1 Kawota 16 - ጌሻ ማፃፋ

¹ ሀናና ናኣ ግድዳ፥ እዩ ባጋራ ጎዳ ቃላይ ባኦሳባ ሀይሳዳ ያግስ፤

² “ታኒ ነና ባናፐ ደንዳ ታ አሳ እስራኤለ ቦላ ሀላቃ ኦስ፤ ሽን ኔኒ እዮርባማ ኦግያን ሄመታዳሳ። ቃስ ታ አሳ እስራኤለ ናጋራ ኦስሳዳ ኤንታ ናጋራን ታና ሀንቀዳሳ።

³ ሄኮ፥ ታኒ ባኦሳነ እያ ሶ አሳ ፕታና ሀናይስ። ባኦሳ፥ ታኒ ነ ሶ አሳ ናባፃ ናኣ እዮርባማ ሶ አሳዳ ኦና።

⁴ ባኦሳ ኮቸ ግድድ ካታማን ሀይቅያ ኦናካ ካን ማና፤ ቃስ ጋፃረን ሀይቅያ ኦናካ ሳሎ ካፎት ማና” ያግስ።

⁵ ባኦስ ሀንዳ ሀራባይ፥ እ ኦዳባይነ እያ ምኖተይ እስራኤለ ካዎታ ታርከ ማፃፋን ፃፈትስ።

⁶ ባኦስ ሀይቅድ ባ ማይዛታን ጋሄትድ፥ ትርሳ ካታማን ሞገትስ። እያ ናአይ ኤል እያ በሳን ካዎትስ።

⁷ ጉጅድካ፥ ጎዳይ፥ ናብያ እዩ ባጋራ ባኦሳ ቦላነ እያ ሶ አሳ ቦላ ትንብተ ኦድዳ ጋሶይ፥ ባኦስ ኦዳ ናጋራ ግሾነ እዮርባምነ እያ ሶ አሳይ ኦዳይሳዳ ኢታባ ኦድ፥ ጎዳ ሀንቀዳ ግሾሳ። ቃስ እ እዮርባማ ሶ አሳ ኡባ ዎድ ዉርስዳ ግሾሳ።

እስራኤለ ካዋ ኤላ

⁸ ይሁዳ ካዎይ አስ ካዎትዳ ላታማነ ኡሱፑን ላይን፥ ባኦሳ ናአይ ኤል እስራኤለን ካዎትስ። ትርሳ ካታማን ኡትድ ናምኡ ላይ ካዎትስ።

⁹ ካዋ ቶራ ሞጮናታፐ እሱዋ ግድድ፥ እያ ፓራ ጋረታፐ ባጋ ኪትያ ዝምር ካዋ ቦላ ማቀትስ። ካዎይ ኤል ሄ ዎደ ትርሳን ደእያ ካዎ ጋ አዋተን አይስያ አርፃ ሶን ማትድ ኡትስ።

¹⁰ ይሁዳ ካዎይ አስ ካዎትዳ ላታማነ ላፑን ላይን ዝምር፥ አርፃ ሶ ገልድ ካዋ ዎድ እያ በሳን ባዉ ካዎትስ።

¹¹ ዝምራ ካዎትዳ መላ ባኦሳ ሶ አሳ ኡባ ዎስ። ባኦስ ዳቦ ግድን ላገ ግድን እስ አደካ ፓፃ አሽቤና።

¹² ናብያ እዩ ባጋራ ጎዳይ ባኦሳ ቦላ ኦድዳ ቃላዳ ዝምር ባኦሳ ሶ አሳ ኡባ ዎድ ይስስ።

¹³ ሄስ ሀንዳይ ባኦስነ እያ ናአይ ኤል ባንታ ኤቃ ጎይንድ ኦዳ ናጋራ ጋሶንነ እስራኤለ አሳ ኦስስዳ ናጋራ ጋሶን፥ ጎዳ እስራኤለ ፆሳ ሀንቀዳ ግሾሳ።

¹⁴ ኤል ሀንዳ ሀራባይነ እ ኦዳባይ እስራኤለ ካዎታ ታርከ ማፃፋን ፃፈትስ።

እስራኤለ ካዋ ዝምራ

¹⁵ ይሁዳ ካዎይ አስ ካዎትዳ ላታማነ ላፑን ላይን ዝምር ትርሳን ላፑን ጋላሳ ፃላላ ካዎትስ። ሄ ዎደ እስራኤለ ኦላንቾት ግባቶና ጌተትያ ፍልስፄመ ካታማ ዩሹዋ ተቅዶሶና።

¹⁶ እስራኤለ አሳይ ዝምሪ ካዋ ቦላ ማቀትድ እያ ዎዳይሳ ስእዳ ዎደ ቶራ ሞጮና ኦምራ ሄ ጋላስ ሄ በሳን እስራኤለ ካዎ ኦድ ካዎዶሶና።

¹⁷ ኦምርነ እስራኤለ አሳይ ግባቶናፐ ከይድ ትርሳ ካታማ ተቅዶሶና።

¹⁸ ካታማይ ኦይከትዳይሳ በእዳ ዎደ ዝምር ካዎ ጋ ግዶን ደእያ ግምብያ ገልድ ካዎ ጋ ታማን ኦይስ፤ እካ ሀይቅስ።

¹⁹ ሄስ ሀንዳይ እዮርባም ኦዳ ናጋራነ እስራኤለ አሳ ኦስስዳ ናጋራ ካልድ ዝምር ጎዳ ስንን ኢታባ ኦዳ ግሾሳ።

²⁰ ዝምር ሀንዳ ሀራባይነ እ ማቅዳ ማቆይ እስራኤለ ካዎታ ታርከ ማፃፋን ፃፈትስ።

እስራኤለ ካዋ ኦምራ

²¹ ሄ ዎደ እስራኤለ አሳይ ናምኡ ከይድ ሻከትስ። አሳፐ ባጋይ ግናታ ናኣ ትብና ካዎናዉ ኮይን፥ ባጋይ ቃስ ኦምራ ካዎናዉ ኮይስ።

²² ሽን ኦምራ ማድያ አሳይ ግናታ ናኣ ትብና ማድያ አሳፐ ምንዳ ግሾ ትብን ሀይቅን ኦምር ካዎትስ።

²³ ይሁዳ ካዎይ አስ ካዎትዳ ሀስታማነ እስን ላይን፥ ኦምር እስራኤለ ቦላ ካዎትድ ታማነ ናምኡ ላይ ሃርስ፤ እያፐ ኡሱፑን ላይ ትርሳን ሃርስ።

²⁴ ኦምር ሳማርያ ዙማ ሳምራ ጌተትያ አድያፈ 6,000 ብራ ሳንትመን ሻምድ፥ ያን ካታማ ኬፅስ። ሄ ካታማ ሄ ዙማ ጎዳ ሱንን ሳማረ ግድ ሱንስ።

²⁵ ሽን ኦምር ጎዳ ስንን ኢታባ ኦስ፤ እ ካሰ ደእዳ ካዎታ ኡባፈ አድ ናጋራ ኦስ።

²⁶ ኦምር ናባፃ ናአይ እዮርባም ኦዳ ናጋራነ እስራኤለ አሳ ኦስስዳ ናጋራ ካልስ፤ ሄ ፓና ኤቃ ጋሶን ጎዳ፥ እስራኤለ ፆሳ ሀንቀስ።

²⁷ ኦምር ሀንዳ ሀራባይ፥ እ ኦዳባይነ እያ ምኖተይ እስራኤለ ካዎታ ታርከ ማፃፋን ፃፈትስ።

²⁸ ኦምር ሀይቅድ ባ ማይዛታን ጋሄትድ፥ ሳማረን ሞገትስ። እያ ናአይ አካብ እያ በሳን ካዎትስ።

እስራኤለ ካዋ አካባ

²⁹ ይሁዳ ካዎይ አስ ካዎትዳ ሀስታማነ ሆስፑን ላይን፥ ኦምራ ናአይ አካብ እስራኤለን ካዎትስ። ኦምራ ናአይ አካብ ሳማረን እስራኤለ ቦላ ላታማነ ናምኡ ላይ ካዎትስ።

³⁰ ኦምራ ናአይ አካብ ባፐ ስን ካዎትዳ ካዎታ ኡባፈ አያ ኢታባ ጎዳ ስንን ኦስ።

³¹ ናባፃ ናአይ እዮርባም ኦዳ ናጋራ ላፋባ ግድ ቆፎ ፃላላ ግዶናሽን፥ ስዶና ካዋ ኤትባላ ናእዉ ኤልዛቤሎ ባዉ ማቾ ኤክድ፥ ባኣለ ኤቃስ ኦሶነ ጎይኖ ዶምስ።

³² ሳማረን እ ኬፅስዳ ባኣለ ኤቃ ኬን ያርሾ በሲ ኬፅስ።

³³ ቃስ አካብ አሼራ ጌተትያ ፆሰ ምስልያ ኤስድ፥ ባፐ ስን ደእዳ ካዎታ ኡባፈ አድ ጎዳ እስራኤለ ፆሳ ሀንቀያ ናጋራ ኦስ።

³⁴ አካባ ካዎተ ዎደ ቤተለፐ ይዳ፥ ህኤላ አደይ እያርኮ ዛሪድ ኬፅስ። ናወ ናኣ እያሱ ባጋራ ጎዳይ ኦድዳይሳዳ፥ ህኤል እያርኮ ኬፃናዉ ባስያ ዎደ አቤሮ ጌተትያ ባይራ ናአይ ሀይቅስ። ቃስ ሳንቃ አያ ዎደ ሳጉባ ጌተትያ ካሎ ናአይ ሀይቅስ።