1 Kawota 21 - ጌሻ ማፃፋ

ናቡተ ዎይነ ጋድያ

¹ ሳማረ ካዋ አካባ ጋ ማታን ናቡተስ እዝራኤለን ዎይነ ጋደይ ደኤስ።

² አካብ ናቡተኮ፥ “ታ ጋዋ ማታን ደእያ ግሾ፥ ታ አታክልተ ቶክያ በሲ ኦናዉ ነ ዎይነ ጋድያ ታዉ እማ። እያ ግሾ ነዉ ታ ሀራ ሎኦ ዎይነ ጋደ እማና፤ ዎይኮ ነ ዶስኮ እያ ጋትያ ታ ነዉ ቃንፃና” ያግስ።

³ ናቡተይ ዛሪድ፥ “ታኒ ታ አዋታፐ ላትዳ ጋደ ነዉ እሚስያባፐ ጎዳይ ታና አሾ” ያግስ።

⁴ እዝራኤለ አደይ ናቡተይ፥ “ታኒ ታ አዋታፐ ላትዳ ጋደ ነዉ እምከ” ግዳ ግሾ፥ አካብ ይሎትሸነ አዛንሸ ባ ሶ ብድ፥ ጎዳኮ ስም ዝንእድ፥ ካካ ሞና እፅስ።

⁵ እያ ማችያ ኤልዛቤላ እያኮ ገላዳ፥ “ነና ሀይሳዳ ይሎይዳይ አይቤ? አይስ ካ ሞና እፃይ?” ያጋዳ ኦይቻሱ።

⁶ አካብ፥ “እዝራኤለ አደይ ናቡተይ፥ ‘ነ ዎይነ ጋድያ ታዉ ባይዛ ዎይኮ ነ ዶስኮ እያ ግሾ ታ ነዉ ሀራ ዎይነ ጋደ እማና’ ያግን፥ እ፥ ‘ታ ዎይነ ጋድያ ነዉ እምከ’ ያግን፥ ታ ሄሳ ግሾ ይሎትስ” ያግስ።

⁷ ኤልዛቤላ፥ “ነ እስራኤለ ቦላ ካዎ ግዳ ኡታዳ ሀይሳዳ ሀናይ? ደንዳዳ ማ! ዎዛናፐ ኡፋይታ! እዝራኤለ አድያ ናቡተ ዎይነ ጋድያ ታኒ ነዉ እምሳና” ያጋሱ።

⁸ ሄሳ ግሾ፥ እያ አካባ ሱንን ዳብዳበ ፃፋዳ፥ እያ ቦላ ማታመ ዎሱ። ናቡተራ እስፈ ካታማን ደእያ ጭማታስነ ግታ አሳታስ ኪታሱ።

⁹ ዳብዳበ ሀይሳዳ ያጋዳ ፃፋሱ፤ “እስ ጋላስ ፆማ አዋጅተ፤ አሳ እስፈ ሺሽተ፤ ናቡተ ቦንቾ በሳን ኡትስተ።

¹⁰ ናቡተይ፥ ‘ፆሳነ ካዋ ጫይስ’ ያግድ ማርካትያ ናምኡ ማርካታ ሺሽድ፥ ማርካታናዳ ኦተ። ሄሳፈ ጉየ፥ ካታማፐ ጋፃ ከስድ፥ ሹቻን ጫድድ ዎተ” ያጋዳ ፃፋሱ።

¹¹ ሄሳ ግሾ፥ ናቡተራ እስፈ ካታማን ደእያ ጭማትነ ግታ አሳት ኤልዛቤላ ኤንታዉ ፃፍዳ ዳብዳብያን ግዳይሳዳ ኦዶሶና።

¹² ኤንቲ ፆማ አዋጅድ፥ ናቡተ አሳ ግዶን ቦንቾ በሳን ኡትስዶሶና።

¹³ ናምኡ ዎርዶ ማርካት ይድ፥ እያኮ ስም ኡትድ፥ አሳ ስንን፥ “ናቡተይ ፆሳነ ካዋ ጫይስ” ያግድ ዎርዶ ማርካትዶሶና። ናቡተ ካታማፐ ጋፃ ከስድ፥ ሹቻን ጫድድ ዎዶሶና።

¹⁴ ጭማት ኤልዛቤልኮ፥ “ናቡተይ ሹቻን ጫደትድ ሀይቅስ” ያግድ ኪትዶሶና።

¹⁵ ናቡተይ ሹቻን ጫደትድ ሀይቅዳይሳ ኤልዛቤላ ስእዳ ዎደ፥ “እዝራኤለ አድያ ናቡተይ ነዉ ሚሸን ባይዛናዉ እፅዳ ዎይነ ጋድያ ባዳ ኤካ። እ ሀእ ሀይቅስ” ያጋሱ።

¹⁶ እዝራኤለ አደይ ናቡተይ ሀይቅዳይሳ አካብ ስእድ፥ ናቡተ ዎይነ ጋድያ ባዉ ኤካናዉ ደንድድ ብስ።

¹⁷ ሄሳፈ ጉየ፥ ተስባ አድያ ኤልያሳኮ ጎዳ ቃላይ ይድ፥

¹⁸ “ሳማረን ካዎትዳ እስራኤለ ካዋ አካባራ ጋሄታናዉ ባ። ሄኮ፥ እ ናቡተ ዎይነ ጋድያ ኤካናዉ ብድ፥ ያን ደኤስ።

¹⁹ ጎዳይ ሀይሳዳ ያጌስ ጋዳ እያዉ ኦዳ፤ ‘አድያ ዎዳ እያ ጋድያ ነዉ ኤካዳሳ ግድኪ?’ ያጋ። ቃስ ጎዳይ፥ ‘ናቡተ ሱ ካናት ላጭዳ በሳን ነ ሱካ ካናት ላጫና’ ” ያግስ።

²⁰ አካብ ኤልያሳ በእዳ ዎደ፥ “ታ ሞርክያዉ፥ ታና ደማዲ?” ያግስ። ኤልያስ፥ “ኤ፥ ነና ደማስ። ኔኒ ጎዳ ስንን ኢታባ ኦናዉ ነና ናጋራስ ባይዛዳሳ።

²¹ ጎዳይ ኔኮ ሀይሳዳ ያጌስ፤ ‘ሄኮ፥ ታኒ ነ ቦላ ኢታባ ኤሀና። ታኒ ነ ኮቻታ ይሳና፤ ታኒ እስራኤለ ቢታን አካባ ሶ አሳፐ አይለ ግድን ዎማኖ ግድን፥ እስ አደይ አቶና ይሳና።

²² ኔኒ እስራኤለ አሳ ናጋራ ኦስሳዳ ታና ሀንቀዳ ግሾ፥ ታ ነ ሶ አሳ ናባፃ ናኣ እዮርባማ ሶ አሳዳነ አክያ ናኣ ባኦሳ ሶ አሳዳ ኦና።’

²³ ቃስ ጎዳይ ኤልዛቤልባ ኦድሸ፥ ‘እዝራኤለ ካታማ ግምበ ድርሳ ላንቀን ካናት ኤልዛቤሎ ማና’ ያጌስ።

²⁴ አካባ ኮቸ ግድድ ካታማን ሀይቅያ ኦናካ ካን ማና፤ ጋፃርያን ሀይቅያ ኦናካ ሳሎ ካፎት ማና” ያግስ።

²⁵ ባ ማችያ ኤልዛቤላ ደንን፥ ጎዳ ስንን ኢታባ ኦናዉ ባና ናጋራስ ባይዝዳ አካባ መላ አስ ባዋ።

²⁶ አካብ፥ ጎዳይ እስራኤለ አሳ ስንፈ ጎድድ ከስዳ አሞረታ ኤቃ ጎይንድ ዳሮ እፀትዳባ ሀንስ።

²⁷ አካብ ሄሳ ስእዳ ዎደ ባ ማኡዋ ዳክድ፥ ካዮ ማኦ ማእድ ፆምስ። ካዮ ማኦ ማእድ ስኬስ፤ አዛንሸ ሄመቴስ።

²⁸ ሄሳፈ ጉየ ጎዳ ቃላይ ተስባ አድያ ኤልያሳኮ ይድ፥

²⁹ “አካብ ባና ታ ስንን ዋትድ ካዉሽዳኮ በአዲ? እ ታ ስንን ባና ካዉሽዳ ግሾ፥ ታኒ ዩዋ እያ ዎደ ኤህከ። ሽን ታኒ እያ ናኣ ዎደን እያ ሶ አሳ ቦላ ሀ ዩዋ ኤሀና” ያግስ።