1 Kawota 12 - ጌሻ ማፃፋ

ታሙ እስራኤለ ኮቻታ ሻከተ

¹ እስራኤለ አሳ ኡባይ ሮብኣማ ካዎያናዉ ሴከማ ብዳ ግሾ እካ ያ ብስ።

² ካዋ ሶሎሞነፐ ባቃትድ፥ ግብፀን ደእያ ናባፃ ናአይ እዮርባም ሄሳ ስእዳ ዎደ ግብፀፈ ስሚድ ይስ።

³ እስራኤለ አሳይ እዮርባማ ኪትድ ፄግስን፥ እነ እስራኤለ ማባራ ኡባይ ሮብኣማኮ ብድ፥

⁴ “ነ አዋይ ኑና ዴፆ ቃምባራ ቶስስ፤ ሽን ሀእ እ ኑና ኦስስያ ዎልቃማ ኦሱዋነ ዴፆ ቃምባራ ኑስ ካዉሻርክ። ያትኮ፥ ኑኒ ነዉ ሃረታና” ያግዶሶና።

⁵ ሮብኣም ኤንታኮ፥ “ብድ ሄን ጋላስ ስሚድ ታኮ ዪተ” ያግን አሳይ ብዶሶና።

⁶ ሄሳፈ ጉየ፥ ካዎይ ሮብኣም፥ እያ አዋይ ሶሎሞነይ ደኦን ደእያ ዎደ፥ ሶሎሞነ ዞርያ ጭማታ፥ “ሀ አሳስ ዎይጋዳ ዛራ ጌቲ?” ያግድ ዞረ ኦይችስ።

⁷ ጭማት ዛሪድ፥ “ሀች ኔኒ ሀ አሳስ አይለ ግዳዳ ኦኮነ ኤንታ ኦይሻስ ሎኦ ቃላ ዛርኮ፥ ኡባ ዎደ ኤንቲ ነዉ አይለ ግዳና” ያግዶሶና።

⁸ ሽን ሮብኣም ጭማት ዞርዳ ዞርያ አግድ፥ እያራ ድጭድ እያዉ ኦያ ናአተታ ዞረ ኦይችስ።

⁹ እ ኤንታኮ፥ “ህንተ ታና አይ ዞረቲ? ‘ነ አዋይ ኑና ቶስዳ ዴፆ ቃምባራ ኑስ ካዉሻርክ’ ግያ ሀ አሳስ ዎይጋዳ ዛሮ?” ያግድ ኦይችስ።

¹⁰ ናአተት ዛሪድ፥ “ ‘ነ አዋይ ኑና ዴፆ ቃምባራ ቶስስ፤ ሽን ኔኒ ኑስ ካዉሻርክ’ ግያ አሳስ፥ ‘ታ ጉ ብራይ ታ አዋ ፄሳፈ ኦርዴስ።

¹¹ ታ አዋይ ህንተዉ ቃምባራ ዴፀስ፤ ሽን ታኒ እያፐ አዳ ዴፀና። ታ አዋይ ህንተና ልሶን ጋራፍስ፤ ሽን ታኒ ህንተና ኮርነዳ ዱክያ ልሶን ጋራፋና’ ያጋዳ ዛራ” ያግዶሶና።

¹² ካዎይ፥ “ሄን ጋላስ ስሚድ ታኮ ዪተ” ግዳይሳዳ እዮርባምነ አሳ ኡባይ ሄን ጋላስ ሮብኣማኮ ስሚድ ይዶሶና።

¹³ ካዎይ ጭማታ ዞርያ አግድ ኤንታዉ ሀንቆን ዛርስ።

¹⁴ ናአተት ዞርዳ ዞርያ ካልስ። እ ኤንታኮ፥ “ታ አዋይ ህንተ ቃምባራ ዴፀስ፤ ሽን ታኒ እያፐ አዳ ዴፀና። ታ አዋይ ህንተና ልሶን ጋራፍስ፤ ሽን ታኒ ህንተና ኮርነዳ ዱክያ ልሶን ጋራፋና” ያግድ ዛርስ።

¹⁵ ጎዳይ ሴሎፐ ይዳ አክያ ባጋራ ካሰ ናባፃ ናኣ እዮርባማስ ኦድዳ ቃላይ ፖለታና መላ ሄስ ጎዳፐ ሀንዳ ግሾ ካዎይ አሳይ ግያባ ስኦና እፅስ።

¹⁶ እስራኤለ አሳ ኡባይ ካዎይ ኤንቲ ገይሳ ስኦና እፅዳይሳ በእድ ሀይሳዳ ያግዶሶና፤ “ዳዊታፐ ኑና ጋክያ ግሾይ አይቤ? እሰየ ናኣፐ ኑኒ ላትያባይ አይቤ? እስራኤለ አሳዉ፥ ህንተ ሶ ህንተ ሶ ስምተ። ዳዊታ፥ ነ ኬ ናጋ” ያግድ፥ እስራኤለ አሳ ኡባይ ባንታ ሶ ባንታ ሶ ስምዶሶና።

¹⁷ ሽን ሮብኣም ይሁዳን ደእያ እስራኤለ አሳ ቦላ ካዎትስ።

¹⁸ ካዎይ ሮብኣም ማዳ ኦይሳታ ሀላቃ አዶንራማ እስራኤለ አሳኮ ኪትን፥ ኤንቲ ሹቻን ጫድድ ዎዶሶና። ያትን፥ ካዎይ ሮብኣም ባ ፓራ ጋርያን ገልድ የሩሳላመ ባቃትስ።

¹⁹ ሄ ዎደፐ ዶምድ ሀች ጋካናዉ ታሙ እስራኤለ ኮቻት ዳዊታ ኮቻፈ ካዎትዳ ካዎታ ቦላ ማካልዶሶና።

²⁰ እዮርባም ግብፀፈ ስምዳይሳ እስራኤለ አሳ ኡባይ ስእዳ ዎደ እያ ባንታ ማባራኮ ፄግድ እስራኤለ ቦላ ካዎዶሶና። ዳዊታ ኮቻፈ ካዎትዳ ካዎታስ አማነትዳይ ይሁዳ ኮቻ ፃላላ።

²¹ ሶሎሞነ ናአይ ሮብኣም የሩሳላመ ጋክዳ ዎደ፥ እስራኤለ አሳራ ኦለትድ፥ ካዎተ ባዉ ዛራና መላ ሮብኣም ይሁዳፐነ ብንያመፐ ዶረትዳ 180,000 ኦላንቾታ ሺሽስ።

²² ሽን ፆሳ ቃላይ ፆሳ አስ ግድዳ ሳማየኮ ሀይሳዳ ያግድ ይስ።

²³ “ሶሎሞነ ናኣ፥ ይሁዳ ካዋ ሮብኣማስ፥ ይሁዳስ፥ ብንያመስነ አትዳ አሳ ኡባስ ሀይሳዳ ያጋ፤

²⁴ ጎዳይ ህንተኮ፥ ‘ህንተ ዳቦታራ፥ እስራኤለታራ ኦለታናዉ ቦፕተ። ሀይሳ ታኒ ኦዳ ግሾ ህንተ ኡባይ ህንተ ሶ ህንተ ሶ ስምተ’ ያጋዳ ኦዳ” ያግስ። ኤንቲ ጎዳ ቃላ ስእድ ሶ ብዶሶና።

ዎርቃ ማራታ

²⁵ ሄሳፈ ጉየ እዮርባም ደረይ ዳርያ ኤፍሬማ ቢታን ደእያ ሴከማ ሚፃ ኦ ግምብድ፥ ያን ደእስ፤ ያፐ ከይድ ብድ ጵንኤላ ግምብስ።

²⁶ እዮርባም ባ ዎዛናን፥ “ካዎተይ ዳዊታ ኮቻስ ስማና።

²⁷ ሀ አሳይ ፆሳ ኬን ያርሾ ያርሻናዉ የሩሳላመ ብያባ ግድኮ፥ ኤንቲ ባንታ ጎዳኮ፥ ካዋ ሮብኣማኮ ስማና። ኤንቲ ታና ዎድ፥ ይሁዳ ካዋ ሮብኣማኮ ስማና” ያግድ ቆፕስ።

²⁸ ካዎይ ዞረትዳፐ ጉየ ዎርቃፈ ናምኡ ማራ ምስለታ መድ፥ አሳኮ፥ “ህንተ ህዛፐ የሩሳላመ ቡሳይ ግዳና። ህንተኖ እስራኤለ አሳዉ፥ ሄኮ፥ ህንተና ግብፀፈ ከስዳ ህንተ ፆሳት ሀይሳታ!” ያግስ።

²⁹ ኤንታፈ እሱዋ ቤተለን፥ እሱዋ ዳነን ዎስ።

³⁰ ሀ ሀኖታይ ኤንታዉ ናጋራ ግድስ፤ አሳይ ሄ ማራ ምስልያ ጎይናናዉ ዳነ ጋካናዉ ብዶሶና።

³¹ እዮርባም ደረ ሁጰን ቃ ጎይኖ በሳታ ጊግስድ ሌወ ኮቸ ግዶና እፅኮካ ኦናካ ካህነ ኦድ ሹምስ።

³² ይሁዳን ቦንቸይሳዳ ሆስፑን አጌናን ታማነ እቻሻን ጋላሳን ባኣለ ቦንቻናዳ እዮርባም ቃማ ቃችድ ያርሾ ያርሽስ። እ ሀይሳዳ ሀንድ ቤተለ ብድ፥ ባ መዳ ማራ ምስልያስ ያርሾ ያርሽስ። ባ መዳ ቃ ጎይኖ በሳታን ካህነታ ቤተለን ሹምስ።

³³ እ ባ ሁጰን ዶርዳ ሆስፑን አጌናን፥ ታማነ እቻሻን ጋላስ ቤተለ ብድ ሄ ጋላሳይ እስራኤለ አሳስ ባኣለ ግዳና መላ አዋጅስ። እፃነ ጩይሳናዉ ያርሾ በሳ ከይስ።