1 Kawota 5 - ጌሻ ማፃፋ

ፆሳ ኬ ኬፃናዉ ጊገተ

¹ ፅሮሳ ካዎይ ክራም ዳዊታራ ስጋን ጋምእዳ ግሾ፥ ሶሎሞነይ ባ አዋ ዳዊታ በሳን ካዎታናዉ ትየትዳይሳ ስእድ፥ አሰ ሶሎሞነኮ ኪትስ።

² ሶሎሞነይ ዛሪድ፥

³ “ጎዳይ እያ ሞርከታ እያ ቶሁዋፐ ጋርሳን ሃርሳና ጋካናዉ፥ ታ አዋ ዳዊታ ቦላ ደንድዳ ኦላ ጋሶን፥ ጎዳ ባ ፆሳ ሱንስ ፆሳ ኬ ኬፅቦናይሳ ነ ኤራሳ።

⁴ ሽን ሀእ ጎዳይ ታ ፆሳይ ታዉ ሸምፖ እሚስ፤ ታዉ አይባ ሞርከይ ዎይኮ ኢታባ ኦይ ባዋ።

⁵ ጎዳይ ታ አዋ ዳዊታስ፥ ‘ታኒ ነ በሳን፥ ነ አራታን ካዎያ ነ ናአይ ታ ሱንስ ኬ ኬፃና’ ግዳይሳዳ ታኒ ጎዳ ታ ፆሳ ሱንስ ኬ ኬፃናዉ ሀልቻስ።

⁶ ሄሳ ግሾ፥ ልባኖሰፐ ዝጋ ማስያ አሳታ የዳ፤ ታ አሳት ነ አሳታራ ኦና። ነ አሳታስ ነ ቃንፃ ግዳባ ታ ቃንፃና። ስዶና አሳታዳ ም ማሰ ሂላ ኑ አሳይ ኤሮናይሳ ነ ኤራሳ” ያግስ።

⁷ ክራም ሶሎሞነ ኪታ ስእድ ዳሮ ኡፋይትስ፤ “ሀ ግታ ካዎተ ሃራና መላ ዳዊታስ ሀ ጭንጫ ናኣ እምዳ ጎዳይ ጋላተቶ” ያግስ።

⁸ ሄሳፈ ጉየ ክራም ሶሎሞነኮ ሀይሳዳ ያግድ ኪትስ፤ “ነ ኪትዳ ኪታይ ታና ጋክስ። ኔኒ ኮይዳባ ታኒ ኦና፤ ዝጋነ ፂዳ ታ ነዉ ሺሻና።

⁹ ታ አሳይ ዱሩማ ጪነ ልባኖሰፐ አባኮ ጋዛና። ታኒ ቃሽሳዳ፥ አባ ቦላራ ቶከትድ ነ ኮይያ በሲ ጋናዳ ኦና፤ ያን ኤንቲ ብርሽድ ነ አሳስ እማና። ሄሳፈ ጉየ፥ ኔኒ ነ ባጋራ ታ ካዎ ኬን ደእያ አሳስ ምያባ ኪታዳ ታ አሙዋ ፖላና” ያግስ።

¹⁰ ሄሳዳ ኦድ ክራም ሶሎሞነይ ኮይዳ ኬና ዝጋነ ፂዳ እሚስ።

¹¹ ሶሎሞነይ ካዎ ኬን ደእያ አሳይ ማና መላ 20,000 ኩንታለ ግስተነ 400,000 ልትሮ ሻማሆ ዛይተ ላይን ላይን ፓጮና ክራማስ እሚስ።

¹² ጎዳይ ሶሎሞነስ እማና ግዳይሳዳ፥ እያዉ ጭንጫተ እሚስ። ክራምነ ሶሎሞነይ ባንታ ግዶን ሳሮ ደእዶሶና፤ ኤንቲ ናምአይ ባንታ ግዶን ጫቅዶሶና።

¹³ ካዎይ ሶሎሞነይ እስራኤለ 30,000 ማዳ ኦይሳታ ዶርድ ከስስ።

¹⁴ አዶንራማ ጌተትያ አድያ ኤንታ ቦላ ሀላቃ ኦድ ሹምስ። ሄ ኦሳንቾታ ታሙ ታሙ ሙኩላን ሻክድ፥ ሄ ጩጋ ከስስ፤ እስ እስ ጩጋይ ታራን ታራን ብድ፥ እስ አጌና ልባኖሰን ኦናዳነ ናምኡ አጌና ባንታ ሶን ዳናዳ ኦስ።

¹⁵ ሶሎሞነስ ቶሆ ቶክያ 70,000 አሳትነ ሹቹ ቆእያ 80,000 አሳት ገዘ ቢታን ደኦሶና።

¹⁶ ኤንታ ቦላ ሀላቃ ግድድ ኦስስያ 3,300 አሳታ ሹምስ።

¹⁷ ካዋ ሶሎሞነ ኪታን፥ ፆሳ ኬ ባሱዋስ ግዳና መላ ግታ ሹቻታ ቆእድ ጊግስዶሶና።

¹⁸ ሶሎሞነ አሳይነ ክራማ አሳይ ኩሸ ሂላ ኤረይሳት፥ ገባላ አሳራ ግድድ፥ ፆሳ ኬ ኬፃናዉ ም ቃንፅድ፥ ሹቻ ቆእድነ ማስድ ጊግስዶሶና።