶሎሞነስ ኤክድ ይዶሶና።