1 Kawota 6 - ጌሻ ማፃፋ

ፆሳ ኬይ ኬፀትስ

¹ እስራኤለ አሳይ ግብፀ ቢታፈ ከይዳ 480 ላይን፥ ሶሎሞነይ እስራኤለ ቦላ ካዎትዳ ኦይዳን ላይን፥ ዚፋ ጌተትያ ናምአን አጌናን፥ ሶሎሞነይ ጎዳ ፆሳ ኬ ኬፃናዉ ዶምስ።

² ሶሎሞነይ ኬፅዳ ፆሳ ኬይ አዱሳተይ ኡሱፑን ታሙ ዋ፤ ጎምፓይ ላታሙ ዋ፤ ጌሳይ ሀስታሙ ዋ።

³ ፆሳ ኬ ገልያ በሳን ደእያ ባራንዳ ጎምፓይ ፆሳ ኬ ጎምፓ መላ ላታሙ ዋ፤ ኬ አዱሳተይ ፆሳ ኬ ገልያ በሳ ጋካናዉ ታሙ ዋ።

⁴ ፆሳ ኬስ ሶ ባጋራ ዳልጋ፥ ካረ ባጋራ ፁን ማስኮተት ደኦሶና።

⁵ ፆሳ ኬ ማታን፥ ጌሻ በሳነ ኡባፋ ጌሻ በሳ ዩሹዋን ሀራ ፖቀ ኬፅስ፤ ሄ ዩሹዋን ክፍለታ ኬፅስ።

⁶ ኮይሮ ፖቅያ ጎምፓይ እቻሹ ዋ፤ ናምአን ፖቅያ ጎምፓይ ኡሱፑን ዋ፤ ሄን ፖቅያ ጎምፓይ ላፑን ዋ። እስ እስ ፖቅያ ጎዳይ ጋርሳ ባጋራ ደእያ ጎዳፐ ሌኦ። ጌሻ በሳ ካንድ ገሎና መላ ፆሳ ኬ ጎዳስ ካረ ባጋራ ተቀ ዎስ።

⁷ ፆሳ ኬይ ሹቻ ቆእያ በሳን ማሰትዳ ሹቻ ፃላላን ግምበትስ፤ ፆሳ ኬይ ግምበትያ ዎደ ናርቃ፥ ካልታ፥ ዎይኮ ሀራ አይ ብራታ ግርስ ፆሳ ኬን ስኤትቤና።

⁸ ጋርሳራ ደእያ ፖቅያ ገልያ ፐንገይ ፆሳ ኬፈ ዱገሀ ባጋራ ደኤስ፤ ሄ በሳፈ ናምአን ፖቅያነ ሄን ፖቅያ ባናዉ የድ ከይያ ደት ደኦሶና።

⁹ ሄሳዳ ኦድ፥ ሶሎሞነይ ኬ ኬፅድ ዉርስስ፤ ኮርንስያ ማሰትዳ ዝጋ ምን ካምስ።

¹⁰ ፆሳ ኬ ዩሹዋን ፖቀታ ኬፅድ ኦንግስ፤ ኤንታ እሱዋ እሱዋ ጌሳይ እቻሹ ዋ ግድድ፥ ጎዳራ ዝጋ ምን ኦይከትስ።

¹¹ ጎዳይ ሶሎሞነኮ፥

¹² “ሀ ኔኒ ኬፅያ ፆሳ ኬን፥ ኔኒ ታ አዋጁዋ ካልኮ፥ ታ ዎጋ ኦኮ፥ ታ ኪታ ናግኮነ ታ ኪታ ኪተትኮ፥ ታኒ ነ አዋ ዳዊታስ እምዳ ኡፋይሳ ቃላ ነ ባጋራ ፖላና።

¹³ ታኒ እስራኤለ አሳ ግዶን ዳና፤ ታኒ ታ አሳ እስራኤለ አግከ” ያግስ።

¹⁴ ሶሎሞነይ ፆሳ ኬ ኬፅድ ኦንግስ።

¹⁵ ፆሳ ኬ ጋ ባጋ ጎዳ፥ ዉይገፐ ብድ ካራ ጋካናዉ ማሰትዳ ዝጋ ምን ካምስ፤ ዉይግያን ማሰትዳ ፂዳ ም ሂፅስ።

¹⁶ ፆሳ ኬ ግዶን ኡባፈ ጌሻ በሳ መናዉ ጉየ ባጋራ ላታሙ ዋ ግድያ በሰ ሻክድ፥ ዉይገፐ ካራ ጋካናዉ ማሰትዳ ዝጋ ጎዳ ኤስስ።

¹⁷ ሄ ኡባፈ ጌሻ በሳፈ ስን ባጋራ ደእያ ዉይግያ አዱሳተይ ኦይታሙ ዋ።

¹⁸ ፆሳ ኬ ሶ ባጋይ ጎሰነ ጪሻ ምስልያ መዳ ማሰትዳ ዝጋ ምን ካመትስ፤ ኡባይ ዝጋፐ ኦሰትስ፤ አይ ሹችካ በንተና።

¹⁹ ሶሎሞነይ ጎዳ ጫቆ ታቦትያ ዎናዉ ፆሳ ኬ ግዶን ኡባፈ ጌሻ በሳ ጊግስስ።

²⁰ ኡባፈ ጌሻ በሳይ ላታሙ ዋ አዱሰ፥ ላታሙ ዋ ዳልጋነ ላታሙ ዋ ቃ። ሶሎሞነይ ሄ ኡባፈ ገሻ በሳ ጋ ባጋ ዋላህ ባይና ዎርቀን ላንፅስ፤ ያርሾ በሳይ ማሰትዳ ዝጋ ምን ካመትስ።

²¹ ሶሎሞነይ ፆሳ ኬ ግዱዋ ዋላህ ባይና ዎርቀን ላንፅስ፤ ዎርቃን ላንፀትዳ ቆልአ ገልያ ፐንግያ ቦላ ያነ ሃነ ጋክያ ዎርቃ ሳንላታ ቶልድ አሌቅስስ።

²² ኬ ግዶ ባጋ ዎርቃን ላንፅስ፤ ኡባፈ ጌሻ በሳ ስንን ደእያ ያርሾ በሳ ዎርቃን ላንፅስ።

²³ ኡባፈ ጌሻ በሳን ዎናዉ እሶይ እሶይ ታሙ ዋ አዱቅያ ሻማሆፐ ኦሰትዳ ናምኡ ክሩበ ምስለታ ማስድ ጊግስስ።

²⁴ ኮይሮ ክሩብያ ቀፈይ፥ እሶይ እቻሹ ዋ፤ ናምአንይ እቻሹ ዋ፤ ኮይሮ ቀፍያ ፄራፐ ብድ ናምአን ቀፍያ ፄራ ጋካናዉ ታሙ ዋ።

²⁵ ናምአን ክሩበይ ታሙ ዋ፤ ናምኡ ክሩበታ ሀኖታይነ መይ እስ መላ።

²⁶ እስ ክሩብያ ጌሳይ ታሙ ዋ፤ ናምአን ክሩብያ ጌሳይ ሄሳ መላ።

²⁷ ሶሎሞነይ ፆሳ ኬን ደእያ ኡባፈ ጌሻ በሳን ክሩበታ ዎስ። ኤንታ ቀፈይ ምጨትድ ኡትስ፤ እስ ክሩብያ ቀፈይ እስ ባጋ ጎዳ ቦችያ ዎደ፥ ሀንኮ ክሩብያ ቀፈይ ሀንኮ ባጋ ጎዳ ቦቼስ፤ ኤንታ ናምኣ ቀፈይ ሶ ግዶን እሶይ እሱዋ ቦቾሶና።

²⁸ ሶሎሞነይ ክሩበታ ዎርቃን ላንፅስ።

²⁹ ቆልአነ ዉይገ ጎዳ ኡባ ክሩበታ፥ ዛምባነ ጪሻ ምስለን አሌቅስስ።

³⁰ ፆሳ ኬ ግዶ ክፍልያ ዉይግያ ካረ ባጋ ክፍልያ ዉይግያ ዎርቃን ላንፅስ።

³¹ ኡባፈ ጌሻ በሳ ገልያ ፐንግያን ሻማሆ ምፈ ሳንቃ ጊግስስ። ፐንገ ጎባነታስ እቻሹ ባጋራ ማዛነይ ደኤስ።

³² ሻማሆ ምፈ ኦሰትዳ ናምኡ ሳንቃታ ቦላ ክሩበታ፥ ዛምባነ ጪሻ ምስለ ጊግስድ ሳንቃታ፥ ክሩበታነ ዛምባ ዎርቃን ላንፅስ።

³³ ሄሳዳካ፥ ፆሳ ኬ ገልያ ፐንግያ ሻማሆፐ ኦሰትዳ ኦይዱ ማዛነራ ደእያ ሳንቃ ጊግስስ።

³⁴ እ ሄ ፐንግያ እስ እስ ሳንቃይ ግዶን ዳኮትድ ዶየትያ ናምኡ ሳንቃታ ከስስ።

³⁵ ክሩበታ፥ ዛምባነ ጪሻ ምስለታ ኤንታ ቦላ ዎስ፤ ኤንታ ቦላ ዎርቃ እስ ግና ኦድ ላንፅስ።

³⁶ ሶ ባጋራ ደእያ ዳባባ ግምብስ፤ ሄ ግምብያ ቦላ ማሰትዳ ሄ ሹቹ፥ እሱዋ እሱዋ ቦላ ዎድ፥ እስ ማሰትዳ ዝጋ ኤንታ ቦላ ዎድ ግምብስ።

³⁷ ፆሳ ኬ ባሶይ ሶሎሞነይ ካዎትዳ ኦይዳን ላይን፥ ዚፋ ጌተትያ ናምአን አጌናን ባሰትስ።

³⁸ ሶሎሞነይ ካዎትዳ ታማነ እስን ላይን፥ ቡላ ጌተትያ ሆስፑን አጌናን ፆሳ ኬይ ሀልችዳይሳ መላ ኬፀትድ ዉርስ። ሶሎሞነይ ፆሳ ኬ ላፑን ላይን ኬፅድ ዉርስስ።