1 ፅሞትዮሳ 4 - ጌሻ ማፃፋ

ዎርዶ አስታማረታ

¹ ያና ዎድያን ባለያ አያናታነ ቱና አያናታ ትምርተ ካልድ፥ እስ እስ አሳይ አማኑዋ ካዳናይሳ ጌሻ አያናይ ቆንጭስድ ኦድስ።

² ሄሳ መላ ትምርተይ ኤንታ ካሀይ ዶጭን፥ አሳ ባለያ ዎርዳንቾ አስታማረታፐ ዬስ።

³ ሄሳ መላ አሳት ኤኮነ ገሎ ቃስ እስ እስ ካታ ሞና መላ ድጎሶና። ሽን አማነይሳትነ ቱማ ኤረይሳት ፆሳ ጋላት ዎስድ ማና መላ ፆሳይ ካ መስ።

⁴ ፆሳይ መዳ ኡባባይ ሎኦ። ፆሳ ጋላትድ ሚኮ ዎራ ዎያባይ አይብካ ባዋ።

⁵ ኡባባይ ፆሳ ቃላንነ ዎሳን ጌሽ ግዴስ።

ክርስቶሳ አማንያ አይለ

⁶ ሄሳ ግሾ፥ ኔኒ ሀ ትምርትያ አማነይሳታ ታማርስኮ፥ ኑ አማኑዋንነ ሎኦ ትምርትያ ኪተታዳ ድጭዳ፥ ክርስቶስ የሱሳ ሎኦ አይለ ግዳና።

⁷ ሽን ጎእ ባይና ቱማ ግዶና ኦዳፐነ ጭማ ማጫሳ ሀይሰፐ ባቃታ። ቱማ አያና ደኦን ዳናዉ ነና ሎህሳ።

⁸ አስ ባ አሳተ ምንናዉ ኦያ ኦሶይ ጉስ ማዴስ። ሽን ቱማ አያና ደኦን ባና ሎህሶይ ሀእስካ መርናዉካ ደኦ እምያ ኡፋይስ ደእያ ግሾ፥ ኡባስ ማዴስ።

⁹ ሀ ቃላይ አሳ ኡባይ ኤካናዉ በሲያ ቱማ ኦዳ።

¹⁰ ኑኒ አሳ ኡባ፥ ኡባፈ አድ አማነይሳታ አሽያ ደኦ ፆሳፈ ኤካና ግድ ኡፋይሳን ናግያ ግሾ፥ ሄሳስ ኑኒ ኦሶን ዳቡሮስነ ባፀቶስ።

¹¹ ሀይሳ ኪታነ ታማርሳ።

¹² ኔኒ ያላጋ ግድያ ግሾ፥ ነና ኦንካ ካፖ። ሽን አማነይሳታስ ኔኒ ኦዳን፥ ኦሶን፥ ሲቆን፥ አማኖንነ ጌሻተን ሌምሶ ግዳ።

¹³ ታኒ ያና ጋካናዉ አሳስ ጌሻ ማፃፋ ናባቦን፥ ሳባኮንነ ታማርሶን ምና።

¹⁴ ትንብተይ ኦደትን፥ ጭማት ባንታ ኩሽያ ነ ቦላ ዎዳ ዎደ ኔኒ ኤክዳ፥ ነናን ደእያ ጌሻ አያና እሞታ ካፓ።

¹⁵ ነ ድቻይ አሳ ኡባስ ቆንጫና መላ ሄሳ ምን ቆፓ፤ ሀይሳ ኡባ ዎደ ኦ።

¹⁶ ነ ሁጵያስነ ነ ትምርትያስ ናገታ። ኔኒ ሄሳ ኡባ ዎደ ኦኮ ነናነ ነና ስኤይሳታ አሻሳ።