1 Kawota 7 - ጌሻ ማፃፋ

ሶሎሞነ ካዎ ጋ

¹ ሶሎሞነይ ባ ጋዋ ታማነ ሄ ላይን ኬፅድ ዉርስስ።

² “ልባኖሰ ዎራ ኬ” ጌተትያ ኬ ሶሎሞነይ ኬፅስ፤ ሄ ኬ አዱሳተይ ፄቱ ዋ፤ ጎምፓይ እሻታሙ ዋ፤ ጌሳይ ሀስታሙ ዋ። ዝጋ ቱቀት ኦይዱ ማራን ኤቅዶሶና፤ ማሰትዳ ዝጋ ምት ኤንታ ቦላ ዎዶሶና፤

³ ዝጋ ምት ሄ ማራን፥ እስ እስ ማራን ታማነ እቻሹ ምት ደኦሶና፤ ኤንቲ ኩመ ኦይታማነ እቻሻ።

⁴ ሄ ኬስ ማስኮተት ሄ ማራን ደኦሶና፤ ኤንቲ እሶይ እሱዋ ስንን ደኦሶና።

⁵ ፐንገትነ ማስኮተት ኦይዱ ማዛነራ ደኦሶና፤ ማስኮተት ሄ ማራን ግድድ፥ እሶይ እሱዋ ስንን ደኦሶና።

⁶ ሶሎሞነይ፥ “ቱኡቀይ ኩምዳ ኬ” ጌተትያ ኬ ኬፅስ፤ ሄ ኬ አዱሳተይ እሻታሙ ዋ፤ ጎምፓይ ሀስታሙ ዋ። ሄ ኬ ስንን ዳሮ ቱቀን ዘምፕዳነ ቦላራ ካራን ካመትዳ ባራንድ ደኤስ።

⁷ ሶሎሞነይ ፕርዳ አራታይ ደእያ “ፕርዳ ኬ” ኬፅስ፤ ሄ ኬይ ዉይገፐ ብድ ካራ ጋካናዉ ዝጋን ካመትድ ኡትስ።

⁸ ፕርዳ ኬፈ ጉየ ባጋራ ደእያ ሀራ ዳባባን ባዉ ዳናዉ ካዎ ጋ ሀንኮ ኬታዳ ኦድ ኬፅስ። ባ ማቸ፥ ግብፀ ካዋ ናኤስ፥ ሄ ኬ መላ ሀራ ኬ ኬፅስ።

⁹ ሀ ኬት ኡባይ፥ ካረፐ ዶምድ ድርሳፈ ሶራ ደእያ ግታ ጉታራ ጋካናዉ፥ ባሱዋፐ ዶምድ ካራ ጋካናዉ፥ ልክድ ማስዳነ ሶራነ ካረራ ጊግስዳ ሎኦ ሹቻን ኦሰትዶሶና።

¹⁰ ግምበይ ሂፀትዳይ ታሙ ዋ ዎይኮ ሆስፑን ዋ ግድያ ሎኦ ማሰትዳ ግታ ሹቻና።

¹¹ ቦላ ባጋራ ልከትድ ማሰትዳ ሎኦ ሹችነ ዝጋ ም ደኤስ።

¹² ግታ ዳባባ ዩሹዋን ደእያ ግምበይ ፆሳ ኬዳነ ባራንዳዳ ማሰትዳ ሄ ሹቹ፥ እሱዋ እሱዋ ቦላ ዎድ፥ እስ ማሰትዳ ዝጋ ኤንታ ቦላ ዎድ ግምብስ።

ፆሳ ኬ ሚሸታ

¹³ ካዎይ ሶሎሞነይ፥ ክራማ ጌተትያ አድያ ፅሮሳፐ ኤህስ።

¹⁴ ክራማ አይያ አምኦ፤ እያ ንፍታለመ ኮቸ። እያ አዋይ ፅሮሳ አስ። ክራም ናሰ ብራታ ቆፅያ ሂል ደእያ አሰ፤ እ ናሰ ብራታ ቆፅድ ኦያባን ዳሮ ሎህዳ አስ፤ እ ሶሎሞነኮ ይድ እያ ኦሶ ኡባ ኦስ።

¹⁵ ክራም እሱዋ እሱዋ ጌሳይ ታማነ ሆስፑን ዋ አዱቅድ፥ ዩሾይ ታማነ ናምኡ ዋ ዳልግዳ ናምኡ ቱሳታ ናሰ ብራታ ሴርስድ ከስስ። ሄ ቱሳ ኦርደተይ ኦይዱ ብራ። ናምአን ቱቀይካ ሄሳ መላ።

¹⁶ ሄሳዳካ፥ ቱሳታ ሁጰን ዎናዉ ናምኡ ጉምቦታ ናሰ ብራታ ሼሽድ፥ መስ፤ እስ እስ ጉምቦይ እቻሹ ዋ አዱቄስ።

¹⁷ ቱኡሳ ሁጰን ደእያ እስ እስ ጉምቦታ ግተዳ ኦዳ ላፑን ሳንላታ ኦስ።

¹⁸ ቱሳታ ፄራን ደእያ ጉምቦታ አሌቅሳናዉ ናምኡ ማራን ኦሮማነ ምስለ አሌቅስስ።

¹⁹ ባራንዳን ኤቅዳ ቱሳታ ቦላ ደእያ ጉምቦት ጪሻ መን አሌቀትዶሶና፤ ኤንታ ጌሳይ ኦይዱ ዋ።

²⁰ ናምኡ ቱቀታ ሁጰን ደእያ ጉምቦታን ገርቶ ግድድ ኡትዳ በሳፈ ቦላ ባጋራ፥ ሳንላታ ግትያ ካልድ፥ ናምኡ ፄቱ ኦሮማነ ምስለት ናምኡ ማራን ዩይ አድ ደኦሶና።

²¹ ክራም ሄ ናምኡ ቱሳታ ፆሳ ኬ ባራንዳ ማታን ኤስስ። ኡሻቻ ባጋራ ኤቅዳ ቱሳ ያክና ግድ ሱንስ፤ ሀድርሳ ባጋራ ኤቅዳ ቱሳ ቦኤዛ ግድ ሱንስ።

²² ቱሳታ ሁጰን ደእያ ጉምቦት ጪሸ ዳንድ መትዶሶና። ሄሳዳ ሀንድ ቱሳታ ኦሶይ ፖለትስ።

²³ ክራም አባ ሳንያ ጌተትያ እስ ዳሮ ግታ ሳንያ ናሰ ብራታ ሼሽድ መስ። ሄ አባ ሳንያ ዶናይ ሀ ጋፃፐ ያ ጋፃ ጋካናዉ ታሙ ዋ፤ ጌሳይ እቻሹ ዋ፤ ዩሾይ ሀስታሙ ዋ።

²⁴ አባ ሳንያ ዶናን ካረ ባጋራ ዝቅ ግድ፥ እያራ ኦይከትድ መትዳ ጎሰ ምስለት ደኦሶና፤ ሄ ጎሰታ ምስለት ናምኡ ማራን፥ እስ እስ ዋን ታማይ ታማይ ዩይ አድ ሹየትዶሶና።

²⁵ አባ ሳነይ ናሰ ብራታፐ መትዳ ታማነ ናምኡ ቦራታ ምስለታ ዞኩዋን ኡትስ። ቦራ ምስለታፐ ሄት ፑደሀ ባጋ፥ ሄት ዶሎሀ ባጋ፥ ሄት ዱገሀ ባጋ፥ ሄት ዉሎሀ ባጋ ስሚድ ፄሎሶና። አባ ሳነይ ኤንታ ቦላ ኡትስ።

²⁶ አባ ሳነይ ኦይዱ ብራ ኦርደ፤ እያ ዶናይ ዋንጫ ዶና መላ፤ ጪሸ ዳኔስ። አባ ሳነይ ኦይታማነ እቻሹ ሙኩሉ ልትሮ ግድያ ሃ ኦይኬስ።

²⁷ ክራም ታሙ ጋረታ ናሰ ብራታፐ መስ። ሄ ጋረት እሶይ እሶይ ኦይዱ ዋ አዱሰ፤ ኦይዱ ዋ ዳልጋነ ሄ ዋ ቃ።

²⁸ ሄ ጋረት ሀይሳዳ ኦሰትዶሶና፤ ፑደ ኤቅዳ ኦይዱ ብራታ ቦላ ፕድ ግዳ ሎቸ ናሰ ብራታት ኦይከትድ ኡትዶሶና።

²⁹ ሄ ብራታ ቦላ ጋሞ፥ ቦርነ ክሩበ ምስለት ደኦሶና፤ ጋሞነ ቦራ ምስለታፐ ሁጰራነ ቶሆራ ደእያ ብራታታ ቦላ ቆፅድ መዳ ጪሻ ኤንጩርሳ ምስለት ደኦሶና።

³⁰ እስ እስ ጋርያስ ናሰ ብራታፐ ኦዳ ኦይዱ ገርቶትነ ገርቶታ ጋድ ዋፅያ ናሰ ብራታ ካሶት ደኦሶና። ሄሳዳካ፥ ኦይዱ ማዛነን ከርያ ዘምፕስያባት ደኦሶና። ሄ ዘምፕስያባት ጪሻ ኤንጩርሳ ምስለታን አሌቀትድ ኡትዶሶና።

³¹ ጋርያ ዘምፕስያ ሚሸታ ሁጰን ገርቶት ኡትዳ ዶያ በሲ ደኤስ፤ ሄ ዶያይ ጋርያ ፄራፐ ፑደ እስ ዋ ቁ ግድ፥ ዱገ ታካ ዝቅ ግድ መትስ። ሄ ዶያ በሳ ዶና ዩሾይ ምስለን አሌቀትስ።

³² ገርቶታ ጌሳይ እስ ዋነ ታካ፤ ገርቶት ሎቸ ናሰ ብራታታስ ጋርሳ ባጋራ ደኦሶና። ገርቶት ኦይከትድ ኡትዳ ካሶት ጋርያራ ኦይከትድ ኡትዶሶና።

³³ ገርቶት ኦላ ፓራ ጋረ ገርቶታ መላ መትዶሶና፤ ገርቶታ ጋድ ኦይክያ ካሶት፥ ማጫራትነ ኤንታ ኦይክያ ሚሸት ኡባይ ናሰ ብራታፐ ኦሰትዶሶና።

³⁴ ሄ ጋረታ ኡባ ማዛነታስ ኤንታ ቶሆሶራ ቶሆሶራ ኤንታራ እሶ ግድድ ኦይከትዳ ናሰ ብራታፐ ኦሰትዳ ዘምፖት ደኦሶና።

³⁵ እስ እስ ጋርያ ሁጰ ባጋ ዩሹዋን ታካ አዱቅያ ክርክሮይ ደኤስ፤ ዘምፖትነ ሎቸ ናሰ ብራታት ጋርያራ ኦይከትድ፥ እሶ ግድድ ኦሰትዶሶና።

³⁶ ሀ ዘምፖታፐነ ሎቸ ናሰ ብራታታፐ ግዶን ደእያ ዶያ በሳ ኡባይ ክሩበን፥ ጋሞንነ ዛምባ ምስለተን አሌቀትድ ኡትዶሶና፤ ኤንታ ዩሾይ ጪሻ ኤንጩርሳ ምስለን አሌቀትድ ኡትስ።

³⁷ ህዛ ታሙ ጋረት ሀይሳዳ ኦሰትዶሶና፤ ኤንታ ላንፅዳ ሚሸይ እስኖ ግድያ ግሾ ኤንታ ጌሳይነ ኤንታ መይ እስ መላ።

³⁸ ክራም ሜጨትያ ታሙ ከረታ ናሰ ብራታፐ መስ፤ እስ እስ ከርያ ጎምፓይ ኦይዱ ዋ ዳልጋ ግድድ፥ ሆስፑን ፄቱ ልትሮ ሃ ኦይኬስ፤ ታሙ ጋረታስ ሁጰን ሁጰን እስ እስ ሜጨትያ ከረይ ደኤስ።

³⁹ ክራም እቻሹ ጋረታ ፆሳ ኬፈ ፑደሀ ባጋራ፥ እቻሹ ጋረታ ፆሳ ኬፈ ዱገሀ ባጋራ ዎስ፤ ናሰ ብራታፐ ኦሰትዳ አባ ሳንያ ፆሳ ኬፈ ዱገሀ ዶሎሀ ባጋ ዛሪድ ኤስስ።

⁴⁰ ክራም ቃጰታ፥ አካፋታነ ፃሮታ መስ፤ ያትድ ካዋ ሶሎሞነስ ፆሳ ኬ ኦሱዋ ኦድ ፖልስ።

⁴¹ እ ኦዳ ኦሶት፥ ናምኡ ቱሳታ፥ ቱሳታ ሁጰን ደእያ ሳነ ዳንያ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ሳንላታታ፥

⁴² እስ እስ ጉምቡዋ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ምስለታ፥ ኩም ኦይዱ ፄቱ ኦሮማነ ምስለታ፥

⁴³ ታሙ ጋረታ፥ ጋረታ ቦላ ኡትያ ታሙ ሜቻ ከረታ፥

⁴⁴ አባነ እያ ካትስያ ታማነ ናምኡ ቦራ ምስለታ፥

⁴⁵ ከረታ፥ አካፋታነ ፃሮታ። ክራም ካዋ ሶሎሞነስ ፆሳ ኬ ኦሱዋስ መዳ ሚሸታ ኡባ ቁሸትዳ ናሰ ብራታፐ መስ።

⁴⁶ ካዎይ ሶሎሞነይ ሱኮታፐነ ፃርታናፐ ግዶን፥ ዮርዳኖሰ ደንባን ደእያ፥ ናሰ ብራታ ሼሽያ በሳን ሀይሳታ ኦስስስ።

⁴⁷ ናሰ ብራታፐ ኦሰትዳ ሚሸይ ዳሮ ግድዳ ግሾ፥ ሶሎሞነይ እያ ማዛንስቤና፤ ሄሳ ግሾ፥ አይ መላ ዴፅያኮ ልከይ ኤረትቤና።

⁴⁸ ሶሎሞነይ ፆሳ ኬ ግዶን ደእያ ሚሸታ ኡባ ዎርቃፈ መስስ። ሄሳትካ፥ ዎርቃፈ ኦሰትዳ ያርሾ በሳ፥ ጎዳ ስንን ዎያ ኡይይ ኡትያ ፃርጴዛ፥

⁴⁹ ኡባፈ ጌሻ በሳፈ ስንን ኡሻቻ ባጋራነ ሀድርሳ ባጋራ ኤቅዳ እቻሹ እቻሹ ፆምፐ ዎያ ኮጫታ፥ ጪሻታ፥ ፆምፐታነ ቃጰታ፥

⁵⁰ ፁአታ፥ ፆምፐ ቶይስያባታ፥ ፃሮታ፥ እፃነ ጩይስያባታ፥ ታማ ኤክያ ሚሸታ፥ ኡባፈ ጌሻ በሳ ቆልአ ፐንገታነ ፆሳ ኬ ካረ ባጋ ፐንገታ ኦይክዳ ማፃፈታ። ሀ ሚሸት ኡባይ ዋላህ ባይና ዎርቃፈ ኦሰትዶሶና።

⁵¹ ካዎይ ሶሎሞነይ ፆሳ ኬ ኦሱዋ ኡባ ፖልዳፐ ጉየ፥ እያ አዋይ ዳዊቲ ጎዳስ ዱማይድ ዎዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬ ሻሎ ምንጅያ ኬን ዎስ።