1 Kawota 3 - ጌሻ ማፃፋ

ሶሎሞነይ ጭንጫተስ ዎስስ

¹ ሶሎሞነይ ግብፀ ካዋራ ቦሎትድ፥ እያ ናእዉ ባዉ ማቾ ኤክስ። ባ ካዎ ጋ፥ ፆሳ ኬነ የሩሳላመ ዩሹዋ ድርሳ ግምብድ ኦንጋና ጋካናዉ እዮ ዳዊታ ካታማን ዎስ።

² ጎዳ ሱንን ፆሳ ኬይ ቡሮ ኬፀትቦና ግሾ አሳይ ሄ ዎደ ቃ ጎይኖ በሳን ያርሽሸ ጋምእስ።

³ ሶሎሞነይ ጎዳ ዶስያ ባ አዋ ዳዊቲ ዎጋን ሄመትስ። ሽን ቃ ጎይኖ በሳን ያርሽሸነ እፃነ ጩይስሸ ጋምእስ።

⁴ ካዎይ ያርሾ ያርሻናዉ ጋባኦና ብስ፤ ሄ በሳይ ሀራ ኡባፈ አድ ኮሽያ ቃ ጎይኖ በሲ። ሶሎሞነይ ሙኩሉ መሄ ኤህድ፥ ሄ ያርሾ በሳን ፁሳ ያርሾ ያርሽስ።

⁵ ጎዳይ ሶሎሞነስ ጋባኦናን ቃማ አሙሆን ቆንጭድ፥ “ታ ነዉ አይ እማና መላ ኮያይ?” ያግስ።

⁶ ሶሎሞነይ፥ “ነ አይለይ፥ ታ አዋይ ዳዊቲ ነዉ አማነትዳ፥ ፅሎነ ሱረ አስ ግድዳ ግሾ፥ ኔኒ እያ ዶሳዳሳ። ኔኒ ሀ ኬሀተን፥ ሀች እያ አራታን ኡትያ አደ ናኣ እያዉ እማዳሳ።

⁷ “አቤት ጎዳዉ፥ ታ ፆሳዉ፥ ኔኒ ታና ነ አይልያ፥ ታ አዋ ዳዊታ በሳን ካዎዳሳ። ሽን ታኒ ጉ ናአ ግድያ ግሾ፥ አሳ ዋታዳ ካለኔኮ ኤርከ።

⁸ ታኒ፥ ነ አይለይ ነ ዶርዳ አሳ ግዶንነ ታይቦይ ባይና አሳ ግዶን ደአይስ።

⁹ ሄሳ ግሾ፥ ታኒ ነ አሳ አይሳናዉ ሎኦነ ኢታ ሻካዳ ኤራና መላ ታዉ ነ አይልያስ አኬካ ዎዛና እማ። ሄስ ሀኖና እፅኮ፥ ሀ ነ ግታ አሳ ኦን ካለናዉ ዳንዳኢ?” ያግስ።

¹⁰ ሶሎሞነይ ሄሳ ኦይችዳ ግሾ፥ ጎዳይ ኡፋይትስ።

¹¹ ፆሳይ እያኮ፥ “ኔኒ ነዉ ላይ አዱቃና መላ ዎይኮ ዱረ ግዳናዉ ዎይኮ ነ ሞርከት ሀይቃና መላ ኦይቾናሽን፥ ሀ አሳ ሱረ ፕርዳን አይስያ ጭንጫተ ኦይችዳ ግሾ፥

¹² ሄኮ፥ ነ ኦይችዳይሳ ታ ነዉ እማና። ሀይሳፈ ካሰ ነ መል ባይናይሳዳ ህዛፐ ጉየ ነ ማል ደንዶናዳ ጭንጫተነ አኬካ ዎዛና ነዉ እማና።

¹³ ቃስ ነ ኦይቾናባካ ታ ነዉ እማና፤ ኔኒ ደእዳ ላይ ኡባን ሀራ ካዎይ ደሞና ዱረተነ ቦንቹዋ ታ ነዉ እማና።

¹⁴ ነ አዋይ ዳዊቲ ሄመትዳይሳዳ ታ ኦግያን ነ ሄመትኮ፥ ታ ዎጋነ ታ ኪታ ናግኮ፥ ታ ነ ላይ አዱሳና” ያግስ።

¹⁵ ሶሎሞነይ ስኮፈ ባርክድ፥ ሄኮ፥ ፆሳይ እያዉ አሙሆን ኦድዳይሳ አኬክስ። እ፥ የሩሳላመ ስሚድ፥ ጎዳ ጫቆ ታቦትያ ስንን ኤቅድ፥ ፁሳ ያርሾነ እስፈተ ያርሾ ያርሽስ። ያትድ፥ ባ ሞርናታስ ግብራ ጊግስስ።

ሶሎሞነይ ሱረ ፕርድስ

¹⁶ እስ ጋላስ ናምኡ ላይማ ማጫሳት ካዋ ሶሎሞነኮ ይድ፥ እያ ስንን ኤቅዶሶና።

¹⁷ ኤንታፈ እስንያ፥ “ታ ጎዳዉ፥ ታንነ ሀ አስያ እስ ኬን ደኦስ። ያን እያ ታራ እስፈ ደእሽን፥ ታ እስ ናአ የላስ።

¹⁸ ታ ናአይ የለትዳ ሄን ጋላስ ሀ ማጫስያካ እስ ናአ የላሱ። ሄ ኬን ኑፐ፥ ናምኣፈ ሀራ አስ ኦንካ ባዋ።

¹⁹ “እስ ቃማ እያ ባና ናኣ ቦላ ዝንእዳ ግሾ፥ ሀ ማጫሰ ናአይ ሀይቅስ።

²⁰ እያ ቃማ ደንዳዳ፥ ታኒ፥ ነ አይልያ ስክዳሽን፥ ታ ናኣ ታ ምየፐ ኤካዳ፥ ባ ክኦን ዎዳ፥ ባ ሀይቅዳ ናኣ ታ ክኦን ዎሱ።

²¹ ዎንታ ታኒ ታ ናኣ ንናዉ ደንድያ ዎደ፥ ሄኮ ሀይቅስ። ሽን ታኒ ዎንታ ፖኦን ትሽ ኦዳ ፄልያ ዎደ፥ ሄኮ፥ ታ ናኣ ግደና” ያጋሱ።

²² ሀንኮ ማጫስያ፥ “አካይ፥ ፓፃ ደኤይስ ታ ናኣ፤ ሀይቅዳይስ ነ ናኣ” ያጋሱ። ሽን ኮይሮ ማጫስያ ዛራዳ፥ “አካይ፥ ሀይቅዳይስ ነ ናኣ፤ ፓፃ ደኤይስ ታ ናኣ” ያጋሱ። ሄሳዳ ግድ ኤንቲ ካዋ ስንን ፓላምዶሶና።

²³ ካዎይ ሶሎሞነይ፥ “ሀ ማጫስያ፥ ‘ፓፃ ደእያ ናአይ ታይሳ፤ ሀይቅዳይስ ነይሳ’ ያጋዉሱ፤ ሀንክያካ፥ ‘አካይ፥ ነ ናአይ ሀይቅዳይሳ፤ ታ ናአይ ፓፃ ደኤይሳ’ ያጋዉሱ” ያግስ።

²⁴ ካዎይ፥ “ታዉ ማሻ ኤክድ ዪተ” ያግን፥ ኤንቲ እያዉ ማሻ ኤህዶሶና።

²⁵ ካዎይ፥ “ፓፃ ደእያ ናኣ ናምኡ ከስድ ቃንፅድ፤ እስ ባጋ ሀንስ እምተ፤ እስ ባጋ ህንስ እምተ” ያግስ።

²⁶ ፓፃ ደእያ ናአይ እባ ግድዳ ማጫስያ ባ ናኣስ ምሸታዳ፥ “ታ ጎዳዉ፥ ፓፃ ደእያ ናኣ እዉ እማ! እያ ዎፓ” ያጋሱ። ሽን ሀንክያ፥ “ታዉካ ነዉካ ግዶፖ፤ ናምኡ ከይድ ቃንፀቶ” ያጋሱ።

²⁷ ካዎይ፥ “ናኣ ዎፕተ፤ ሀ ፓፃ ደእያ ናኣ ሀ ኮይሮ ማጫሴስ እምተ፤ ናኣ አይያ እዮ” ያግድ ፕርድስ።

²⁸ እስራኤለ አሳ ኡባይ ካዎይ ፕርድዳ ፕርዳ ስእዳ ዎደ፥ ኤንቲ ካዋ ዳሮ ቦንችዶሶና። አሳስ ፅሎተን ፕርዳናዉ እያዉ ጭንጫተ ፆሳፈ እመትዳይሳ በእዶሶና።