1 ፅሞትዮሳ 5 - ጌሻ ማፃፋ

አምኤታባ እመትዳ ዞረ

¹ ጭማ አደታ ነ አዋዳ ቦንቻፈ አትሽን፥ ሀንቀቶፋ። ያላጋ አደታ ነ እሻዳ ኦዳ ፄላ።

² ጭማ ማጫሳታ ነ አይዳ፥ ያላጋ ማጫሳታ ነ ምችዳ፥ ፖሎ ጌሻተን ኦይካ።

³ አዝን ሀይቅዳ ቱማ አምኤታ ቦንቻ።

⁴ ሽን አምኤስ ናይት ዎይኮ ናይታ ናይት ደእኮ፥ ሄ ናይት ቱማ አያና ደኦን ደኤይሳ በሳናዉ ባንታና የልዳይሳታነ፥ ባንታ ዎጋ አይዉነ ዎጋ አዋ ማድድ ኩሸ ዛሮ ታማሮ። ሄስ ፆሳ ኡፋይስያባ።

⁵ ባርካ ደእያ ቱማ አምእያ ፆሳፈ ማደ ደማናዉ ኡፋይሳን ናጋሱ። ጋላስነ ቃማ ፆሳይ ባና ማዳና መላ ዎሳዉሱነ ኦይቻዉሱ።

⁶ ሽን ሀ አላምያን ሎኦ ዱሳ ፃላላ ኮይያ አምእያ ፓፃ ደአሸ ሀይቅዳሮ።

⁷ ኦንካ ኤንታ ቦሮና መላ ሀ ኪታ ኤንታዉ እማ።

⁸ ሽን ባ ዳቦታስ፥ ኡባፈ አድ ባ ሶ አሳስ ቆፖና ኦንካ ባ አማኑዋ ካድዳይሳ፤ አማኖና አሳፐካ አዳ ኢታ።

⁹ ላይ ኡሱፑን ታሙ ኩምቦና አምኤ ሱን ማዝጋበን ፃፎፓ። ቃስ ሄሳ ቦላ እያ ባ አዝናስ አማነትዳሮ ግዳናዉ ኮሼስ።

¹⁰ ናይታ ድሾን፥ እማ ሞኮን፥ ጌሻታ ቶሁዋ ሜቻን፥ መቶትያ አሳ ማደን፥ ሎኦ ኦሶ ኡባስ ባና አ እምዳሮነ ሎኦ ኦሶን ኤረትዳሮ ግዳናዉ በሴስ።

¹¹ ሽን ያላጋ አምኤታ ሱን ማዝጋበን ፃፎፓ። ኤንታና አዝና ገሎ ገሎ ግያ አሾ አሞይ ኦይክያ ዎደ ክርስቶሳ አጋና።

¹² ኤንቲ ኮይሮ ገልዳ ቃላ መንዳ ግሾ ፕርደታና።

¹³ ሄሳ ቦላ ኤንቲ ኦሶ ይድ ኬፈ ኬ ዩያና። ዩሻ ፃላላ ግዶናሽን፥ ዝግርሳንነ ባንታና ጋናባን ገልድ በሶናባ ኦደቶሶና።

¹⁴ ሄሳ ግሾ፥ ኑ ሞርከት ኑ ቦላ ኦደትያ ኢታባ ደሞና መላ ያላጋ አምኤት አዝና ገልድ፥ ናአ የልድ፥ ባንታ ኬ አይሳና መላ ዞራይስ።

¹⁵ ሀይሳፈ ካሰ ጉ አምኤት ፃላሄ ካላናዉ ጉየ ስምዶሶና።

¹⁶ እስ አማንያ ማጫሴስ ሶ አሳ ግዶን አምኤት ደእኮ፥ እያ ኤንታ ማዳናዉ በሴስ። ሄሳዳ ኦኮ፥ ዎሳ ኬስ ቶሆይ ካዉዬስ። ሄ ዎደ ዎሳ ኬይ ማደ በሲያ ቱማ አምኤታ ማዳናዉ ዳንዳኤስ።

¹⁷ ዎሳ ኬ ሎይ ሄምያ ጭማት፥ ኡባፈ አድ፥ ቃላ ሳባኮንነ ታማርሶን ዳቡረይሳት ዳኮ ቦንቾ ኤካናዉ በሴስ።

¹⁸ ጌሻ ማፃፋይ፥ “ዉዱማን ካ የያ ቦራ ዶና ቃቾፋ” ሄሳዳካ፥ “ኦሳንቾይ ባ ዳሞዝያ ኤካናዉ በሴስ” ያጌስ።

¹⁹ ናምኡ ዎይኮ ሄ ማርክ ባይና፥ ዎሳ ኬ ጭማ ሞትያባ ስኦፓ።

²⁰ ሀራት ያያና መላ ናጋራ ኦያ ኦናካ አሳ ኡባ ስንን ሀንቀታ።

²¹ ኔኒ አሳ ሶምኦ በኦና፥ እሱዋ እሱዋፈ ዱማዮና ሀ ኪታ ናጋና መላ ፆሳ፥ ጎዳ የሱስ ክርስቶሳነ ዶረትዳ ኪታንቾታ ስንን ታ ነና ዞራይስ።

²² ኦደ ቦላካ ነ ኩሽያ ዎዳ ሹማናዉ ኤለሶፓ። ሀራታ ናጋራን ገሎፓ፤ ነና ጌሻተን ናጋ።

²³ ኔኒ ኡባ ዎደ ሀርገትያ ግሾነ ነ ኡሎ ሀርግያ ግሾ ሃ ፃላላ ኡዮፓ፤ ጉ ዎይነ ኡያ።

²⁴ እስ እስ አሳታ ናጋራይ ቆንጨ፤ ኤንታ ናጋራይ ኤንታ ፕርዳናዉ ኤንታፈ ስን አስ፥ ሽን ሀራታ ናጋራይ ጉየፐ ጋምእድ ቆንጬስ።

²⁵ ሄሳዳ፥ ሎኦ ኦሶይካ ቆንጨ፤ ቆንጮና እፅኮካ ጌማናዉ ዳንዳኤና።