1 Kawota 10 - ጌሻ ማፃፋ

ሳባ ካውዉ

¹ ሳባ ካውያ ጎዳይ ሶሎሞነስ ቆንጭስዳ ማላልስያ ጭንጫተ ዎርያ ስአዳ፥ ዴፆ ኦይሻታ ኤካዳ እያ ፓጫናዉ ባሱ።

² ሳዉዋ፥ ዳሮ ዎርቃነ አልኦ ሹቹ ጫንዳ ዳሮ ግማለ ጩጋራ ዳሮ አጃባን የሩሳላመ ጋካዳ ሶሎሞነ ስን ሺቃሱ። ባ ዎዛናን ደእያ ኡባ ሶሎሞነ ኦይቻሱ።

³ ሶሎሞነይ እያ ኦይችዳባ ኡባ ዛርስ፤ እዉ ብርሾናሽን፥ እያፐ ጌምድ አትዳባይ አይብካ ባዋ።

⁴ ሳባ ካውያ ሶሎሞነ ጭንጫተ፥ እ ኬፅዳ ካዎ ጋዋ፥

⁵ እያ ጋይታን ሺቅያ ካ፥ እያ ሞርናት ኡትያ ኡተ፥ እያ አይለት ኦያ ኦሱዋ፥ ኤንቲ ማእያ ማኡዋ፥ ኤስ ዱቀይሳታነ ፆሳ ኬን ሺሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።

⁶ እያ፥ ካዋ ሶሎሞነኮ፥ “ነባነ ነ ጭንጫባ ታኒ ታ ቢታን ደአሸ ስእዳይስ ቱማ።

⁷ ሽን ታኒ ያዳ፥ ታ አይፈን በአና ጋካናዉ ኤንቲ ታዉ ኦድዳባ አማናብከ። ሄኮ፥ አሳይ ታዉ ኦድዳይስ ባጋ ጋከና፤ ነ ጭንጫተይነ ነ ዱረተይ ታኒ ስእዳይሳፈ ዳሮ አስ።

⁸ ኡባ ዎደ ነ ስንን ኤቅድ፥ ነ ጭንጫተ ስእያ ነ አሳትነ ነ ሞርናት አይ መላ ቃዳራ ደእያ አሰ!

⁹ ነናን ኡፋይትድ፥ ነና እስራኤለ ካዎተ አራታን ኡትስዳ ጎዳይ ነ ፆሳይ ጋላተቶ! ጎዳይ እስራኤለ አሳ መርናዉ ሲቅዳ ግሾ ኔኒ ሱረ ፕርዳነ ፅሎተ ኦና መላ እ ነና ካዎስ” ያጋሱ።

¹⁰ ሳባ ካውያ 4,000 ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ። ሳባ ካውያ ካዋ ሶሎሞነስ እምዳይሳ መላ ዳሮ ሳዎ ሄሳፈ ስምን ኦንካ ኤህቤና።

¹¹ (ካዋ ክራማ ማርካበት፥ ኦፍራፐ ዎርቃ ኤህዳይሳት ያፐ ዳሮ ሳንዳለ ምነ አልኦ ሹቹ ኤህዶሶና።

¹² ካዎይ ሶሎሞነይ ሄ ሳንዳለፐ ፆሳ ኬነ ካዎ ጋ ቱቀታ፥ ዛማረታስ ዲነ ማስንቆ ኦስስስ። ሄሳ መላ ሳንዳለይ ሄ ዎደፐ ስምን ይድ ኤረና፤ በንት ኤረና።)

¹³ ካዎይ ሶሎሞነይ እማናዉ በሲያ እሞታታፐ ሀራ፥ ሳባ ካውያ አሞታዳ እያ ኦይችዳባ ኡባ እዉ እሚስ። ሄሳፈ ጉየ፥ ሳባ ካውያ ባ አጃባራ ደንዳዳ ባ ቢታ ስማሱ።

ሶሎሞነ ቦንቹዋ

¹⁴ ሶሎሞነይ ላይን ላይን ኤክያ ዎርቃይ 23,000 ክሎ ግራመ።

¹⁵ ሄስ ዛልአንቾታፐ ኤክያ ቃራፃ፥ አራበ ካዎታፐነ እስራኤለ ቢታን ሃረይሳታፐ ኤክያ ጊራ ጉጀና።

¹⁶ ሶሎሞነይ ናምኡ ፄቱ ግታ ጎንዳለታ ዎርቃፈ ቆፅድ ኦስስስ። እስ እስ ጎንዳልያን ኡሱፑን ክሎ ግራመ ግድያ ዎርቀይ ገልስ።

¹⁷ ቃስ ሄ ፄቱ ጉ ጎንዳለታ ዎርቃፈ ቆፅድ ኦስስስ። እስ እስ ጉ ጎንዳልያን ናምኡ ክሎ ግራመ ግድያ ዎርቀይ ገልስ። ካዎይ ሄ ጎንዳለታ “ልባኖሰ ዎራ” ጌተትያ ባ ካዎ ጋን ዎስ።

¹⁸ ቃስ ካዎይ እስ ግታ አራታ ዳንጋርሳ ዛለፐ ኦስስድ ጌሻ ዎርቃን ላንፅስስ።

¹⁹ አራታይ ደእያ በሳ ፑደ ከያናዉ የያ ኡሱፑን ደት ደኦሶና። ሄ አራታስ ጉየ ባጋራ ሁጵያ ቦላ ገርቶይ ደኤስ። አራታስ ናምኡ ባጋራ ቀሰ ዘምፕስያ በሳት ደኦሶና፤ ሄ ናምኡ በሳታ ምየን ኤቅዳ እስ እስ ጋሞ ምስለይ ደኤስ።

²⁰ ሄ አራታ ቦላ ከይያ ኡሱፑን ደታስ ያ ባጋራነ ሀ ባጋራ እስ እስ ጋሞ ምስለይ፥ ኩመ ታማነ ናምኡ ምስለት ደኦሶና። ሄሳ መላ አራት ሀራ ካዎተን አዉንካ ኦሰትቤና።

²¹ ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብራስ ጎእ ባይና ግሾ ብራፐ ኦሰትዳባይ ባዋ።

²² ካዋ ክራማ ማርካበታራ ዛልእያ ግታ ማርካበት አባን ደኦሶና። ሄ ማርካበት ዎርቃ፥ ብራ፥ ዳንጋርሳ ዛለ፥ ገለሾ፥ ቃረነ አያና ካፎ ጫንድ ሄ ላይፈ እስ ቶሆ ስሞሶና።

²³ ካዎይ ሶሎሞነይ ዱረተንነ ጭንጫተን ሳአን ደእያ ካዎታ ኡባፈ አስ።

²⁴ ሳአን ደእያ አስ ኡባይ እያኮ ያናዉነ ፆሳይ እያ ዎዛናን ዎዳ ጭንጫተ ስአናዉ ኮዬስ።

²⁵ ላይን ላይን ያ ኡባይ እያዉ ዎርቃ፥ ብራ፥ ማኦ፥ ኦላ ሚሸ፥ ሳዎ፥ ፓራነ ባቁሎ እሞታ ኤክድ ዮሶና።

²⁶ ሶሎሞነይ ፓራ ጋረታነ ፓራታ ሺሽስ፤ እያዉ 1,400 ፓራ ጋረትነ 12,000 ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎስ።

²⁷ ካዎይ የሩሳላመን ብር ሹቻዳ፥ ዝግ ዙማ ፃጶን ድጭያ ቦባዳ ዳራናዳ ኦስ።

²⁸ ሶሎሞነ ፓራት ግብፀፈነ ቃወ ቢታፈ ዮሶና። ካዋ ዛልአንቾት ኤንታ ቃወፐ ሻምድ ኤሆሶና።

²⁹ ኤንቲ እስ እስ ፓራ ጋረ ኡሱፑን ፄቱ ብራ ሳንትመን፥ እስ እስ ፓራ ፄታነ እሻታሙ ብራ ሳንትመን ግብፀፈ ሻምድ ኤሆሶና። ኤንቲ ህተታ ካዎታስነ ሶረ ካዎታስ ባይዞሶና።